បាត់ដំបង ៖ ជនរងគ្រោះចំនួន២នាក់ ដែលម្នាក់ជាថៅកែផ្លែឈើ និងម្នាក់ទៀតគឺជាអ្នកបើកបរ បានស្លាប់ភ្លាមៗទាំងអស់គ្នានៅនឹងកន្លែងកើតហេតុ ខណៈដែលអ្នកទាំង២ វិលត្រឡប់ទាំងយប់ទៅកាន់ខ្សែបន្ទាត់ព្រំដែនថៃ ក្នុងគោលបំណងនាំផ្លែឈើទាំងនេះចូលទៅកាន់ទឹកដីថៃ។
យោងតាមការអះអាងពី លោក ជា វណ្ឌី អធិការរង នគរបាលស្រុកសង្កែ ទទួលផែនសណ្ដាប់ធ្នាប់ បានលើកឡើងថា ហេតុការណ៍នេះបានកើតឡើង នៅថ្ងៃទី២៥ ខែមេសា ឆ្នាំ២០១៩ វេលាម៉ោង៤ និង២០នាទីទៀបភ្លឺ(លើកំណាត់ផ្លូវជាតិលេខ៥ ត្រង់បង្គោល គីឡូម៉ែត្រ២៧០) ក្នុងភូមិ អូសទូក ឃុំកំពង់ព្រៀង ស្រុកសង្កែ ខេត្តបាត់ដំបង។
នៅក្នុង ករណីនេះដែរ គឺជាគ្រោះថ្នាក់ចរាចរណ៍មួយ ដែលបានកើតឡើងដោយសារតែ អ្នកបើកបរស្ថិតក្នុងស្ថានភាពងងុយដេក ទើបបណ្តាលឲ្យរេចង្កូត ធ្លាក់ចេញពីផ្លូវទៅបុកនឹងដើមចាន់គីរី ដែល រថយន្តនេះម៉ាកតូរីស ពណ៌ស ពាក់ស្លាកលេខភ្នំពេញ២x០៥៧០ ក្នុងទិសដៅពីកើតទៅលិច។
លោកអធិការរងបានបន្តថា នៅក្នុងហេតុការណ៍នេះក៏មនាមនុស្សចំនួន២នាក់ បានស្លាប់ ដែលពួកគេមាន ១.ឈ្មោះ ហម សុភ័ក្រ ភេទប្រុស អាយុ៥៤ឆ្នាំ មានទីលំនៅ ភូមិគីឡូ១៣ ឃុំសន្តិភាព ស្រុកសំពៅលូន ខេត្តបាត់ដំបង( ជាម្ចាស់ទំនិញ ) និង ២.ឈ្មោះ ខា ទីណា ភេទប្រុស អាយុ២៤ឆ្នាំ មានទីលំនៅនៅភូមិត្រពាំងព្រលិត ឃុំសន្តិភាព ស្រុកសំពៅលូន ខេត្តបាត់ដំបង ( ជាអ្នកបើកបរ )។
បញ្ហានេះដែរ សមត្ថកិច្ចក៏បានសន្និដ្ឋានថា អាចបណ្តាលមកពីការងងុយដេកខ្លាំង គួបផ្សំនឹងល្បឿនរថយន្តផងនោះ ទើបធ្វើឲ្យមានករណីនេះកើតឡើង ហើយ បច្ចុប្បន្ន សពទាំង២នេះ ត្រូវបានសមត្ថកិច្ចជំនាញ ប្រគល់ឲ្យសាច់ញាតិយកទៅធ្វើបុណ្យតាមប្រពៃណី ចំណែករថយន្តក៏បានយកទៅរក្សាទុកនៅស្នងការដ្ឋាន នគរបាលខេត្តហើយ៕
Source: Kampuchea Thmey Daily
0 Comments