ភ្នំពេញ ៖ រថយន្តសាំយ៉ុងមួយគ្រឿង បើកក្នុងល្បឿនលឿនជ្រុលទៅបុករបាំងថ្មចែកទ្រូងផ្លូវ ទាំងកំរោលពេញមួយ ទំហឹង បណ្តាល ខ្ទេចទាំងរថយន្តខ្ទេចទាំងថ្ម ទៅមុខលែងរួច តែសំណាងល្អមិនបណ្ដាលឲ្យមនុស្សរងរបួសនោះទេ។
គ្រោះថ្នាក់នេះ បានកើតឡើងកាលពីវេលាម៉ោង៣និង៣៥នាទីទៀបភ្លឺឈានចូលថ្ងៃពុធ ទី២៤ ខែមេសា ឆ្នាំ២០១៩ (ត្រង់ចំណុចស្តុបមុខស្ថានទូតវៀតណាម) លើកំណាត់ផ្លូវព្រះមុនីវង្ស ស្ថិតក្នុងសង្កាត់បឹងត្របែក ខណ្ឌចំការមន រាជធានីភ្នំពេញ។
បើតាមសាក្សីបាននិយាយឲ្យដឹងថា នៅមុនពេលកើតហេតុ គេឃើញបុរសម្នាក់ បើករថយន្តសាំយ៉ុងមួយគ្រឿង ពណ៌ស ពាក់ស្លាកលេខភ្នំពេញ 2Y-2027 ធ្វើដំណើរតាមបណ្ដោយផ្លូវ ព្រះមុនីវង្ស ទិសដៅ ពីជើងទៅត្បូង ក្នុងល្បឿនលឿន និងមានដឹកទំនិញពេញលើរថយន្ត (មានទូរទស្សន៍, ម៉ាស៊ីនព្រីន, កង្ហារ, ចង្ក្រានហ្គាស) បានជ្រុលចង្កូតទៅបុកទ្រូងផ្លូវ បណ្តាលឲ្យរងការខូចខាតបាក់អស់ចំនួន៣កង់ ចំណែកឯរថយន្តរងការ ខូចខាតផ្នែកខាងមុខយ៉ាងដំណំ កល់ជាប់របាំងថ្មបើកទៅមុខលែងរួច និងហូរប្រេងម៉ាស៊ីនពេញផ្លូវ តែសំណាងល្អមិនបណ្ដាលឲ្យមនុស្សរងរបួសនោះទេ ក្រោយកើតហេតុតៃកុង បានចុះពីលើរថយន្តគេចខ្លួនបាត់ មុនសមត្ថកិច្ចមកដល់។
ក្រោយពីកើតហេតុ សមត្ថកិច្ចជំនាញ ចុះមកវាស់វែង និងយករថយន្តបង្កទៅ រក្សាទុកបណ្ដោះអាសន្ន នៅការិយាល័យចរាចរណ៍ជើងគោក នៃស្នងការដ្ឋាននគរបាលរាជធានីភ្នំពេញ ដើម្បីរង់ចាំទាក់ទងម្ចាស់រថយន្តឲ្យចូល ខ្លួនមកធ្វើការដោះស្រាយ៕
Source: Kampuchea Thmey Daily
0 Comments