ប្រធានាធិបតីអាមេរិកលោក Donald Trump បាននិយាយកាលពីថ្ងៃអាទិត្យថា ការសាកសួររបស់សភា កាលពីសប្តាហ៍មុនលើអតីតមេធាវីរបស់លោក អាចនឹងរួមចំណែកដល់ការបរាជ័យនៃកិច្ចប្រជុំកំពូលរបស់លោកជាមួយនឹងមេដឹកនាំកូរ៉េខាងជើងលោកគីមជុងអ៊ុន ថ្វីបើទីប្រឹក្សាសន្តិសុខជាតិរបស់លោកអះអាងថា កិច្ចប្រជុំនៅទីក្រុងហាណូយគឺជាជោគជ័យមួយក៏ដោយ។
ជំនួបកំពូលលើកទីពីរដើម្បីឈានដល់កិច្ចព្រមព្រៀងដកហូតអាវុធជាមួយលោកគីមបានបញ្ចប់ទៅនៅក្នុងភាពវឹកវរនៅប្រទេសវៀតណាមកាលពីថ្ងៃព្រហស្បតិ៍ដោយលោក Trump បាននិយាយថា “ពេលខ្លះ អ្នកត្រូវតែដើរចេញហើយនេះគ្រាន់តែជាពេលវេលាមួយប៉ុណ្ណោះ”។
កិច្ចប្រជុំកំពូលនេះបានប្រព្រឹត្តទៅចំពេលដែលគណៈកម្មាធិការសភាដែលដឹកនាំដោយបក្សប្រជាធិបតេយ្យបានសាកសួរលោក Michael Cohen ដែលជាអតីតមេធាវីរបស់លោក Trump ដោយបានហៅអតីតមេរបស់គាត់ថាជា “អ្នកប្រកាន់ជាតិសាសន៍, កុហកនិងបោកប្រាស់”។
កាលពីថ្ងៃអាទិត្យ លោក Trump បានថ្លែងថា សវនាការនេះអាចរួមចំណែកចំពោះបរាជ័យ។
លោកបានបង្ហោះ Twitter ថា “សម្រាប់អ្នកប្រជាធិបតេយ្យ ការសម្ភាសន៍នៅក្នុងសវនាការបើកចំហរចំពេលមានកិច្ចប្រជុំកំពូលនុយក្លេអ៊ែរដ៏សំខាន់ជាមួយកូរ៉េខាងជើងគឺប្រហែលជាកម្រិតទាបថ្មីនៅក្នុងនយោបាយអាមេរិកហើយប្រហែលជាបានរួមចំណែកដល់ការបរាជ័យ”។
ប៉ុន្តែលោក John Bolton ទីប្រឹក្សាសន្តិសុខជាតិរបស់អាមេរិកបានប្រាប់កម្មវិធី “Face the Nation” របស់ទូរទស្សន៍ CBS កាលពីថ្ងៃអាទិត្យថា ជំនួបកំពូលនេះគួរតែត្រូវបានគេមើលឃើញថាជា “ជោគជ័យ” ហើយបានកំណត់ប្រធានាធិបតីថាបានការពារនិងជំរុញផលប្រយោជន៍ជាតិរបស់អាមេរិក។
លោកបាននិយាយថា បញ្ហាគឺថា តើកូរ៉េខាងជើងនឹងទទួលយកអ្វីដែលលោកប្រធានាធិបតីហៅថា “កិច្ចព្រមព្រៀងដ៏ធំ” ដែលជាការលុបបំបាត់អាវុធនុយក្លេអ៊ែរទាំងស្រុងដែរឬអត់។
លោក Bolton បានបន្ថែមថា “ដូច្នេះលោកប្រធានាធិបតីបានប្រកាន់ខ្ជាប់នូវជំហររបស់គាត់ហើយគាត់បានធ្វើឲ្យទំនាក់ទំនងរបស់គាត់កាន់តែស៊ីជម្រៅជាមួយ នឹងលោកគីមជុងអ៊ុន។ ខ្ញុំមិនចាត់ទុកថាវាជាបរាជ័យទាល់តែសោះនៅពេលផលប្រយោជន៍ជាតិអាមេរិកត្រូវបានការពារ”។
ការបរាជ័យនៃកិច្ចប្រជុំកំពូលនេះបានកើតឡើងបន្ទាប់ពីកិច្ចប្រជុំជាប្រវត្តិសាស្ត្ររបស់មេដឹកនាំទាំងពីរនៅក្នុងប្រទេសសិង្ហបុរីដែលបានបង្កើតនូវការប្តេជ្ញាចិត្តមិនច្បាស់លាស់ពីលោកគីមក្នុងការធ្វើការឆ្ពោះទៅរកការរំសាយអាវុធនុយក្លេអ៊ែរពេញលេញចេញពីឧបទ្វីបកូរ៉េ៕ AFP
Source: Kampuchea Thmey Daily
0 Comments