បញ្ជូនខ្លួនអ្នករត់តាក់ស៊ី បើកបុកថៅកែ លក់គ្រឿងបន្លាស់រថយន្ត យីហោ ជាងជី បណ្ដាលឲ្យស្លាប់ ទៅសាលាដំបូង

ព្រះសីហនុ ៖ អ្នកបើករថយន្តតាក់ស៊ី ដែល ជាន់ហ្វ្រាំងច្រឡំហ្គែរ បណ្ដាលឲ្យបុកថៅកែ លក់គ្រឿង បន្លាស់ និងជួសជុលរថយន្ត យីហោ ជាងជី បណ្តាលឲ្យស្លាប់ និងប្រពន្ធ របួសធ្ងន់ កាលពីយប់ថ្ងៃទី០៥ ខែមីនាឆ្នាំ២០១៩នោះ ត្រូវបានសមត្ថកិច្ចប៉ូលិសសម្រេចកសាងសំណុំរឿងបញ្ជូនទៅសាលាដំបូងដើម្បីចាត់ការតាមផ្លូវច្បាប់ហើយ នារសៀល ថ្ងៃទី០៦ ខែមីនា ឆ្នាំ២០១៩។

ជនជាប់សង្ស័យមានឈ្មោះ ធាំ រ៉េត ភេទប្រុស អាយុ៤៧ឆ្នាំ មានទីលំនៅភូមិ៣ សង្កាត់លេខ៤ ក្រុងព្រះសីហនុ មុខរបររត់តាក់ស៊ី។ ចំណែកជនរងគ្រោះ មានឈ្មោះ វ៉ន វាសនា ភេទ ប្រុស អាយុ ៣៣ឆ្នាំ ហៅជាងជី មុខរបរ លក់គ្រឿងបន្លាស់ និងជួសជុលរថយន្ត(ស្លាប់) និងប្រពន្ធឈ្មោះ ទៀង ហុង ភេទ ស្រី អាយុ ៣៥ឆ្នាំ របួសធ្ងន់ កំពុងសម្រាកព្យាបាល ក្នុងមន្ទីរពេទ្យ មានទីលំនៅភូមិ២ សង្កាត់លេខ៤ ក្រុង/ខេត្តព្រះសីហនុ។

គួរបញ្ជាក់ផងដែរថា ជនសង្ស័យ ឈ្មោះ ធាំ រ៉េត ខាងលើនេះ កាលពីយប់ ថ្ងៃទី០៥ ខែមីនា ឆ្នាំ ២០១៩ ម៉ោងប្រមាណ១៩ និង០០នាទី បានបើករថយន្តរបស់ខ្លួន ម៉ាក HIGHLANDER ពាក់ស្លាកលេខភ្នំពេញ2AJ-1584ចូល ទៅ ផ្ទះជនរងគ្រោះ ដែលជាហាង លក់ គ្រឿងបន្លាស់រថយន្ត ដើម្បី ប្តូរអំពូលភ្លើងរថយន្ត។ ក្រោយមក ពេលឈប់រថយន្តគាត់មិនបានពន្លត់ម៉ាស៊ីនទេ គាត់ដោះលេខដាក់ N ពេលចុះពីឡាន ស្រាប់តែរថយន្តរអិលថយក្រោយ គាត់ស្ទុះទៅក្នុងឡានវិញក្នុងគោលបំណង ជាន់ហ្វ្រាំង តែច្រឡំហ្គែរ ក្នុងពេលនោះដៃរបស់គាត់ បានគ្រវាសដៃ បញ្ចូលលេខទៅ Dវិញ ជាហេតុធ្វើឲ្យរថយន្ត ស្ទុះទៅមុខ បុកជនរងគ្រោះផ្ទប់នឹងជញ្ជាំងផ្ទះស្លាប់ភ្លាមៗ នៅនឹងកន្លែងកើតហេតុ តែម្តង និងស្ត្រីជាប្រពន្ធជនរងគ្រោះ របួសធ្ងន់៕