ក្រុមបាល់ទាត់អគ្គស្នងការដ្ឋាននគរបាលជាតិ (ប៉ូលិស) ត្រូវប៉ះក្រុមអាស៊ីអឺរ៉ុប ហើយក្រុមវិសាខា ត្រូវជួបក្រុមគីរីវង់សុខសែនជ័យ និងក្រុមណាហ្គាវើល ប៉ះក្រសួងការពារជាតិ (ទ័ព) ក្នុងសប្ដាហ៍ទី២នៃពានរង្វាន់លីគកំពូលកម្ពុជា (Metfone Cambodian League)ឆ្នាំ២០១៩នៅល្ងាចថ្ងៃសៅរ៍ ទី៣០ ខែមីនា ឆ្នាំ២០១៩ ដែលរៀបចំឡើងដោយគណៈកម្មការប្រកួតបាល់ទាត់ជាតិកម្ពុជា (CNCC) សេនាធិការរបស់សហព័ន្ធកីឡាបាល់ទាត់កម្ពុជា។
*ប៉ូលីស ជួបអាស៊ីអឺរ៉ុប
ក្រុមអគ្គស្នងការដ្ឋាននគរបាលជាតិ ប៉ះអាស៊ីអឺរ៉ុប នៅវេលាម៉ោង៣:៣០នាទីល្ងាចលើទីលានកីឡដ្ឋានអគ្គីសនីកម្ពុជា ហើយការប្រកួតមាននេះមានផ្សាយផ្ទាល់នៅលើហ្វេសប៊ុករបស់ CNCC។ ក្រុមអគ្គស្នងការដ្ឋាននគរបាលជាតិ ដឹកនាំដោយលោក ប្រាក់ សុវណ្ណារ៉ា អតីតគ្រូបង្វឹកក្រុមជម្រើសជាតិកម្ពុជា។ ក្រុមនេះមានការរៀបចំក្រុមបានល្អច្រើន ទាំងការបន្ថែមកីឡាករបរទេសដែលមានកម្រិតខ្ពស់និងមានបទពិសោធន៍ល្អផងដែរ។ ការប្រកួតប្រកួតបើកឆាកបានចាញ់ម្ចាស់ផ្ទះព្រះខ័នរាជស្វាយរៀង ២ទល់០។ ក្រុមអាស៊ីអឺរ៉ុប រដូវកាលមុនធ្វើបានល្អជាងរាល់ឆ្នាំ ខណៈឆ្នាំនេះដឹកនាំដោយបុគ្គលសំខាន់២នាក់គឺក្រោមការចាប់ដៃគ្នារវាងលោក សុក វាសនា និងលោក សំ វ៉ា់ន់ដេត អតីតគ្រូបង្វឹករបស់ក្លិបព្រះខ័នរាជស្វាយរៀង។ កាលពីប្រកួតបើកឆាកក្រុមនេះបានចាញ់ក្រុមជើងឯកឆ្នាំចាស់ណាហ្គាវើល ១ទល់០។
*វិសាខា ទទួលគីរីវង់សុខសែនជ័យ
ក្រុមវិសាខា ទទួលក្រុមគីរីវង់សុខសែនជ័យ នៅម៉ោង៦ល្ងាចលើទីលានកីឡដ្ឋានវិសាខាហើយប្រកួតនេះមានផ្សាយផ្ទាល់តាមហ្វេសប៊ុករបស់កម្ពុជាថ្មី ផងដែរ។ លោក ហុក សុជីវ័ន្ត ដែលជាគ្រូបង្វឹកក្រុមវិសាខា បានផ្លាស់ប្តូរសមសភាគកីឡាករបរទេសច្រើនបើធៀបនឹងរដូវកាលមុន។ យ៉ាងណាក្តីក្រុមនេះបានធ្វើដំណើរទៅបោះជុំរុំហ្វឹកហាត់និងប្រកួតមិត្តភាពកម្តៅសាច់ដុំនៅប្រទេសថៃ មួយរយៈផងដែរមុនរដូវកាលថ្មីនេះមកដល់។ ប្រកួតមុនក្រុមនេះបានស្មើគ្នាជាមួយក្រុមសូលទីឡូអង្គរ។
*ណាហ្គាវើល ប៉ះក្រសួងការពារជាតិ
