ភ្នំពេញ ៖ ឯកឧត្ដមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាជាតិគាំពារសង្គម កាលពីថ្ងៃទី២៣ ខែមេសា ឆ្នាំ២០១៩ បានដឹកនាំកិច្ចប្រជុំក្រុមប្រឹក្សាជាតិគាំពារសង្គមលើកទី២ ដោយមានការអញ្ជើញចូលរួមពីថ្នាក់ដឹកនាំជាន់ខ្ពស់ និងមន្ត្រីបច្ចេកទេសមកពីក្រសួង-ស្ថាប័នពាក់ព័ន្ធនានា ដើម្បីពិនិត្យ និងពិភាក្សាលើរបៀបវារៈចំនួន៤។
របៀបវារៈចំនួន៤នោះរួមមាន ទី១. វឌ្ឍនភាពការងាររបស់បេឡាជាតិរបបសន្តិសុខសង្គម (ប.ស.ស.) គិតត្រឹមឆមាសទី១ឆ្នាំ២០១៩។ ទី២. ការរៀបចំសេចក្ដីព្រាងច្បាប់ ស្ដីពីរបបសន្តិសុខសង្គម។ ទី៣. កម្មវិធីការឧបត្ថម្ភសាច់ប្រាក់ជូនស្រីមានផ្ទៃពោះ និងកុមារអាយុក្រោម២ឆ្នាំ។ ទី៤. វឌ្ឍនភាព នៃការអនុវត្តការងារផ្សេងទៀត។
សេចក្ដីប្រកាសព័ត៌មានពីលទ្ធផល នៃកិច្ចប្រជុំបានឲ្យដឹងថា របបសន្តិសុខសង្គមផ្នែកថែទាំសុខភាព បានគ្របដណ្ដប់ប្រជាជនចំនួន២.០២៤.៣៤០នាក់ ដោយរួមបញ្ចូលទាំងកម្មករ និយោជិត អតីតមន្ត្រីរាជការ និងអតីតយុទ្ធជន។ ក្នុងការអនុវត្តរបបនេះ ប.ស.ស. បានចុះកិច្ចព្រមព្រៀងជាមួយមូលដ្ឋានសុខាភិបាលទូទាំង២៥រាជធានី-ខេត្ត ចំនួន១.៣៣៥ (ក្នុងនោះមាន មន្ទីរពេទ្យថ្នាក់ជាតិ៥, មន្ទីរពេទ្យបង្អែក១០៩, មណ្ឌលសុខភាព១.១៧៨ និងគ្លីនិកឯកជន ៤៣) ដើម្បីបង្ខិតសេវាឲ្យកាន់តែ កៀកដល់សមាជិក ប.ស.ស។ ជាមួយគ្នានោះ ប.ស.ស. ក៏បានអនុវត្តរបបសន្តិសុខសង្គម ផ្នែកហានិភ័យការងារសម្រាប់វិស័យឯកជនផងដែរ ដោយសម្រេចបានការចុះបញ្ជីសហគ្រាសចំនួន១.៣០៩ ក្នុងនោះមានកម្មករនិយោជិតចំនួន ១.៧១២.០៣៤នាក់។
ចំណែកការផ្តល់ប្រាក់ឧបត្ថម្ភសម្រាប់កម្មការិនីសម្រាលកូន នៅឆ្នាំ២០១៨ ប.ស.ស បានឧបត្ថម្ភសាច់ប្រាក់ សម្រាប់កម្មការីសម្រាលកូនមានចំនួន៦៥.៨៨៤នាក់ ដែលមានកូនចំនួន ៦៥.៩៦៥ នាក់ ។ ក្នុងត្រីមាសទី១ ឆ្នាំ២០១៩ កម្មការិនីចំនួន១៩.១០២នាក់ ក៏បានសម្រាលកូនដោយទទួលបានប្រាក់ឧបត្ថម្ភនេះដែរ។
ទាក់ទងបញ្ហានេះ ក្រុមប្រឹក្សាជាតិគាំពារសង្គម ក៏បានអនុម័តផងដែរ លើ “សេចក្ដីព្រាងច្បាប់ ស្តីពីរបបសន្តិសុខសង្គម” និង បានប្រគល់ ភារកិច្ចជូនក្រសួងការងារ និងបណ្ដុះបណ្ដាលវិជ្ជាជីវៈ ដើម្បីបំពេញនីតិវិធីបន្ត។ សេចក្ដីព្រាងច្បាប់នេះមានគោលដៅចម្បង គឺការដាក់ឲ្យដំណើរការរបបសោធនសម្រាប់បុគ្គលទាំងឡាយ ដែលស្ថិតនៅក្រោមបទប្បញ្ញត្តិ នៃច្បាប់ស្ដីពីការងារ ដោយរួមបញ្ចូលបុគ្គលិកធ្វើការតាមផ្លូវអាកាស និងនាវាសមុទ្រជាដើម និងបានធ្វើសមាហរណកម្មរបបសោធនសម្រាប់ និយោជិត នៃវិស័យសាធារណៈឲ្យស្ថិតក្នុងប្រព័ន្ធតែមួយ។
