ភ្នំពេញ ៖ គិតត្រឹមថ្ងៃទី២៣ ខែមេសា ឆ្នាំ២០១៩ ក្នុងដំណាក់កាលបិទផ្សាយបញ្ជីបោះឆ្នោតដំបូង គណៈកម្មការរាជធានី ខេត្តរៀបចំការបោះឆ្នោត (គធ.ខប) ពុំបានទទួលពាក្យបណ្ដឹងជំទាស់ឡើយ ប៉ុន្តែទទួលពាក្យបណ្ដឹងតវ៉ាចំនួន១បណ្ដឹង នេះបើតាមការបញ្ជាក់ពី គ.ជ.ប ហើយបណ្ដឹងតវ៉ានោះ គឺជាបណ្តឹងសុំកែតម្រូវទិន្នន័យក្នុងបញ្ជីបោះឆ្នោត ស្ថិតក្នុងឃុំតាប៉ុន ស្រុកសង្កែ ខេត្តបាត់ដំបង ហើយគណៈកម្មការរាជធានី ខេត្តរៀបចំការបោះឆ្នោត (គធ.ខប) កំពុងដោះស្រាយ។
ការដាក់ ការទទួល និងការដោះស្រាយពាក្យបណ្តឹងទាក់ទងទៅនឹងបញ្ជីឆ្នោតដំបូង មានរយៈពេល១៩ថ្ងៃ (លើកលែងថ្ងៃបុណ្យផ្លូវការ១ថ្ងៃ) ចាប់ពីថ្ងៃទី២២ ខែមេសា ដល់ថ្ងៃទី១០ ខែឧសភា ឆ្នាំ២០១៩ ដំណាក់កាលនីមួយៗនៃបណ្តឹងរួមមាន ទី១- ការប្តឹងទៅ គធ.ខប ក្នុងរយៈពេល៥ថ្ងៃ បន្ទាប់ពីថ្ងៃបិទផ្សាយបញ្ជីបោះឆ្នោតដំបូង ចាប់ពីថ្ងៃទី២២ ដល់ថ្ងៃទី២៦ ខែមេសា ឆ្នាំ២០១៩ ទី២- ការដោះស្រាយពាក្យបណ្តឹងដោយ គធ.ខប ក្នុងរយៈពេល ៣ថ្ងៃ បន្ទាប់ពីថ្ងៃប្តឹង ចាប់ពីថ្ងៃទី២៧ ដល់ ថ្ងៃទី២៩ ខែមេសា ឆ្នាំ២០១៩ ទី៣- ការប្តឹងទៅ គ.ជ.ប ក្នុងរយៈពេល ៥ថ្ងៃ បន្ទាប់ពីថ្ងៃ គធ.ខប បដិសេធ (ឈប់បុណ្យ ១ថ្ងៃ) ចាប់ពីថ្ងៃទី៣០ ខែមេសា ដល់ថ្ងៃទី៥ ខែឧសភា ឆ្នាំ២០១៩ ទី៤- ការដោះស្រាយពាក្យបណ្តឹងដោយ គ.ជ.ប ក្នុងរយៈពេល ៥ថ្ងៃ បន្ទាប់ពីថ្ងៃប្តឹង ចាប់ពីថ្ងៃទី៦ ដល់ ថ្ងៃទី១០ ខែឧសភា ឆ្នាំ២០១៩។
សូមជម្រាបជូនថា កាលពីថ្ងៃទី២១ ខែមេសា ឆ្នាំ២០១៩ គ.ជ.ប បានបិទផ្សាយបញ្ជីបោះឆ្នោតដំបូង ព្រមៗគ្នានៅទូទាំងប្រទេស តាមលេខាធិការដ្ឋានគណៈកម្មការរាជធានី ខេត្តរៀបចំការបោះឆ្នោត និងនៅទីកន្លែងប្រជុំជនចំនួន៣ ទីតាំងផ្សេងគ្នាក្នុងរាជធានី ខេត្ត នីមួយៗរួចរាល់ជាស្ថាពរហើយ។
ការបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សាខណ្ឌ អាណត្តិទី៣ ឆ្នាំ៣០១៩ នឹងប្រព្រឹត្តទៅនៅថ្ងៃអាទិត្យទី២៦ ខែឧសភា ឆ្នាំ២០១៩ ហើយលោក ឌុច សុន សមាជិកគណៈកម្មាធិការជាតិរៀបចំការបោះឆ្នោត (គ.ជ.ប) ធ្លាប់បានអះអាងថា ជនណាក៏ដោយ ឬតំណាង មានសិទ្ធិប្ដឹងតវ៉ា និងប្ដឹងជំទាស់ជាលាយលក្ខណ៍អក្សរ ទាក់ទងនឹងបញ្ជីបោះឆ្នោតដំបូងទៅ គធ.ខប ឬ គ.ជ.ប ហើយពាក្យបណ្ដឹងត្រូវធ្វើឡើងជាលាយលក្ខណ៍អក្សរ ប៉ុន្តែពាក្យបណ្ដឹងអនាមិកពុំត្រូវបានចាត់ទុកជាពាក្យប្ដឹងស្របច្បាប់ និងមិនត្រូវលើកយកមកដោះស្រាយឡើយ៕
Source: Kampuchea Thmey Daily
0 Comments