ការប្រកួតជម្រុះដណ្តើមខ្សែក្រវាត់ជើងឯកWurkz ទម្ងន់៦០គីឡូក្រាម នៅសង្វៀនទូរទស្សន៍SEATV នារសៀលថ្ងៃអាទិត្យ ទី០៣ ខែមីនា ឆ្នាំ២០១៩នេះ ជាការប្រកួតជម្រុះជុំទី៣ រវាងអ្នកប្រដាល់កម្ពុជា សារឿន ច័ន្ទ ក្លិបតាព្រហ្មមានជ័យ និងអ្នកប្រដាល់ថៃ Super Man ហើយអ្នកប្រដាល់កម្ពុជាហេង វាសនា ក្លិបព្រៃទទឹង ខេត្តបាត់ដំបង និងអ្នកប្រដាល់ថៃ Chhai Yo។
សម្រាប់ជំនួបរវាង សារឿន ច័ន្ទ ក្លិបតាព្រហ្មមានជ័យ និង Super Man។ ពួកគេទាំងពីរនាក់នេះ មិនធ្លាប់ជួបគ្នាទេកន្លងមក ដោយសារ Super Man ជាអ្នកប្រដាល់ថៃចំណូលថ្មី ទើបមកប្រកួតលើកដំបងក្នុងជម្រុះខ្សែក្រវាត់នេះ។
សារឿន ច័ន្ទ គេបានចូលជំនួសចាន់ សំអាត ក្លិបអប់រំកាយកីឡាស្រុកអន្លង់វែង ដែលធ្វើការប្រកួតបាន១ប្រកួត ក៏បោះបង់ចោលការប្រកួតដោយសារជួបបញ្ហាសុខភាព។ ចាន់ សំអាត វាយចាញ់ថៃ Yorth Katangyou ១ប្រកួត បន្សល់ទុកឲ្យ សារឿន ច័ន្ទ បន្តមកដល់ជុំទី៣នេះ។
កាលពីប្រកួតជុំទី២ សារឿន ច័ន្ទ បានវាយឈ្នះអ្នកប្រដាល់ថៃ Chhav Vallit ក្នុងទឹកទី៣ដែលធ្វើឲ្យសារឿន ច័ន្ទ បាន៤ពិន្ទុ ក្នុងពីរប្រកួតបូកទាំង១ប្រកួតរបស់ ចាន់ សំអាត ផង។ ចំពោះអ្នកប្រដាល់ថៃ Super Man គេមាន៦ពិន្ទុ ដោយវាយឈ្នះទាំង២ជុំ។
សារឿន ច័ន្ទ មានរបៀបវាយល្អ និង រហ័សរហួន ហើយកម្លាំង និង ទឹកចិត្តរបស់គេក៏ធំថែមទៀត។ ចាំមើល សារឿន ច័ន្ទ អាចយកបាន៣ពិន្ទុ ពីការជួប Super Man នេះបានឬអត់?។ អ្នកប្រដាល់មកពីក្លិបតាព្រហ្មមានជ័យ រូបនេះ គេមានប្រវត្តិប្រកួតចំនួនចំនួន១០១លើក ឈ្នះ៨១លើក ចាញ់១៨លើក និងស្មើ០២លើក។
Super Man វិញ របៀបវាយរបស់គេ គឺវាយដោយមិនបង្ខំ គេវាយចេញមួយៗតែច្បាស់ហើយវាយចេញភាគច្រើនចំគោលដៅបានល្អ នេះបើតាមការកត់សម្គាល់ឃើញក្នុងការប្រកួតរបស់គេកន្លងមក ។ គេមានប្រវត្តិប្រកួតចំនួន៦៦លើក ឈ្នះ៥៣លើក និង ចាញ់១២លើក និងស្មើ ០១លើក។ ចាំមើល ការប្រកួតជម្រុះជុំទី៣ រវាង សារឿន ច័ន្ទ និង Super Man តើនរណារកបាន៣ពិន្ទុនោះ?។
