ប្រទេសស្រីលង្កាបានចាប់ផ្ដើមថ្ងៃកាន់ទុក្ខថ្នាក់ជាតិនៅថ្ងៃអង្គារជាមួយការស្មឹងស្មាធរយៈពេលបីនាទីដើម្បីគោរពដល់មនុស្សជាង៣០០នាក់ដែលត្រូវបានសម្លាប់នៅក្នុងការបំផ្ទុះគ្រាប់បែកអត្តឃាតដែលគេស្ដីបន្ទោសទៅលើក្រុមឥស្លាមនិយមក្នុងស្រុកមួយ។ទង់ជាតិត្រូវបានបង្ហូតពាក់កណ្ដាលដងនៅលើអគាររដ្ឋាភិបាលហើយប្រជាជនបានឱនក្បាលនិងនឹកឃើញដោយស្ងៀមស្ងាត់ចំពោះអំពើហិង្សាដែលបណ្ដាលឲ្យមានកំហឹងជាអន្តរជាតិ។
ពិធីស្មឹងស្មាធនេះបានចាប់ផ្ដើមនៅម៉ោង៨:៣០ព្រឹកដែល ជាពេលដែលគ្រាប់បែកដំបូងក្នុងចំណោមគ្រាប់បែកទាំងប្រាំមួយគ្រាប់បានផ្ទុះឡើងកាលពីព្រឹកថ្ងៃអាទិត្យដែលបានសម្លាប់រង្គាលមនុស្សនៅសណ្ឋាគារនិងព្រះវិហារដែលពោរពេញទៅដោយអ្នកគោរពបូជាពិធីបុណ្យ Easter។ ភ្លាមៗបន្ទាប់ពីការស្មឹងស្មាធ អ្នកនាំពាក្យប៉ូលិសបាននិយាយថា ចំនួនអ្នកស្លាប់បានកើនឡើងដល់៣១០នាក់ខណៈដែលមនុស្សជាច្រើនបានស្លាប់ដោយសាររបួស។
ពិធីគោរពវិញ្ញាណក្ខន្ធលើកដំបូងសម្រាប់ជនរងគ្រោះត្រូវបានគេគ្រោងទុកនៅថ្ងៃអង្គារពោលគឺប៉ុន្មានម៉ោងបន្ទាប់ពីរដ្ឋាភិបាលប្រកាសដាក់រដ្ឋក្នុងភាពអាសន្ននិងបាននិយាយថា ក្រុមឥស្លាមនិយមមួយគឺស្ថិតនៅពីក្រោយអំពើហិង្សានេះ។នៅវិហារ St Anthony ក្នុងទីក្រុង Colombo ដែលជាកន្លែងមនុស្សជាច្រើននាក់បានស្លាប់ខណៈពេល ពួកគេប្រមូលផ្ដុំគ្នាសម្រាប់ការអធិស្ឋានថ្ងៃអាទិត្យនៃពិធីបុណ្យ Easter, មនុស្សរាប់សិបនាក់បានកាន់ទៀននិងអធិស្ឋានដោយស្ងៀមស្ងាត់។
ប៉ូលិសបាននិយាយថា ឥឡូវនេះ មនុស្សចំនួន៤០នាក់ត្រូវបានចាប់ខ្លួនពាក់ព័ន្ធការវាយប្រហារដោយគ្រាប់បែកអត្តឃាតដែលជាអំពើឃោរឃៅដ៏អាក្រក់បំផុតចាប់តាំងពីសង្គ្រាមស៊ីវិលរបស់ប្រទេសស្រីលង្កាបានបញ្ចប់កាលពី១០ឆ្នាំមុន។ការវាយប្រហារនេះក៏ជារឿងដ៏អាក្រក់បំផុតមិនធ្លាប់មានផងដែរប្រឆាំងនឹងជនជាតិភាគតិចគ្រិស្តសាសនិករបស់ប្រទេសនេះដែលមានចំនួនត្រឹមតែ៧ភាគរយប៉ុណ្ណោះនៃប្រជាជនទាំង២១លាននាក់របស់ខ្លួន។
រដ្ឋមន្ត្រីខុទ្ទកាល័យនិងអ្នកនាំពាក្យរបស់រដ្ឋាភិបាលលោក Rajitha Senaratne បាននិយាយថា ក្រុមអ្នកស៊ើបអង្កេតកំពុងតែស្វែងរកតម្រុយថាតើក្រុមឥស្លាមក្នុងតំបន់ដែលមានឈ្មោះថា National Thowheeth Jama'ath (NTJ) បានទទួលការគាំទ្រពីអន្តរជាតិដែរឬក៏អត់៕ AFP
Source: Kampuchea Thmey Daily
0 Comments