ប្រជាពលរដ្ឋសេះស្លាប់ ទទួលបានផ្លូវលំ១ខ្សែ និងប្រឡាយទឹក១ខ្សែ ដើម្បីសម្រួលការដំណើរ ទាំងផ្លូវទឹក និងផ្លូវគោក បន្ទាប់ពីបម្លាស់ទីផ្ទះបណ្តែតទឹកមករស់នៅលើគោក

កំពង់ឆ្នាំង ៖ ដោយមានការយកចិត្តទុកដាក់គិតគូររបស់ប្រមុខរាជរដ្ឋាភិបាល ចំពោះប្រជាពលរដ្ឋរស់នៅក្នុងភូមិសេះស្លាប់ ដែលបានបន្លាស់ទីផ្ទះបណ្ដែតទឹក មករស់នៅលើគោក ថ្មីៗនេះ សម្ដេចចៅហ្វាវាំង គង់ សំអុល ឧបនាយករដ្ឋមន្ត្រី រដ្ឋមន្ត្រីព្រះបរមរាជវាំង និងជាប្រធានក្រុមការងារថ្នាក់ជាតិចុះជួយខេត្តកំពង់ឆ្នាំង បានដឹកនាំក្រុមការងារសម្ដេចឪ ចុះមកជួយកសាងផ្លូវមួយខ្សែ និងប្រឡាយទឹកមួយខ្សែ ដើម្បីសម្រួលដល់ការដំណើរ ជូនប្រជាពលរដ្ឋនៅតំបន់នោះ ទាំងផ្លូវគោក និងផ្លូវទឹក ឲ្យល្អប្រសើរឡើង។

លោក សាំង ស៊ន មេឃុំឆ្នុកទ្រូ នៅព្រឹកថ្ងៃទី២៣មេសានេះ បានឲ្យដឹងថា ក្រោយពីមានសំណូមពររបស់ប្រជាពលរដ្ឋតាមរយៈប្រព័ន្ធផ្សព្វផ្សាយកន្លងមក ពេលនេះក្រុមការងារសម្ដេចឪ ដែលដឹកនាំដោយសម្ដេចចៅហ្វាវាំង គង់ សំអុល ឧបនាយករដ្ឋមន្ត្រី រដ្ឋមន្ត្រីក្រសួងព្រះបរមរាជវាំង និងជាប្រធានក្រុមការងារថ្នាក់ជាតិចុះជួយខេត្តកំពង់ឆ្នាំង បានចុះជួយកសាងផ្លូវមួយខ្សែ និង ប្រឡាយទឹកមួយខ្សែ សម្រាប់សម្រួលដំណើរដល់ជូនបងប្អូនប្រជាពលរដ្ឋដែលផ្លាស់ទីផ្ទះបណ្ដែតទឹកមករស់នៅលើទឹកឲ្យមករស់នៅលើគោកវិញ ។

លោកមេឃុំបានបញ្ជាក់ថា ចំពោះប្រឡាយទឹកមួយខ្សែដែលកំពុងជីកចេញពីមាត់ទន្លេ ចូលមកដល់ភូមិ ដែលប្រជាពលរដ្ឋ តាំងទីលំនៅថ្មី គឺមានប្រវែងជាង៣គីឡូម៉ែត្រ មានទទឹងមាត់លើមានប្រវែង ១២ម៉ែត្រ។ ប្រឡាយទឹកនេះ អាចសម្រួលឲ្យទូកកាណូតពួកគាត់ចូលមកពីទន្លេ មកជិតភូមិ និងជិតផ្ទះរបស់ពួកគាត់ និងក៏អាចជួយឲ្យមានទឹកដល់ពួកគាត់បានប្រើប្រាស់ផង។ ដោយឡែកផ្លូវមួយខ្សែ មានប្រវែង៧គីឡូម៉ែត្រ ជាផ្លូវដីស បាននិងកំពុងកសាងចាប់ពីថ្នល់ជាតិលេខ៥ រហូតដល់ភូមិស្លាប់ជាង៣គីឡូម៉ែត្រ ផងដែរ ស្របតាមមាត់ប្រឡាយជីកថ្មី ចាប់ពីកន្លែងលំនៅថ្មី រហូតដល់មាត់ទន្លេ។

ក្នុងនាមលោកមេឃុំ ជាអាជ្ញាធរ ឃុំឆ្នុកទ្រូ សូមថ្លែងអំណរគុណដល់សម្ដេចចៅហ្វាវាំង គង់ សំអុល ដែលបានដឹកនាំក្រុមការងារសម្ដេចឪ ចុះមកជួយជីកប្រឡាយនិង កសាងផ្លូវមួយខ្សែជូនដល់ប្រជាពលរដ្ឋ អ្នកបន្លាស់ទីផ្ទះបណ្ដែតទឹក នៅភូមិសេះស្លាប់ ដើម្បីសម្រួលការធ្វើដំណើររបស់ពួកគាត់ទាំងផ្លូវទឹក និងផ្លូវគោក។

សូមបញ្ជាក់ថា ចាប់តាំងពីអាជ្ញាធរខេត្តរៀបចំការផ្លាស់ទីផ្ទះបណ្ដែតទឹក ឲ្យមកនៅលើគោក ប្រជាពលរដ្ឋមានការជួបការលំបាកយ៉ាងខ្លាំង ពីដំបូង ប៉ុន្តែមកដល់ពេលនេះបានធូរស្រាលជាបណ្ដើរហើយ គឺមានផ្លូវទឹក ផ្លូវគោក និងមានអណ្ដូងទឹក ផងដែរ។

ប្រជាពលរដ្ឋ សូមថ្លែងអំណរគុណយ៉ាងជ្រាលជ្រៅដល់ព្រះមហាក្សត្រ សម្ដេច គង់ សំអុល ដែលបានជួយដោះស្រាយការលំបាករបស់ប្រជាពលរដ្ឋ ដោយសូមជូនពរដល់សម្តេច គង់ សំអុល និងក្រុមការងារទាំងអស់ សូមជួបប្រទះតែនឹងពុទ្ធពរទាំង៤ប្រការ គឺអាយុ វណ្ណៈ សុខៈ ពលៈ កុំបីឃ្លាតឡើយ៕