ភ្នំពេញ ៖ អគារសិក្សាដែលជាហិរញ្ញប្បទានរបស់រាជរដ្ឋាភិបាលជប៉ុន ក្នុងគម្រោងពង្រីកសាលាមធ្យមសិក្សា នៅក្នុងរាជធានីភ្នំពេញ ចំនួន៨ខ្នង ស្មើនឹង១៥៧បន្ទប់ ត្រូវបានសម្ពោធដាក់ឲ្យប្រើប្រាស់ជាផ្លូវការហើយ ដើម្បីបង្កលក្ខណៈងាយស្រួលដល់សិស្សានុសិស្សបានចូលសិក្សា។
ពិធីនេះបានធ្វើឡើង កាលពីព្រឹកថ្ងៃទី២៦ ខែមេសា ឆ្នាំ២០១៩ នៅក្នុងទីតាំងវិទ្យាល័យព្រែកលៀប សង្កាត់ព្រែកលៀប ខណ្ឌជ្រោយចង្វារ ក្រោមវត្តមាន លោក ឃូង ស្រេង អភិបាលរាជធានីភ្នំពេញ និង លោក ហូរីណូអូជិ ហ៊ីដេហ៊ីសា ឯកអគ្គរាជទូតជប៉ុនប្រចាំប្រទេសកម្ពុជា និងមានការចូលរួមពី ប្រជាពលរដ្ឋ សិស្សានុសិស្ស លោកគ្រូ អ្នកគ្រូ មន្ត្រីរាជការ ជាច្រើននាក់ទៀត។
ប្រធានមន្ទីរអប់រំ យុវជន និង កីឡា រាជធានីភ្នំពេញ លោក ហែម ស៊ីណារ៉េត បានឲ្យដឹងថា សម្រាប់វិស័យអប់រំនៅរាជធានីភ្នំពេញ ក្នុងចន្លោះឆ្នាំ២០០៥ ដល់២០១៥ បានទទួលហិរញ្ញប្បទានពីរាជរដ្ឋាភិបាលជប៉ុន តាមរយៈទីភ្នាក់ងារ ចៃកា នូវអគារសិក្សាសម្រាប់បឋមសិក្សា ដែលមានកម្ពស់ចាប់ពី៣ដល់៥ជាន់ចំនួន៣លើក មាន១៨ខ្នង ស្មើ៣២០បន្ទប់ នៅសាលាបឋមសិក្សា១៨សាលា ដោយគម្រោងនេះ គ្រប់គ្រងអនុវត្តដោយភាគីជប៉ុន។ ដោយឡែក ស្ថានទូតជប៉ុន ប្រចាំកម្ពុជា បានផ្តល់ជំនួយឥតសំណង នៃគម្រោងការទ្រង់ទ្រាយតូច សន្តិសុខមនុស្សជាតិ ( គូសាណូណិ) ដើម្បីគាំទ្រអភិវឌ្ឍន៍វិស័យអប់រំនៅរាជធានីភ្នំពេញ មានអគារសិក្សា៧ខ្នង៤៦បន្ទប់។ ក្រោយមក ក៏មានការណែនាំពីJica ឲ្យស្នើសុំសាងសង់អគារសិក្សា ដែលមានកម្ពស់ ចាប់ពី៣ ដល់៥ជាន់ ទៅរាជរដ្ឋាភិបាលជប៉ុន សម្រាប់មធ្យមសិក្សា នៅរាជធានី។ សំណើនេះ ក៏ត្រូវបានភាគីជប៉ុន យល់ព្រម និងផ្តល់ជូនជាហូរហែ។
លោកបញ្ជាក់ថា បន្ទាប់ពីបញ្ចប់គម្រោងសាងសង់អគារសិក្សា៨ខ្នងនេះ នៅសល់ថវិកាខ្លះត្រូវបានភាគីជប៉ុនអនុញ្ញាតជូនរដ្ឋបាលរាជធានីភ្នំពេញប្រើប្រាស់រៀបចំបណ្ណាល័យជួសជុលបន្ទប់រៀន រៀបចំហេដ្ឋារចនាសម្ព័ន្ធ បំពាក់សង្ហារឹម និងការថែទាំនានាក្នុងសាលា។
លោក ឃួង ស្រេង បានមានប្រសាសន៍ថា ទំនាក់ទំនងការទូតរវាងកម្ពុជា-ជប៉ុន និងក្នុងក្របខណ្ឌកិច្ចសហប្រតិបត្តិ ការរវាងសាលារាជធានីភ្នំពេញ និងស្ថានទូតជប៉ុន តាមរយៈទីភ្នាក់ងារ Jica ប្រចាំកម្ពុជា បានផ្តល់នូវជំនួយអភិវឌ្ឍន៍ ផ្លូវការ ដែលមានជំនួយឥតសំណង និងកម្ចីឥណទានជាច្រើន ក្នុងនោះសម្រាប់រាជធានីភ្នំពេញ ចាប់ពីឆ្នាំ១៩៩៨មក ជប៉ុនបានរួមចំណែកក្នុងការអភិវឌ្ឍន៍លើគម្រោងធំៗជាច្រើន។ ជាក់ស្តែង អគារសិក្សា០៨ខ្នង នៅអនុវិទ្យាល័យ និងវិទ្យាល័យចំនួន៨ ដែលជាជំនួយឥតសំណង ក្នុងគ្រោងពង្រីកសាលាមធ្យមសិក្សានៅរាជធានីភ្នំពេញ ដែលជាសក្ខីភាពបញ្ជាក់ពីការរឹតចំណងមិត្តភាព សាមគ្គីភាព និង កិច្ចសហប្រតិបត្តិការ រវាងរាជរដ្ឋាភិបាល និងប្រជាជន នៃប្រទេសទាំងពីរឲ្យកាន់តែរឹងមាំប៉ុណ្ណោះទេ ប៉ុន្តែបានឆ្លុះបញ្ចាំងឲ្យឃើញពីភាពជោគជ័យថ្មីមួយទៀត របស់រាជរដ្ឋាភិបាលកម្ពុជា ក្នុងការអនុវត្តនយោបាយ កំណែទម្រង់ ស៊ីជម្រៅលើវិស័យអប់រំ តាមរយៈការធ្វើឲ្យប្រសើរឡើងនូវគុណភាពអប់រំ ដើម្បីកសាង និងអភិវឌ្ឍន៍ធនធានមនុស្សឲ្យមានគុណភាព សុជីវធម៌ និងគុណធម៌ សំដៅឆ្លើយតបទៅនឹងការអភិវឌ្ឍសេដ្ឋកិច្ច សង្គម និងវប្បធម៌ ព្រោះការផ្តល់សេវាអប់រំ ប្រកបដោយវិជ្ជាជីវៈ និង គណនេយ្យភាព ជាមូលដ្ឋាន គឺជាបុព្វហេតុសម្រាប់កសាងសង្គមមួយប្រកបដោយ និរន្តរភាព ទាំងក្នុងក្របខ័ណ្ឌថ្នាក់ជាតិ ទ្វេភាគី សហគមន៍អាស៊ាន និងពិភពលោកផងដែរ៕
Source: Kampuchea Thmey Daily
0 Comments