ភ្នំពេញ ៖ សមត្ថកិច្ចនគរបាលខណ្ឌសែនសុខ បានចាប់ខ្លួនយុវជនក្មេងៗចំនួន៣នាក់ និងដកហូតម៉ូតូ២គ្រឿង កាលពីល្ងាចថ្ងៃទី២៣ ខែមេសា ឆ្នាំ២០១៩ ពាក់ព័ន្ធក្នុងការចូលរួមធ្វើសកម្មភាពឆក់ទូរស័ព្ទគេតាមដងផ្លូវសាធារណៈកន្លងមក ដែលមានបក្ខពួកទាំងអស់៦នាក់ប្រព្រឹត្តកាលពីរសៀលថ្ងៃ១៧ ខែមេសា ឆ្នាំ២០១៩ នៅចំណុចមុខផ្សារ រីករាយ សង្កាត់គោកឃ្លាង ខណ្ឌសែនសុខ។
ក្រុមជនសង្ស័យចំនួន៣នាក់ដែលត្រូវបានចាប់ខ្លួនខាងលើ ១.ឈ្មោះ ហម ឆដា ភេទប្រុសអាយុ១៨ឆ្នាំ គ្មានមុខរបរ ស្នាក់នៅភូមិគោកឃ្លាង សង្កាត់គោកឃ្លាង ខណ្ឌសែនសុខ។ ២. ឈ្មោះ សុខ រតនៈ ភេទប្រុសអាយុ១៧ឆ្នាំ មុខរបរមិនពិតប្រាកដ ស្នាក់នៅភូមិគោកឃ្លាង សង្កាត់គោកឃ្លាង ខណ្ឌសែនសុខ។៣.ឈ្មោះ ជា ណារាជ្យ ភេទប្រុសអាយុ១៦ឆ្នាំ គ្មានមុខរបរស្នាក់នៅ ភូមិវិមានទ្រុង សង្កាត់ក្រាំងធ្នង់ ខណ្ឌសែនសុខ។
ជនរងគ្រោះ មិនស្គាល់ភិនភាគទៅបាត់ក្រោយកើតហេតុ។ សម្ភារៈបាត់បង់ ៖ ទូរស័ព្ទដៃ០១គ្រឿង ម៉ាកអាយហ្វូន ។ សម្ភារៈបន្សល់ទុក ៖ ម៉ូតូ០២គ្រឿង (១-ម៉ូតូម៉ាក សេ១២៥ ០១គ្រឿង ពណ៌ខ្មៅ ផលិតឆ្នាំ២០១៧ ពាក់ស្លាកលេខ ភ្នំពេញ1GG-0048 និងម៉ូតូម៉ាកនិក ពណ៌សលាយក្រហម ផលិតឆ្នាំ២០១៩ គ្មានស្លាកលេខ។
ប៉ូលិសនិយាយថា ៖ មុនពេលកើតហេតុថ្ងៃទី២៣ ខែមេសា ឆ្នាំ២០១៩ នៅម៉ោង១យប់ កម្លាំងល្បាតរបស់អធិការដ្ឋាននគរបាលខណ្ឌសែនសុខ បានធ្វើការល្បាត ដល់ចំណុចផ្ទះសំណាក់មុន្នីពេជ្រ ជាប់ផ្លូវលេខ២០១១ ភូមិគោកឃ្លាង សង្កាត់គោកឃ្លាង ខណ្ឌសែនសុខ បានជួបជនសង្ស័យមួយក្រុមខាងលើមានគ្នា៣នាក់កំពុងតែឈរ ដោយមានការសង្ស័យកម្លាំងល្បាតយើងបានហៅជនសង្ស័យទាំងនោះឲ្យឈប់ដើម្បីត្រួតពិនិត្យនាំយកទៅប៉ុស្តិ៍ដើម្បីសួរនាំ។
នៅពេលសួរនាំក្រុមជនសង្ស័យបានសារភាពថា៖ ពួកខ្លួនធ្លាប់បានធ្វើសកម្មភាពឆក់យកទូរស័ព្ទដៃ ពីមនុស្សស្រីម្នាក់ កំពុងជិះម៉ូតូម៉ាកស្កូពីតាមផ្លូវ២០១១នៅម្ដុំមុខផ្សាររីករាយ សង្កាត់គោកឃ្លាង កាលពីថ្ងៃទី១៧ ខែមេសា ឆ្នាំ២០១៩ នៅម៉ោងប្រហែល១ រសៀល ដែលមានបក្ខពួកទាំងអស់ចំនួន៦នាក់។ ក្រោយពីឆក់ទូរស័ព្ទដៃគេបានសម្រេចហើយ ពួកខ្លួនបានជិះម៉ូតូគេច យកទូរស័ព្ទដែលឆក់បានម៉ាកអាយហ្វូចផ្លឺសយកទៅលក់ចែកលុយគ្នាចាយអស់ហើយ។
ពួកគេបានបានសារភាពថា ឈ្មោះ ជា ណារាជ្យ ជាអ្នកបើកម៉ូតូ ហើយឈ្មោះ អូ គេចខ្លួន ជាអ្នកឆក់ យកទូរស័ព្ទពីក្នុងឃ្លុបជាប់កម៉ូតូដែលជនរងគ្រោះកំពុងជិះ។ បក្ខពួកគេ៣នាក់ទៀតដែលគេចខ្លួននោះមានឈ្មោះ មឿន សុធារ៉ា ឈ្មោះ អូ និងឈ្មោះ គីនីន។ អំពើឆក់យកទ្រព្យសម្បត្តិគេនៅតាមផ្លូវសាធារណៈ ត្រូវបានតុលាការសម្រេចបន្ថែមទោសកំហុសក្នុងករណីឆក់នេះថាជាទោសឧក្រិដ្ឋស្មើទោសសម្លាប់មនុស្សដោយសារតែកន្លងមកមានជនរងគ្រោះបានដួលធ្លាក់ពីលើម៉ូតូស្លាប់ជាច្រើននាក់ដោយសារតែទង្វើរបស់ក្រុម ចោរឆក់បែបនេះ៕
Source: Kampuchea Thmey Daily
0 Comments