ប្រព័ន្ធផ្សព្វផ្សាយរដ្ឋក្នុងទីក្រុងព្យុងយ៉ាងបានរាយការណ៍នៅថ្ងៃសុក្រថា ក្នុងកិច្ចប្រជុំកំពូលលើកដំបូងជាមួយប្រធានាធិបតីរុស្សីវ្លាឌីមៀរពូទីន, មេដឹកនាំកូរ៉េខាងជើងលោកគីមជុងអ៊ុនបានចោទប្រកាន់សហរដ្ឋអាមេរិកថា បានប្រព្រឹត្តអំពើអាក្រក់នៅឯកិច្ចចរចានាពេលថ្មីៗនេះ។
លោកគីមនិងលោកពូទីនបានជួបគ្នាកាលពីថ្ងៃព្រហស្បតិ៍នៅកំពង់ផែ Vladivostok ភាគខាងកើតប្រទេសរុស្ស៊ីសម្រាប់កិច្ចប្រជុំកំពូលលើកដំបូងរបស់ពួកគេដែលមានគោលបំណងប្រឆាំងនឹងឥទ្ធិពលរបស់អាមេរិកស្របពេលដែលលោកគីមកំពុងប្រឈមមុខជាមួយលោកដូណាល់ត្រាំស្តីពីឃ្លាំងអាវុធនុយក្លេអ៊ែររបស់ទីក្រុងព្យុងយ៉ាង។
មេដឹកនាំទាំងពីរបានស្វាគមន៍គ្នាយ៉ាងកក់ក្តៅដោយចាប់ដៃគ្នានិងចែករំលែកស្នាមញញឹមនៅពេលចាប់ផ្តើមកិច្ចប្រជុំលើកោះមួយក្នុងទីក្រុង Vladivostok ដែលមានរយៈពេលជិតប្រាំម៉ោង។
លោកពូទីនបានរង់ចាំលោកគីមនៅពេលដែលលោកចេញពីរថយន្តទំនើបរបស់លោក។
ទីភ្នាក់ងារព័ត៌មាន KCNA បានរាយការណ៍ថា ក្នុងអំឡុងកិច្ចពិភាក្សានេះ លោកគីមបាននិយាយថា “ស្ថានការណ៍នៅឧបទ្វីបកូរ៉េនិងក្នុងតំបន់ពេលនេះកំពុងតែជាប់គាំងហើយឈានដល់ចំណុចសំខាន់មួយ”។
ទីភ្នាក់ងារនេះបានបន្ថែមថា “លោកបានព្រមានថា ស្ថានភាពនេះអាចវិលត្រលប់ទៅរដ្ឋដើមវិញដោយសារតែសហរដ្ឋអាមេរិកធ្វើអាកប្បកិរិយាជាឯកតោភាគីក្នុងជំនឿមិនសមរម្យនៅក្នុងកិច្ចចរចាកំពូលលើកទី២រវាងកូរ៉េខាងជើងនិងអាមេរិកនាពេលថ្មីៗនេះ”។
KCNA បានដកស្រង់សម្តីលោកគីមដែលនិយាយថា “សន្តិភាពនិងសន្តិសុខនៅលើឧបទ្វីបកូរ៉េនឹងពឹងផ្អែកទាំងស្រុងទៅលើអាកប្បកិរិយានាពេលអនាគតរបស់អាមេរិកហើយកូរ៉េខាងជើងនឹងប្រុងប្រៀបសម្រាប់គ្រប់ស្ថានភាពទាំងអស់”។
គួរបញ្ជាក់ជាថ្មីថា កិច្ចប្រជុំកំពូលគីម-ត្រាំបានបែកបាក់កាលពីចុងខែកុម្ភៈដោយគ្មានកិច្ចព្រមព្រៀងមួយឡើយលើឃ្លាំងអាវុធនុយក្លេអ៊ែររបស់កូរ៉េខាងជើង។
នៅឯកិច្ចចរចាទាំងនោះ រដ្ឋាភិបាលក្រុងព្យុងយ៉ាងបានទាមទារឲ្យមានការដកទណ្ឌកម្មជាបន្ទាន់ប៉ុន្តែភាគីទាំងពីរមិនយល់ស្របគ្នាលើអ្វីដែលកូរ៉េខាងជើងចង់បានជាថ្នូរនឹងការបោះបង់នុយក្លេអ៊ែរ៕ AFP
Source: Kampuchea Thmey Daily
0 Comments