ឆ្លងកាត់ប្រកួត៤សប្ដាហ៍មកនេះក្នុងពានរង្វាន់លីគកំពូលកម្ពុជា (Metfone Cambodian League) ឆ្នាំ២០១៩ ដែលរៀបចំឡើងដោយគណៈកម្មការប្រកួតបាល់ទាត់ជាតិកម្ពុជា (CNCC) សេនាធិការរបស់សហព័ន្ធកីឡាបាល់ទាត់កម្ពុជាព្រះខ័នរាជស្វាយរៀង បានស្រវាកៅអីកំពូលតារាងបណ្តោះអាសន្ន ខណៈកីឡាករជនជាតិនីហ្សេរីយ៉ា Dzarma Bata បានឈរកំពូលតារាងអ្នករកគ្រាប់បាល់បញ្ចូលទីបានច្រើនជាងគេ (Top Scorers) បណ្តោះអាសន្នដែរ។
គិតត្រឹមពេលនេះកីឡាករចំនួន៦១នាក់ បានរកគ្រាប់បាល់ទាត់បញ្ចូលទីគ្នាទៅវិញទៅមកចំនួន១០៧គ្រាប់ក្នុងចំនួន៣សប្ដាហ៍មកនេះ។ ចំណែកកីឡាករ Dzarma Bata វិញរកបានគ្រាប់បាល់ចំនួន៩គ្រាប់ម្នាក់ឯង ហើយគ្រាប់បាល់ទាំងនោះបានទាត់បញ្ចូលទីក្រុមជើងឯកឆ្នាំចាស់ណាហ្គាវើល ៣គ្រាប់ ក្រុមខេត្តកំពង់ចាម ៣គ្រាប់និងទាត់ចូលក្រុមអគ្គស្នងការដ្ឋាននគរបាលជាតិ៣គ្រាប់។
ចំណែកកីឡាករដែលរកបានគ្រាប់បាល់តាមពីក្រោយមានដូចជាកីឡាករនីហ្សេរីយ៉ា Okereke Timothy របស់អង្គរថាយហ្គឺរ រកបាន៦គ្រាប់ ខណៈកីឡាករកូឌីវ័រ Abdel Kader Coulibali របស់អាស៊ីអឺរ៉ុបរកបាន៤គ្រាប់ម្នាក់ឯង។ ក្រៅពីនោះគឺរកបានគ្រាប់បាល់២គ្រាប់ចុះក្រោម។
សូមបញ្ជាក់ថា កីឡាករ Bata បានធ្វើដំណើរមកដល់ប្រទេសកម្ពុជា ដំបូងនៅឆ្នាំ២០១៤ ដោយចុះកិច្ចសន្យា១រដូវកាលជាមួយក្រុមព្រះខ័នរាជស្វាយរៀង ហើយនៅឆ្នាំនោះបានរកគ្រាប់បាល់ច្រើនជាងគេហើយឈ្នះស្បែកជើងមាសថែមទៀតផង។ នៅឆ្នាំ២០១៥ គេបន្តលេងជាមួយព្រះខ័នរាជស្វាយរៀង ទៀតដោយរកគ្រាប់បាល់បាន២៤គ្រាប់ ខណៈឆ្នាំនោះស្បែកជើងមាសបានទៅ ចាន់ វឌ្ឍនាកា ដែលរកបាន៣៧គ្រាប់ម្នាក់ឯង។ នៅឆ្នាំ២០១៦ រូបគេបានចូលរួមជាមួយក្រុមបឹងកេតអែហ្វស៊ី ពេញមួយរដូវកាល ដោយបានជួយក្រុមទាំងក្នុងពានរង្វាន់លីគកំពូលកម្ពុជា, AFC Cup និងពានរង្វាន់ Toyota Mekong Club Championship ជាដើម។ តែដល់ឆ្នាំ២០១៧ រូបគេបានផ្លាស់ទៅលេងក្រុមអាស៊ីអឺរ៉ុប ក្នុងជើងទី១ មុនចេញទៅចូលរួមជាមួយក្រុមខេមបូឌានថាយហ្គឺរ (អង្គរថាយហ្គឺរ បច្ចុប្បន្ន) ក្នុងជើងទី២។ ចូលឆ្នាំ២០១៧ រូបគេចូលរួមជាមួយក្រុមសូលទីឡូអង្គរ វិញម្តង។
ក្រោយបញ្ចប់រដូវកាលឆ្នាំ២០១៩ នេះទៅកីឡាករដែលរកគ្រាប់បាល់ច្រើនជាងគេបង្អស់ នោះគណៈកម្មការរៀបចំការប្រកួតនឹងប្រគល់ពានរង្វាន់ (ឬហៅថាស្បែកជើងមាស) ព្រមទាំងថវិកាលើកទឹកចិត្តចំនួន១.៥០០,០០០៛។ កីឡាករជនជាតិនីហ្សេរីយ៉ា George Bisan អតីតសមាជិកនៅក្លិបណាហ្គាវើល បច្ចុប្បន្នជាម្ចាស់ស្បែកជើងមាសឆ្នាំចាស់២០១៨ កន្លងទៅ៕
Source: Kampuchea Thmey Daily
0 Comments