កណ្ដាល ៖ បុរសវ័យជាង៣០ឆ្នាំម្នាក់ បន្ទាប់ពីជាប់ជំពាក់ទៅនឹងថ្នាំញៀនយ៉ាងងប់ងុល ទើបប្រពន្ធដាច់ចិត្តរត់ចោលដោយទុកកូនឲ្យនៅនឹងប្ដីរស់នៅជុំគ្នាជាមួយម្ដាយចាស់អាយុ៦០ឆ្នាំ ប៉ុន្ដែក្នុងរយៈពេលប៉ុន្មានថ្ងៃនេះ កូនប្រុសមានសន្ដានជាសត្វម្នាក់នេះបែរលួងលោមនិងគំរាមម្ដាយបង្កើតរបស់ខ្លួនឯងសុំរួមភេទទៅវិញតែម្ដាយមិនព្រមឡើយ ដោយទ្រាំនិងការនិយាយគំរាមផងលួងលោមផងតទៅទៀតមិនបានព្រោះខ្លាចថ្ងៃណាមួយកូននេះសម្លាប់ម្ដាយចោលទើបស្ដ្រីជាម្ដាយសម្រេចចិត្តប្ដឹងសមត្ថកិច្ចឲ្យចាប់ខ្លួនចាត់ការតាមច្បាប់។
សមត្ថកិច្ចបានចុះទៅចាប់ខ្លួនជនសង្ស័យ កាលពីព្រឹក ថ្ងៃទី២៣ ខែមេសា ឆ្នាំ២០១៩ នៅចំណុចក្នុងផ្ទះជនសង្ស័យ ដែលមានទីតាំងស្ថិតនៅឃុំព្រៃពួច ស្រុកអង្គស្នួល ខេត្តកណ្តាល។ ជនសង្ស័យឈ្មោះប្រាក់ ឡា អាយុ៣៣ឆ្នាំ មុខរបរមិនពិតធ្លាប់មាន ប្រពន្ធ និងមានកូនស្រី២នាក់និង កូនប្រុសម្នាក់។ ចំណែកស្ត្រីជាម្ដាយអាយុ៦០ឆ្នាំ មុខរបរកសិករនៅផ្ទះជាមួយគ្នា។
បើតាមស្ដ្រីជាម្ដាយបានរៀបរាប់ថា កូនប្រុសរបស់គាត់ម្នាក់នេះដោយសារញៀនថ្នាំខ្លាំងពេកត្រូវបានប្រពន្ធរត់ចោលបាត់ដោយទុកកូននៅផ្ទះទាំងអស់ បន្ទាប់ពីប្រពន្ធរត់ចោលកូនប្រុសរបស់គាត់បែរជាមានគំនិតផ្ដេសផ្ដាសមែនទែនហាក់មិនដឹងខុសត្រូវ បែរជាមកលួងលោមសុំគាត់ជាម្ដាយរួមភេទជាមួយទៅវិញ តែគាត់មិនដែលព្រមទេថែមទាំងបានណែនាំកុំឲ្យកូនគិត ធ្វើអីឆ្កួតៗបែបនេះ តែទោះជាគាត់និយាយយ៉ាងណាក៏កូនប្រុសម្នាក់នេះហាក់ស្ដាប់គ្នាមិនបានសោះ។
ប្រភពបន្ដថា បន្ទាប់ពីលួងលោមមិនព្រោះគាត់មិនព្រមបែរមកគំរាមគាត់វិញម្ដង ដោយមិនដឹងជាបានកាំភ្លើងមកពីណាទេយកមកកប់ទុកក្នុងផ្ទះ ដើម្បីទុកគំរាមសម្លាប់គាត់ បើគាត់មិនព្រមរួមភេទជាមួយទេនោះ ដោយទ្រាំនិងពាក្យសម្ដីអសុរសរបៀបសត្វតិរច្ឆានបែបនេះមិនបាន ម្យ៉ាងដោយខ្លាចកូនសម្លាប់ផងនោះ ព្រោះឃើញមានកាំភ្លើងអាកា៤៧កញ្ចាស់១ដើម ទើបគាត់សម្រេចមកប្ដឹងសមត្ថកិច្ចតែម្ដង។
សមត្ថកិច្ចស្រុកអង្គស្នួលបានចុះទៅចាប់ខ្លួនជនសង្ស័យដល់ក្នុងផ្ទះតាមពាក្យបណ្ដឹងរបស់ស្ដ្រីជាម្ដាយ ហើយសួរនាំឈានទៅដល់រកឃើញកាំភ្លើងអាកា១ដើមនោះមែន តែសមត្ថកិច្ចអះអាងថា វាខូចគុណភាពប្រើការលែងកើតទៅហើយ។ តាមចម្លើយសារភាពរបស់បុរសនេះថា ខ្លួនមិនដែលសុំម្ដាយរួមភេទដូចគាត់និយាយនោះទេ ដែលយប់មួយនោះហៅឲ្យគាត់ចុះមកពីលើផ្ទះគឺផ្ដាំឲ្យគាត់ជួយមើលកូនខ្លួនតែប៉ុណ្ណោះ។ ចំណែកកាំភ្លើងនោះខ្លួនរើសបានយូរហើយ ទើបពេលនេះមិនចង់ឲ្យគេឃើញទើបខ្លួនយកវាពីកន្លែងលាក់ចាស់ មកកប់ទុកក្នុងផ្ទះដើម្បីកុំឲ្យអ្នកផ្សេងឃើញតែប៉ុណ្ណោះ។
តែទោះជាជននេះឆ្លើយបដិសេធយ៉ាងណាក៏ដោយ ក៏សមត្ថកិច្ចបានកសាងសំណុំរឿងបញ្ជូនទៅតុលាការដើម្បីចាត់ការជននេះដែរ៕
Source: Kampuchea Thmey Daily
0 Comments