ក្រុមជើងឯកឆ្នាំចាស់ណាហ្គាវើល ជួបក្រុមក្រសួងការពារជាតិ នៅវេលាម៉ោង៦ល្ងាចលើទីលានកីឡដ្ឋានកងយោធពលខេមរភូមិន្ទ (ស្តាតចាស់) ហើយប្រកួតនេះមានផ្សាយផ្ទាល់តាមប៉ុស្តិ៍ទូរទស្សន៍ BTV News ផងដែរ។ ក្រុមណាហ្គាវើល របស់លោក មាស ចាន់ណា វិញនៅមិនទាន់រៀបចំក្រុមបានល្អនៅឡើយនោះទេ បើសង្កេតតាមលទ្ធផលកន្លងមក ព្រោះក្រុមនេះមានបេសកម្មប្រកួតទាំងក្នុងស្រុកនិងលើឆាកអន្តរជាតិ ពោលគឺប្រកួតក្នុងពានរង្វាន់លីគកំពូលកម្ពុជា ពានរង្វាន់សម្តេចតេជោ ហ៊ុន សែន និងពានរង្វាន់លំដាប់ទី២ប្រចាំទ្វីបអាស៊ី AFC Cup 2019 តំណាងឱ្យក្រុមទៅពីកម្ពុជា។
ចំណែកក្រសួងការពារជាតិ ដែលដឹកនាំដោយលោក ភា សុភត្រា ដែលជាគ្រូបង្វឹកបាននាំយកម្ចាស់ស្បែកជើងមាស២នាក់ក្នុងពានរង្វាន់លីគកំពូលកម្ពុជា ចូលរួមក្នុងក្រុមដោយក្នុងនោះមានកីឡាករ George Bisan និងDzarma Bata។ លោក ភា សុភត្រា បានលើកឡើងមុនរដូវកាលថ្មីមកដល់ថា លោកកំពុងរៀបចំយុទ្ធសាស្ត្រចំនួនពីរដែលផ្ដោតទៅនឹងការប្រយុទ្ធខ្លាំង និងការពារ ដោយអាស្រ័យទៅលើសមត្ថភាពជាក់ស្ដែងរបស់គូប្រកួត។ លទ្ធផលកាលពីថ្ងៃបើកឆាកក្រុមក្រសួងការពារជាតិ បានត្រឹមស្មើជាមួយក្រុមអង្គរថាយហ្គឺរ ១ទល់១។
ចំណែកប្រកួតផ្សេងទៀតធ្វើឡើងនៅថ្ងៃទី៣១ ខែមីនា ដោយក្រុមសូលទីឡូអង្គរ ប៉ះព្រះខ័នរាជស្វាយរៀង នៅម៉ោង៣និង៣០នាទី លើទីលានកីឡដ្ឋានខេត្តសៀមរាប ហើយក្រុមយុវជនសាលាបាល់ទាត់ជាតិបាទី ទទួលក្រុមភ្នំពេញក្រោន នៅម៉ោងដំណាលគ្នាលើទីលានកីឡាបាល់ទាត់បាទី ហើយក្រុមខេត្តកំពង់ចាម ទទួលក្រុមអង្គរថាយហ្គឺរ នៅម៉ោង៣:៣០នាទីល្ងាចដែរលើទីលានកីឡាបាល់ទាត់វិទ្យាល័យ ប៊ុន រ៉ានី ហ៊ុន សែន មេមត់ និងក្រុមអគ្គីសនីកម្ពុជា ទទួលក្រុមបឹងកេត នៅវេលាម៉ោងដូចគ្នាលើទីលានកីឡដ្ឋានអគ្គីសនីកម្ពុជា។
តាមគម្រោងពានរង្វាន់បាល់ទាត់លីគកំពូលកម្ពុជារដូវកាលថ្មីឆ្នាំ ២០១៩ នេះនឹងចាប់ផ្ដើមពីថ្ងៃទី១៦ ខែមីនា ដល់ថ្ងៃទី១៧ ខែតុលា ឆ្នាំ២០១៩។ ក្រុមជើងឯកលីគកំពូលកម្ពុជាមានឱកាសចេញទៅប្រកួតលើឆាកអន្តរជាតិមួយចំនួនដូចជាពានរង្វាន់ AFC Cup, Mekong Championship និងពានរង្វាន់មួយចំនួនទៀត៕
Source: Kampuchea Thmey Daily
0 Comments