ចំពោះការជួបគ្នារវាង ហេង វាសនា និង Chhai Yo វិញ ក៏ពិបាកទស្សន៍ទាយថា អ្នកណាឈ្នះ អ្នកណាចាញ់ដែរ។ ពួកគេទាំងពីរនាក់នេះ មិនធ្លាប់ជួបគ្នាទេកន្លងមក ដោយសារ Chhai Yo ជាអ្នកប្រដាល់ថៃចំណូលថ្មី ទើបមកប្រកួតលើកដំបូងក្នុងជម្រុះខ្សែក្រវាត់នេះ។
ហេង វាសនា និង Chhai Yo នេះ គេមានសមត្ថភាពប្រហាក់ប្រហែលគ្នាទេ ហើយមាឌ និងប្រវត្តិប្រកួត ក៏ប្រហែលគ្នាដែរ។ ប៉ុន្តែហេង វាសនា គេមានប្រៀបលើថៃខាងកម្ពស់បន្តិចដោយវាសនាកម្ពស់១,៧០ម៉ែត្រ ឯ ថៃមានកម្ពស់១,៦៧ម៉ែត្រ។
Chhai Yo គេមានកំណត់ត្រាប្រកួតចំនួន៧៦លើក ឈ្នះ៥៨លើក និងចាញ់១៨លើក មិនដែលស្មើ។ ចំណែក ហេង វាសនា គេមានកំណត់ត្រាប្រកួត៥៩លើក ឈ្នះ៤២លើក ចាញ់១៤ លើក និង ស្មើ០៣លើក។
ទោះជាយ៉ាងណា សម្រាប់ការជួបគ្នានេះ ពុំអាចសន្និដ្ឋានមុនថា អ្នកណាឈ្នះ អ្នកណាចាញ់នោះឡើយ ហើយពីរនាក់នេះ ក៏មិនអាចអ្នកណាមើលស្រាលអ្នកណាបានដែរ។ ហើយត្បិតថា អ្នកប្រដាល់ Chhai Yo ល្អ និងខ្លាំងប្រហាក់ប្រហែលនឹងហេង វាសនា ដែរ។ ពីរនាក់នេះ ពីមុនមកពុំធ្លាប់ជួបគ្នាទេ។
ឆ្លងកាត់ពីរប្រកួតកន្លងមកនោះ ហេង វាសនា ប្រកួតជុំទី១វាយចាញ់អ្នកប្រដាល់ថៃ Chhav Vallit ដោយពិន្ទុ និងជុំទី២ គេវាយឈ្នះ Yorth Katang You ដោយពិន្ទុ មាន៤ពិន្ទុ ហើយអ្នកប្រដាល់ថៃ Chhai Yo ឆ្លងកាត់ពីរប្រកួតដូចគ្នា ជុំទី១គេវាយចាញ់លន បញ្ញា ក្នុងទឹកទី៣ និងជុំទី២ គេវាយឈ្នះអ្នកប្រដាល់កម្ពុជាធឿន ធី ក្នុងទឹកទី៣វិញ មាន៤ពិន្ទុដែរ។ ចាំមើល នៅជុំទី៣នេះ តើអ្នកប្រដាល់ខ្មែរហេង វាសនា ឬ Chhai Yo អ្នកប្រដាល់ថៃ ដែលរកបាន៣ពិន្ទុបន្ថែមនោះ។
ព្រឹត្តិការណ៍ដណ្តើមខ្សែក្រវាត់Wurkz រដូវកាលទី៣ ទម្ងន់៦០គីឡូក្រាម មានអ្នកប្រដាល់ជើងខ្លាំងកម្ពុជា៤រូប និង អ្នកប្រដាល់ជើងខ្លាំងថៃ៤រូប។ ការប្រកួត គឺពុំមានវគ្គពាក់កណ្ដាលផ្ដាច់ព្រ័ត្រទេ។ ដូច្នេះហើយ ទើបទាំងប្រដាល់ខ្មែរ ទាំងអ្នកប្រដាល់ថៃ គឺត្រូវការឈ្នះដូចគ្នា ត្បិតគេជ្រើសរើសយកតែអ្នកលេខ១ក្នុងពូលទាំង ពូលខ្មែរនិងពូលថៃ តែប៉ុណ្ណោះ៕
Source: Kampuchea Thmey Daily
0 Comments