ភ្នំពេញ ៖ ស្ត្រីអូស្ត្រាលីដើមកំណើតវៀតណាមម្នាក់ ត្រូវបានតុលាការកម្ពុជាប្រកាសសាលក្រមសម្រេចកាលពីព្រឹកថ្ងៃទី ២៥មេសា ឆ្នាំ២០១៩នេះ ដាក់ពន្ធនាគារកំណត់៣០ឆ្នាំ និងពិន័យជាប្រាក់ឲ្យបង់ចូលថវិការដ្ឋចំនួន៨០លានរៀល ក្រោមការចោទប្រកាន់ពីបទ ដឹកជញ្ជូន រក្សាទុក និងជួញដូរនូវសារធាតុញៀនឆ្លងដែន តាមមាត្រា៤០នៃច្បាប់ស្ដីពីការត្រួតពិនិត្យគ្រឿងញៀនកម្ពុជា។
សេចក្ដីសម្រេចនេះ បើកផ្លូវឲ្យជនត្រូវចោទបណ្តឹងឧទ្ធរណ៍តាមកំណត់ច្បាប់ បើខ្លួនមិនសុខចិត្តនឹងសាលក្រមតុលាការ។
ជនជាប់ចោទឈ្មោះ Tran ve thy អាយុ៣៨ឆ្នាំ ដើមកំណើតជាវៀតណាមចូលសញ្ជាតិអូស្ត្រាលី ត្រូវបានអាជ្ញាធរមានសមត្ថកិច្ចកម្ពុជាចាប់ខ្លួន កាលពីថ្ងៃទី០៦ ខែមករា ឆ្នាំ២០១៨ នៅព្រលានយន្តហោះអន្តរជាតិភ្នំពេញ ជាមួយនឹងថ្នាំញៀនប្រភេទហេរ៉ូអ៊ីនទម្ងន់ ១ ៧៥០ ក្រាម ត្រូវបានគេរកឃើញនៅក្នុងគែមវ៉ាលីស៍ ពណ៌ក្រហមមួយរបស់ជនសង្ស័យ។
នៅថ្ងៃទី១០ ខែមករា ឆ្នាំ២០១៨ តុលាការកម្ពុជា បានចេញដីកាសម្រេចឃុំខ្លួនជនជាប់ចោទដាក់ពន្ធនាគាររហូតដល់ថ្ងៃកាត់ទោសនេះ។
ក្នុងសវនាការ ត្រាន់ វេធី បានសារភាពថា ពេលនៅប្រទេសអូស្ត្រាលី នាងបានចូលលេងល្បែងនៅកាស៊ីណូ ចាញ់អស់ប្រាក់ចំនួន៥.០០០ដុល្លារ ដែលប្រាក់នោះនាងបានខ្ចីពីឈ្មោះ ចាង។ បន្ទាប់មកឈ្មោះចាង បានទារប្រាក់ជំពាក់នោះ ហើយពេលនាងអត់មានប្រាក់សង ឈ្មោះចាង ក៏បានគំរាមឲ្យនាងមកយកអីវ៉ាន់មួយកញ្ចប់នៅកម្ពុជា ជាថ្នូរលស់បំណុល ហើយបើយកទៅដល់អូស្ត្រាលីគេនឹងឲ្យប្រាក់នាង១ម៉ឺនដុល្លារថែមទៀត ប៉ុន្តែបើនាងមិនព្រមមកយក គេនឹងចាប់យកកូននាងទាំង២ចេញពីសាលា។ ដោយគ្មានជម្រើស នាងក៏មកកម្ពុជាចូលទៅកាស៊ីណូណហ្គា ជួបនឹងបុរសវៀតណាម២នាក់ យកវ៉ាលីសក្រហមមួយមកឲ្យនាងយកទៅសណ្ឋាគារដាយមិនផាលេស។ លុះដល់ថ្ងៃទី០៦ ខែមករា ឆ្នាំ២០១៨ នាងក៏ចេញដំណើរមកអូស្ត្រាលីវិញ ក៏ត្រូវប៉ូលិសចាប់ខ្លួនតែម្ដង៕
Source: Kampuchea Thmey Daily
0 Comments