ក្លិបបាល់ទាត់ Hoang Anh Gia Lai សមាជិកពានរង្វាន់លីគកំពូលប្រទេសវៀតណាម (V-League) ដែលលោក Lee Tae Hoon អតីតគ្រូបង្វឹកក្រុមជម្រើសជាតិកម្ពុជា ចូលធ្វើជានាយកបច្ចេកទេសកាលពីចុងឆ្នាំ២០១៨ កន្លងទៅនេះបានសម្រេចតែងតាំងលោកធ្វើជាគ្រូបង្វឹករបស់ក្លិបតែម្តង កាលពីពេលថ្មីៗនេះ។
យោងតាមការបញ្ជាក់របស់សារព័ត៌មានក្នុងស្រុកវៀតណាម លើកឡើងថា ក្លិបHoàng Anh Gia Lai បានប្រកាសកាលនៅថ្ងៃទី២២ ខែមេសា ពីការតែងតាំង លោក Lee Tae Hoon ឲ្យក្លាយជាគ្រូបង្វឹកដឹកនាំក្រុម ជំនួសលោក Dương Minh Ninh ដែលបានផ្ទេរឲ្យទៅកាន់តំណែងផ្សេងវិញ។ លោក Lee Tae Hoon បានលើកឡើងក្រោយពីទទួលភារិកិច្ចថ្មីថា «ខ្ញុំនឹងព្យាយាមឲ្យអស់ពីលទ្ធភាពជាមួយ Hoang Anh Gia Lai ដើម្បីកសាងក្រុមឲ្យមានភាពតែមួយ និងដើម្បីសម្រេចគោលដៅវិវឌ្ឍន៍ក្រុមនៅពេលខាងមុខបន្តទៀត»។
សូមរំលឹកថា លោក Lee ត្រូវបានក្លិប Hoàng Anh Gia Lai សមាជិកពានរង្វាន់លីគកំពូលប្រទេសវៀតណាម តែងតាំងធ្វើជានាយកបច្ចេកទេស ក្នុងកិច្ចសន្យារយៈពេល១ឆ្នាំ។ ដំណើរទៅដល់របស់លោក Lee ត្រូវបានក្លិបចាត់ទុកថាជាការជួយរៀបចំក្រុមឲ្យបានល្អឡើងវិញ ក្រោយក្លិបធ្វើមិនល្អកាលពីរដូវកាលឆ្នាំ២០១៨កន្លងទៅ។ យ៉ាងណាក្តីលោក Lee ជាផ្នែកមួយជួយឲ្យក្រុមវៀតណាម របស់ខ្លួនឈ្នះពានរង្វាន់ BTV Cup 2018 ផងដែរ។
គេនៅចាំថាលោក Lee បោះបង់កៅអីក្នុងក្រុមជម្រើសជាតិកម្ពុជា នៅឆ្នាំ២០១៧ ដោយចេញទៅដឹកនាំក្រុម U15 សាលាបាល់ទាត់ជាតិ តំណែងនេះជំនួសវិញដោយលោក Leonardo Vitorino ម្តង ខណៈក្រុមមកទៀតលោក ប្រាក់ សុវណ្ណារ៉ា ត្រូវបានចូលខ្លួនដឹកនាំបណ្តោះអាសន្នមុនHonda Keisuke មកដល់កាលពីដើមឆ្នាំ។
ចំពោះលោក Lee Tae Hoon ពេលនេះកំពុងកាន់អាជ្ញាប័ណ្ណ AFC Pro License ធ្លាប់បានចុះកិច្ចសន្យាដឹកនាំក្រុមជម្រើសជាតិកម្ពុជា ចំនួន៣លើក មកហើយខណៈលើកដំបូងធ្វើឡើងពីខែ សីហា ឆ្នាំ ២០១០ ដល់ ខែ កក្កដា ឆ្នាំ ២០១២ ហើយលើកទី២ ចាប់ពីថ្ងៃទី១ ខែ សីហា ឆ្នាំ ២០១៣ ដល់ ថ្ងៃទី ៣១ ខែ កក្កដា ឆ្នាំ២០១៥ និង លើកទី៣ នេះចាប់ពីខែ សីហា ឆ្នាំ ២០១៥ ដល់ ធ្នូ ២០១៦។ ក្រោយមកទៀតរហូតមកដល់បច្ចុប្បន្នលោកបានធ្វើជាគ្រូបង្វឹកក្រុមយុវជនថ្នាលក្រោមអាយុ១៥ឆ្នាំ នៅសាលាបាល់ទាត់ជាតិបាទីវិញម្តង មុនចេញទៅវៀតណាម៕
Source: Kampuchea Thmey Daily
0 Comments