ក្រុមយក្សអេស្ប៉ាញ Barcelona ជិតដល់ពេលលើកពាន La Ligaរបស់ពួកគេ បន្ទាប់ពីរកបានជ័យជំនះ២-០លើក្រុម Alavesកាលពីថ្ងៃអង្គារ ធ្វើឲ្យពួកគេមាន១២ពិន្ទុនាំមុខគេនៅលើកំពូលតារាង ជាមួយនឹង៤ប្រកួតទៀត ត្រូវលេង។
បើសិនជាក្រុមលេខ២ Atletico Madrid ចាញ់ក្រុម Valencia នៅថ្ងៃពុធ ឬចាញ់ក្រុម Real Valladolid នៅថ្ងៃសៅរ៍ នោះក្រុម Barcelonaនឹងក្លាយជាក្រុមជើងឯក មុនពេលដែលពួកគេប៉ះជាមួយក្រុម Levante នៅល្ងាចថ្ងៃសៅរ៍។
ដោយទុកជើងលេងនៅសប្តាហ៍ក្រោយនៅការប្រកួតជើងទី១វគ្គពាក់កណ្តាលផ្តាច់ព្រ័ត្រ Champions League ជាមួយក្រុម Liverpool គ្រូបង្វឹក Ernesto Valverde បានដាក់កីឡាករ Lionel Messi, Jordi Alba និងកីឡាករ Arthur លេងជាកីឡាករបម្រុង។
ក្រោយបញ្ចប់ការប្រកួតតង់ទី១ ក្រុម Barcelonaបានបង្កើនការវាយលុករបស់ខ្លួននៅក្នុងតង់ទី២ ហើយកីឡាករខ្សែបម្រើ Carles Alena បានធ្វើឲ្យក្រុម Barcelonaនាំមុខមុន នៅក្នុងទឹកដី Mendizorroza ក្រោយលេងបាន៥៤នាទី។
កីឡាករ Arturo Vidal និងកីឡាករ Sergio Roberto លេងបានយ៉ាងស៊ីចង្វាក់ ដើម្បីបញ្ជូនបាល់ឲ្យកីឡាករ Alena ដោយក្នុងនោះកីឡាករ Luis Suarez លោតរំលងបាល់ ជាហេតុធ្វើកីឡាករវ័យ២១ឆ្នាំម្នាក់នេះ ជាអ្នកពេនមួយជើងបានសម្រេច។
កីឡាករ Suarez បានបន្ថែមគ្រាប់បាល់ទី២ ជាមួយនឹងការស៊ុតបាល់ប៉េណាល់ទី ក្រោយបាល់ប៉ះដៃរបស់កីឡាករ Tomas Pina ត្រូវបានប្រទះឃើញនៅក្នុងប្រព័ន្ធវីដេអូជំនួយការអាជ្ញាកណ្តាល VAR ធ្វើឲ្យក្រុម Barcelonaធ្វើដំណើរកាន់តែជិតទៅកាន់ការប្រកាជើងឯក Leagueជាលើកទី២៦របស់ពួកគេ។
លោក Valverde បានដាក់កីឡាករ Messi, Alba និងកីឡាករ Arthur ឲ្យចូលលេងនៅដំណាក់កាលផ្តាច់ព្រ័ត្រនៅក្នុងការប្រកួត ដើម្បីជួយសម្រួលដល់ការប្រកួតរបស់ក្រុម Barcelonaឲ្យកាន់តែល្អប្រសើរជាងនេះ មួយកម្រិតទៀត៕
Source: Kampuchea Thmey Daily
0 Comments