លោកឧត្តមសេនីយ៍ Le Duc Anh ដែលជាបុរសខ្លាំងគណបក្សកុម្មុយនិស្តនិងជាអតីតប្រធានាធិបតីវៀតណាមដែលដឹកនាំការវាយលុកប្រទេសកម្ពុជាហើយឈានទៅដល់ការផ្តួលរំលំរបបខ្មែរក្រហមបានទទួលមរណភាពនៅអាយុ៩៩ឆ្នាំ។ លោក Duc Anh ដែលកើតនៅឆ្នាំ១៩២០បានចំណាយពេលជាច្រើននៃជីវិតរបស់គាត់នៅភាគខាង
ត្បូងប្រទេសវៀតណាមដែលនៅទីនោះគាត់បានចូលរួមក្នុងសង្គ្រាមកុម្មុយនិស្តប្រឆាំងពួកបារាំងហើយបន្ទាប់មកសហរដ្ឋអាមេរិក។ រដ្ឋាភិបាលនិងប្រព័ន្ធផ្សព្វផ្សាយរដ្ឋបានប្រកាសថា លោក Duc Anh បានលាចាកលោកនៅល្ងាចថ្ងៃច័ន្ទបន្ទាប់ពីមានជំងឺរ៉ាំរ៉ៃ។
លោកបានកាន់តំណែងជាប្រធានាធិបតីនៅចន្លោះឆ្នាំ១៩៩២ដល់ឆ្នាំ១៩៩៧ដោយដឹកនាំគណបក្សកុម្មុយនិស្តខណៈប្រទេសវៀតណាមចាប់ផ្តើមធ្វើកំណែទម្រង់ទីផ្សារដែលជំរុញកំណើនសេដ្ឋកិច្ចគួរឲ្យកត់សម្គាល់។នៅឆ្នាំ១៩៩៥ គាត់បានក្លាយ ជាប្រមុខរដ្ឋវៀតណាមដំបូងគេដែលឈានជើងលើទឹកដីសហរដ្ឋអាមេរិកបន្ទាប់ពីសង្គ្រាមវៀតណាមនៅពេលគាត់ចូលរួមខួបលើកទី៥០នៃអង្គការសហប្រជាជាតិក្នុងទីក្រុងញ៉ូយ៉ក។
គាត់បានទទួលការអប់រំនៅអតីតសហភាពសូវៀតនិងខ្វាក់ភ្នែកម្ខាង។ គាត់បានកាន់តំណែងយោធាជាច្រើនអំឡុងសង្គ្រាមវៀតណាម។ គាត់គឺជាមនុស្សម្នាក់ក្នុងក្រុម “អ្នករំដោះសៃហ្គន” ដោយកាន់តំណែងជាមេបញ្ជាការរងនៃក្រុមវាយលុកដែលបានផ្តួលរំលំរដ្ឋាភិបាលវៀតណាមខាងត្បូងដែលគាំទ្រដោយសហរដ្ឋអាមេរិក។គាត់ត្រូវបានគេចងចាំសម្រាប់ការដើរតួនាទីជាមេបញ្ជាការនៅក្នុងការវាយលុកប្រទេសកម្ពុជាដែលបានបណ្តេញរបបខ្មែរក្រហមរបស់ប៉ុលពតឲ្យចេញពីប្រទេសកម្ពុជាក្នុងឆ្នាំ១៩៧៨ដែលជាហេតុធ្វើឲ្យគាត់ទទួលបានរហស្សនាមថា “ខ្លាកម្ពុជា”។ ពិធីបុណ្យសពថ្នាក់រដ្ឋត្រូវបានគេរំពឹងថានឹងប្រារព្ធធ្វើឡើងសម្រាប់គាត់៕ AFP
Source: Kampuchea Thmey Daily
0 Comments