បន្ទាយមានជ័យ ៖ ក្មេងៗសិស្សសាលាបឋមសិក្សាអូរអំបិល៣០នាក់ ក្នុងចំណោមក្មេងៗ ៤០០នាក់ ត្រូវបានដឹកទៅសង្គ្រោះនៅមន្ទីរពេទ្យ ក្រោយផឹកទឹកដោះគោ ANGKORMILK ។
ហេតុការណ៍នេះ កើតឡើងកាលពីថ្ងៃទីថ្ងៃទី២៦ ខែមេសា ឆ្នាំ២០១៩ នៅក្នុងបរិវេណសាលាបឋមសិក្សាអូរអំបិល ស្ថិតក្នុងភូមិអូរអំបិល សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ។
តាមការឲ្យដឹងពីលោកគ្រូ អ្នកគ្រូ បានឲ្យដឹងថា នៅវេលាម៉ោង៨ ព្រឹកថ្ងៃកើតហេតុ មានក្រុមហ៊ុនទឹកដោះគោ ANGKORMILK បានចុះមកចែក ទឹកដោះគោ ឲ្យក្មេងៗ សិស្សសាលាផឹក លុះក្រោយក្មេងៗ ផឹកទឹកដោះគោរួច ប្រហែលជា១៥នាទី ក៏មានអាការៈក្អួត ទន់ដៃទន់ជើង ទើបត្រូវបាន លោកនាយកសាលា និងលោកគ្រូអ្នកគ្រូ ដឹកទៅសង្គ្រោះនៅមន្ទីរពេទ្យឯកជន ចំនួន២៥នាក់ និង៥នាក់ទៀត ត្រូវបាននាំយកទៅសង្គ្រោះ នៅមន្ទីរពេទ្យបង្អែកក្រុងសិរីសោភ័ណ។
ជាមួយគ្នានេះ លោក ឈឹម វុទ្ធី នាយប៉ុស្តិ៍នគរបាលរដ្ឋបាលសង្កាត់អូរអំបិលបានឲ្យដឹងថា ក្រុមហ៊ុនទឹកដោះគោ ANGKORMILK នេះ បានចុះចែកទឹកដោះគោ សម្រាប់ក្មេងៗ សិស្សសាលា ដោយបានការអនុញ្ញាតពីលោកប្រធានមន្ទីរអប់រំ យុវជន និងកីឡា ខេត្តបន្ទាយមានជ័យ ហើយក្នុងនោះដែរក្រុមហ៊ុនក៏បានចុះចែកទឹកដោះគោ ជាច្រើនសាលាមកហើយដែរ តែគ្មានការពុល ដូចករណីខាងលើនេះទេ ហើយក៏មិនទាន់មានការសន្និដ្ឋានជាក់លាក់ណាមួយ ដែលបង្ហាញថា ក្មេងៗ ទាំង៣០នាក់ខាងលើនេះ មានអាការៈក្អួត ដោយសារពុលទឹកដោះគោនេះពិតមែន ឬយ៉ាងណាទេ៕
Source: Kampuchea Thmey Daily
0 Comments