សេចក្ដីព្រាងច្បាប់នេះ ក៏កំណត់ផងដែរ នូវក្របខ័ណ្ឌអភិបាលកិច្ចថ្មីដែលរួមមាន កម្រិតគោលនយោបាយ កម្រិត និយ័តករ និងប្រតិបត្តិករស្របទៅតាមក្របខណ្ឌគោលនយោបាយជាតិគាំពារសង្គម ២០១៦-២០២៥។
ដោយឡែក កម្មវិធីឧបត្ថម្ភសាច់ប្រាក់ជូនស្ត្រីមានផ្ទៃពោះ និងកុមារអាយុក្រោម២ឆ្នាំ គឺផ្តោតការយកចិត្តទុកដាក់ជាបឋម លើស្ត្រីមានផ្ទៃពោះ នៃគ្រួសារក្រីក្រ ដែលមានប័ណ្ណសមធម៌ និងស្ត្រីមានផ្ទៃពោះក្រីក្រ ដែលកាន់ប័ណ្ណ Post-ID របស់ក្រសួងសុខាភិបាល ទោះបីជាស្ត្រីទាំងនោះជាកម្មករនិយោជិតក៏ដោយ។ កម្មវិធីនេះគ្រោង នឹងដាក់ឲ្យដំណើរការនៅក្នុងខែមិថុនា ខាងមុខ។
ជាមួយលទ្ធផលខាងលើនេះ កិច្ចប្រជុំក៏បានពិភាក្សា និងសម្រេចជាគោលការណ៍លើការផ្តល់ប្រាក់ឧបត្ថម្ភដល់ស្រីមានផ្ទៃពោះ និងកុមារ អាយុក្រោម២ឆ្នាំ ដែលត្រូវភ្ជាប់ទៅនឹងលក្ខខណ្ឌ នៃការមកទទួលសេវាសុខភាពនៅតាមមូលដ្ឋានសុខាភិបាលផងដែរ ក្នុងគោលបំណងក្នុងការលើកកម្ពស់អាហារូបត្ថម្ភរបស់កុមារក្នុងគ្រួសារក្រីក្រ សំដៅជំរុញការលូតលាស់ទាំងកាយសម្បទា និងបញ្ញាស្មារតី ។ ការឧបត្ថម្ភនេះ ធ្វើឡើងជា៣ដំណាក់កាល គឺដំណាក់កាលទី១, ផ្តល់ការឧបត្ថម្ភចំនួន៤០.០០០ រៀលក្នុង១ដង សម្រាប់ការមកទទួលសេវាពិនិត្យផ្ទៃពោះចំនួន៤ដង មុនពេលសម្រាលកូន ដំណាក់កាលទី២, ផ្តល់ការឧបត្ថម្ភចំនួន២០០.០០០ រៀលក្នុង១ដងគត់ នៅពេលសម្រាលកូន ដំណាក់កាលទី៣, ផ្តល់ការឧបត្ថម្ភចំនួន៤០.០០០រៀលក្នុង១ដង នៅពេលមកទទួលសេវាពិនិត្យសុខភាពក្រោយពេលសម្រាលចំនួន០៤ដង និងចំនួន០៦ដង ចុងក្រោយ សម្រាប់ការនាំកូនមកចាក់ថ្នាំបង្ការក្នុង០១លើកៗ រហូតដល់អាយុ២ឆ្នាំ។
នៅក្នុងកិច្ចប្រជុំនោះ ក្រុមប្រឹក្សាជាតិគាំពារសង្គម ក៏បានពិភាក្សាអំពីវឌ្ឍនភាពក្នុងឆ្នាំ២០១៨ នៃការអនុវត្តក្របខ័ណ្ឌគោលនយោបាយជាតិគាំពារសង្គម២០១៦-២០២៥ និងទិសដៅសម្រាប់សកម្មភាពបន្ត ក្នុងការអនុវត្តកម្មវិធីជំនួយសង្គម កម្មវិធី សន្តិសុខសង្គម និងការធ្វើសុខុដុមនីយកម្មប្រព័ន្ធចុះបញ្ជី និងគ្រប់គ្រងទិន្នន័យគាំពារសង្គមដែលត្រូវមានសង្គតភាពជាមួយប្រព័ន្ធទិន្នន័យអត្តសញ្ញាណកម្មជាតិ។ កិច្ចប្រជុំ ក៏បានពិភាក្សាអំពីយន្តការក្នុងការសម្របសម្រួលរវាងរាជរដ្ឋាភិបាល និងដៃគូអភិវឌ្ឍន៍លើវិស័យ គាំពារសង្គម និងការរៀបចំយន្តការត្រួតពិនិត្យ និងវាយតម្លៃក្របខ័ណ្ឌជាតិគាំពារសង្គម ក៏ដូចជាបានកំណត់នូវផែនការ សកម្មភាពដែលត្រូវអនុវត្តបន្តក្នុងឆ្នាំ២០១៩-២០២០ផងដែរ៕
Source: Kampuchea Thmey Daily
0 Comments