របបរបស់ប្រធានាធិបតីវេណេហ្ស៊ូអេឡាលោក Nicolas Maduro ដែលត្រូវបានគាំទ្រដោយការដាក់ពង្រាយយោធារបស់រុស្ស៊ីបានធ្វើឱ្យអាមេរិកខឹងសម្បាកាលពីថ្ងៃព្រហស្បតិ៍ដោយបានប្រកាសបម្រាមលើមេដឹកនាំបណ្ដោះអាសន្នដែលគាំទ្រដោយរដ្ឋធានីវ៉ាស៊ីនតោនលោក Juan Guaido ពីការកាន់តំណែងសាធារណៈ។
ប៉ុន្តែមេដឹកនាំសភាលោក Guaido បានវាយបកភ្លាមៗថា ការហាមឃាត់រយៈពេល១៥ឆ្នាំដែលប្រកាសនៅលើកញ្ចក់ទូរទស្សន៍រដ្ឋដោយអគ្គសវនករបស់លោក Maduro ឈ្មោះ Elvis Amoroso គឺមិនអាចយកជាការបានទេ។
លោកបាននិយាយថា "គាត់មិនមែនជាអគ្គសវនករទេ សភាស្របច្បាប់គឺជាស្ថាប័នតែមួយគត់ដែលមានអំណាចក្នុងការតែងតាំងអគ្គសវនករ។
សេចក្តីប្រកាសនេះក៏បានជំរុញឱ្យមានការឆ្លើយតបយ៉ាងឆាប់រហ័សពីទីក្រុងវ៉ាស៊ីនតោនផងដែរដោយអ្នកនាំពាក្យក្រសួងការបរទេសលោក Robert Palladino បានហៅបម្រាមនេះនៅក្នុងសុន្ទរកថាខ្លីមួយថា ជារឿងគួរឱ្យអស់សំណើច។
វាគឺជាការប៉ះទង្គិចគ្នាចុងក្រោយបង្អស់រវាងលោក Maduro និងលោក Guaido ដែលបានអះអាងថាជាមេដឹកនាំស្របច្បាប់នៃប្រជាជាតិអាមេរិកខាងត្បូងដែលមានប្រជាជនចំនួន៣០លាននាក់មួយនេះ។
ការប្រកួតប្រជែងបានបង្កើនទៅជាការ តស៊ូខាងភូមិសាស្ត្រនយោបាយរវាងអាមេរិកនិងសម្ព័ន្ធមិត្តដែលគាំទ្រលោក Guaido ជាមួយនឹងប្រទេសរុស្ស៊ី គុយបានិងចិនដែលគាំទ្រលោក Maduro។
បើទោះបីជាមិនមានប្រជាប្រិយភាពនៅក្នុងប្រទេសដោយសារតែភាព វឹកវរផ្នែកសេដ្ឋកិច្ចក៏ដោយក៏លោក Maduro នៅតែមានអំណាចយ៉ាងខ្លាំងនៅក្នុងប្រទេសដោយសារតែភាពស្មោះត្រង់ពីមេបញ្ជាការយោធារបស់លោកហើយចាប់តាំងពីសប្តាហ៍មុនមកមានវត្តមានកងទ័ពរុស្ស៊ីចំនួន១០០នាក់។លោក Maduro មានទំនុក ចិត្តកាន់តែខ្លាំងចាប់តាំងពីមានការការពាររបស់ក្រុងមូស្គូ៕AFP
Source: Kampuchea Thmey Daily
0 Comments