ភ្នំពេញ ៖ អ្នកនាំពាក្យគណបក្សប្រជាជនកម្ពុជា លោក សុខ ឥសាន បានអះអាងថា បច្ចុប្បន្នសន្តិភាពសេរីភាព និងលទ្ធិប្រជាធិបតេយ្យ រកបានមកហើយ ដែលប្រជាជនកម្ពុជាកំពុងរស់នៅប្រកបដោយក្តីសោមនស្សរីករាយ ប៉ុន្តែការរីកចម្រើននេះ មិនត្រូវបានពួកឧទ្ទាមក្រៅច្បាប់ពេញចិត្តឡើយ ហេតុនេះទើបពួកគេរិះរកគ្រប់មធ្យោបាយ ដើម្បីឡើងកាន់អំណាច ក្រោមលេសលទ្ធិប្រជាធិបតេយ្យ និងសិទ្ធិមនុស្ស ដូច្នេះការទាមទាររកលទ្ធិប្រជាធិបតេយ្យ និងសិទ្ធិមនុស្ស វាគ្រាន់តែជាលេស ដើម្បីបានអំណាច ដែលប្រជាជនមិនប្រគល់ឲ្យតែប៉ុណ្ណោះ ហើយការធ្វើបាតុកម្មទាំងឡាយនៅក្រៅប្រទេស គឺដើម្បីបម្រើឧបាយកលដ៏ខ្មៅងងឹតរបស់ពួកគេ។
អ្នកនាំពាក្យគណបក្សប្រជាជនកម្ពុជាលើកឡើងបែបនេះ បន្ទាប់ពីលោក សម រង្ស៊ី និងអ្នកស្ម័គ្រស្មោះមួយចំនួន បាននាំគ្នាធ្វើចលនាទាមទារ និងធ្វើបាតុកម្មជាបន្តបន្ទាប់នៅក្រៅប្រទេស ហើយកាលពីថ្ងៃទី២០ មេសា បានរៀបចំបាតុកម្មមួយនៅប្រទេសកូរ៉េខាងត្បូង ដោយដាក់ឈ្មោះថា បាតុកម្មភ្លើងទៀន។ ដែលបាតុកម្មនោះ ក្រោមការផ្តួចផ្តើមឡើងដោយក្រុមយុវជន ដែលមានទំនោរទៅរកបុគ្គល សម រង្ស៊ី ប៉ុន្តែបាតុកម្មនោះ ត្រូវបានចាត់ទុកថា ជាបាតុកម្ម ដើម្បីបំផ្លាញលទ្ធិប្រជាធិបតេយ្យ និងបំផ្លាញសន្តិភាពនៅកម្ពុជា ពីព្រោះមេដឹកនាំបាតុកម្ម បានស្រែកបំផុសឲ្យមានការបះបោរបំផ្លាញសន្តិភាព និងស្ថិរភាពនយោបាយនៅកម្ពុជា ដើម្បីយកអំណាចរបស់ខ្លួន។
លោក សុខ ឥសាន បានលើកឡើងថា នៅប្រទេសណាក៏ដូចនៅប្រទេសណាដែរ ក្នុងពិភពលោកនេះ។ ប្រជាជននៅប្រទេសនីមួយៗតែងតែមានការតស៊ូ ដើម្បីសេរីភាព រើបម្រាស់ពីការជិះជាន់ ការត្រួតត្រាពីវណ្ណៈសក្ដិភូមិ វណ្ណៈជិះជាន់ត្រួតត្រា។ ដូចនៅប្រទេសកូរ៉េខាងត្បូង ប្រជាជនកូរ៉េ ក៏មានការឈឺចាប់ នឹងការត្រួតត្រារបស់ពួកចក្រព័ត្រអាណានិគមនិយមដែរ ទើបនាំគ្នាងើបឡើងតស៊ូ ដើម្បីសេរីភាព និងលទ្ធិប្រជាធិបតេយ្យ។
ចំណែកនៅប្រទេសកម្ពុជាវិញ លោក សុខ ឥសាន អះអាងថា ដោយសារបានឆ្លងកាត់សង្គ្រាមរ៉ាំរ៉ៃ រាប់ទសវត្សរ៍ និងរបបប្រល័យពូជសាសន៍ ទើបប្រជាជនកម្ពុជា ក្រោមការដឹកនាំរបស់គណបក្សប្រជាជនកម្ពុជា នាំគ្នាងើបឡើងតស៊ូរំដោះប្រទេសជាតិ ឲ្យរួចផុតពីការកាប់សម្លាប់ និងតស៊ូដើម្បីសន្តិភាព សេរីភាព និងលទ្ធិប្រជាធិបតេយ្យរហូតមានកិច្ចព្រមព្រៀងទីក្រុងប៉ារីស ថ្ងៃទី២៣ ខែតុលា ឆ្នាំ១៩៩១ ហើយចាប់ផ្តើមការបោះឆ្នោតតាមលទ្ធិប្រជាធិបតេយ្យ ចាប់ពីឆ្នាំ១៩៩៣មក ដើម្បីបើកឱកាសឲ្យប្រជាជនជ្រើសរើសមេដឹកនាំប្រទេសតាមឆន្ទៈរបស់ខ្លួន។
តាមលោក សុខ ឥសាន “បច្ចុប្បន្ននេះសន្តិភាពសេរីភាព និងលទ្ធិប្រជាធិបតេយ្យរកបានមកហើយ ដែលប្រជាជនកម្ពុជាកំពុងរស់នៅប្រកបដោយក្តីសោមនស្សរីករាយ មានកម្រិតជីវភាពល្អប្រសើរ សេដ្ឋកិច្ចជាតិមានកំណើន៧ភាគរយ ក្នុង១ឆ្នាំ ហើយការអភិវឌ្ឍន៍មានការរីកចម្រើនលើគ្រប់វិស័យគួរឲ្យកត់សម្គាល់។ ប្រជាជនកម្ពុជាទូទាំងប្រទេសកំពុងតែសប្បាយរីករាយចំពោះការរីកចម្រើនរបស់ប្រទេសជាតិ ប៉ុន្តែការរីកចម្រើននេះ របស់ប្រទេសជាតិ មិនត្រូវបានពួកឧទ្ទាមក្រៅច្បាប់ពេញចិត្តឡើយ ដោយសារពួកគេមិនអាចយកឈ្នះលើគណបក្សប្រជាជនកម្ពុជា បានជាង២០ឆ្នាំមកហើយ។ ហេតុនេះ ទើបពួកគេតែងតែរិះរកគ្រប់ឧបាយកល ដើម្បីផ្តួលរំលំគណបក្សប្រជាជនកម្ពុជា និងរាជរដ្ឋាភិបាលកម្ពុជា ស្របច្បាប់ដែលកើតចេញពីការបោះឆ្នោត ក្រោមលេសស្វែងរកលទ្ធិប្រជាធិបតេយ្យ និងសិទ្ធិមនុស្ស”។
លោក សុខ ឥសាន បញ្ជាក់ដែរថា “ការទាមទាររកលទ្ធិប្រជាធិបតេយ្យ និងសិទ្ធិមនុស្សវាគ្រាន់តែជាលេស ដើម្បីបានអំណាច ដែលប្រជាជនមិនប្រគល់ឲ្យតែប៉ុណ្ណោះ។ ដូច្នេះការធ្វើបាតុកម្មទាំងឡាយនៅក្រៅប្រទេស គឺដើម្បីបម្រើឧបាយកលដ៏ខ្មៅងងឹតហ្នឹងឯង”៕
Source: Kampuchea Thmey Daily
0 Comments