ទីក្រុង Houston រដ្ឋតិចហ្សាស់ សហរដ្ឋអាមេរិក នឹងធ្វើម្ចាស់ព្រឹត្តិការណ៍វាយកូនឃ្លីលើតុ World Table Tennis Championships 2021 ដែលជាព្រឹត្តការណ៍ឡើងជាលើកដំបូងក្រៅទឹកដីអឺរ៉ុប និងអាស៊ី ចាប់តាំងពីឆ្នាំ១៩៣៩រហូតមក ក្នុងនោះ ទីក្រុង Chengdu របស់ចិន នឹងធ្វើម្ចាស់ព្រឹត្តិការណ៍នេះ នៅក្នុងឆ្នាំ២០២២។ នេះបើយោងតាមការអះអាងពីសហព័ន្ធវាយកូនឃ្លីលើតុអន្តរជាតិ(ITTF) បានប្រកាសឲ្យដឹងកាលពីថ្ងៃចន្ទ។
ទីក្រុង Houston នឹងក្លាយជាទីក្រុងលើកដំបូងនៅសហរដ្ឋអាមេរិក រៀបចំព្រឹត្តិការណ៍ពិភពលោកមួយនេះ ដោយបានផ្តួលទីក្រុង Agadir របស់ម៉ារ៉ុក ។ មានតែម្តងគត់ ដែលព្រឹត្តិការណ៍មួយនេះ ធ្វើនៅក្រៅអឺរ៉ុប និងអាស៊ី ចាប់តាំងពីការដាក់ឲ្យប្រើប្រាស់ការប្រកួតនៅឆ្នាំ១៩២៦នោះ គឺកាលពីរយៈពេល៨០ឆ្នាំមុន ដែលរៀបចំឡើងនៅក្នុងទីក្រុងគែ របស់ប្រទេសអេហ្ស៊ីប។
ទីក្រុង Chengdu បានឈ្នះការដេញថ្លៃពីប្រទេសជប៉ុន និងប្រទេសព័រទុយហ្គាល់ សម្រាប់ព្រឹត្តិការណ៍ឆ្នាំ២០២២ ដោយគេរំពឹងថា នឹងមានកីឡាករ៦០៩នាក់ មកពីបណ្តាលប្រទេសចំនួន១០៩ នឹងចូលរួម។
លោក Janis Burke គឺជាប្រធានប្រតិបត្តិក្រុមអាជ្ញាធរកីឡាក្រុង Houston បាននិយាយនៅក្នុងសេចក្តីថ្លែងការណ៍មួយបង្ហោះលើវេបសាយរបស់ ITTF ថា យើងពិតជាមសប្បាយរីករាយខ្លាំងណាស់ មិនត្រឹមតែជាការធ្វើម្ចាស់ផ្ទះ World Table Tennis Championships 2021ប៉ុណ្ណោះទេ ប៉ុន្តែវាគឺជាឱកាសមួយក្នុងការរំឭកដល់ពេលចាប់កំណើតឡើងនៃវិស័យកាទូតពីងប៉ុង ផងដែរ។
សូមបញ្ជាក់ថា វានឹងក្លាយជាព្រឹត្តិការណ៍សកលលោកលើកទី៤សម្រាប់ទីក្រុង Houstonដែលធ្លាប់ធ្វើម្ចាស់ផ្ទះព្រឹត្តិការណ៍ប្រដាល់ពិភពលោកឆ្នាំ១៩៩៩ ការប្រកួតលើកទម្ងន់ពិភពលោកឆ្នាំ២០១៥ និងទីក្រុងមួយនេះ នឹងធ្វើម្ចាស់ផ្ទះការប្រណាំងពិភពលោក BMX នៅឆ្នាំក្រោយផងដែរ៕
Source: Kampuchea Thmey Daily
0 Comments