ក្រុម Atalanta បានបង្ហាញទម្រង់លេងដ៏គួរចាប់អារម្មណ៍របស់ពួកគេ ពេលដែលបោះជំហានកាន់តែជិតនឹងតំណែងកំពូលទាំង៤នៅក្របខណ្ឌ Serie Aជាមួយនឹងជ័យជំនះ២-១លើក្រុម Napoliកាលពីថ្ងៃចន្ទ។
ខណៈពេលដែលក្រុមលេខ២ Napoliមាន៦៧ពិន្ទុ និងមាន៦ពិន្ទុនាំមុខក្រុមលេង៣ Inter Milan នោះ ក្រុម Atalantaបានឡើងមកឈរនៅលេខរៀងទី៥វិញ មាន៥៦ពិន្ទុ។ ពួកគេមានពិន្ទុស្មើជាមួយក្រុម AC Milan ឈរនៅលេខរៀងទី៤ និងមាន១ពិន្ទុនាំមុខក្រុមលេខ៦ AS Roma ជាមួយនឹង៥ប្រកួតទៀត ត្រូវលេងបញ្ចប់រដូវកាល។
ក្រុម Napoli យល់ឃើញថា យ៉ាងហោចណាស់ក៏ពួកគេរកបាន១ពិន្ទុដែរ បើសិនជាមិនមែន៣ពិន្ទុទាំងអស់នោះ ក្រោយលេងគ្របដណ្តប់ការប្រកួតទាំងស្រុង តាំងពីដំបូងដល់ពេលបញ្ចប់។ ប៉ុន្តែពួកគេ បែរជាដៃទទេស្អាត ដោយសារតែខ្សែការពារដ៏រឹងមាំរបស់ក្រុម Atalanta។
កីឡាករ Mertens បានធ្វើឲ្យក្រុមម្ចាស់ផ្ទះនាំមុខជាមួយនឹងគ្រាប់បាល់ទី១២របស់គាត់នៅក្នុងរដូវកាលនេះ នៅនាទី២៨។ គាត់ធ្វើបានសម្រេចពីការបញ្ជូលបានរបស់កីឡាករ Kevin Malcuit មុនពេលដែលកីឡាករ Duvan Zapata តាមស្មើវិញសម្រាប់ក្រុម Atalanta នៅ២០នាទីចុងក្រោយ។ បន្ទាប់មក កីឡាករ Zapata បានជួយឲ្យកីឡាករ Mario Pasalic សម្រេចបានគ្រាប់បាល់ឈ្នះ។
ក្រុមអ្នកគាំទ្រម្ចាស់ផ្ទះ បានទាមទារឲ្យមានបាល់ប៉េណាល់ទីផងដែរ ពេលដែលកីឡាករ Mertens រត់ជុំវិញអ្នកចាំទីរបស់ក្រុម Atalantaធ្វើឲ្យគាត់ដួល ប៉ុន្តែត្រូវបានអាជ្ញាកណ្តាលច្រានចោល៕
Source: Kampuchea Thmey Daily
0 Comments