ក្រុមយុវជនថ្នាលរបស់ក្លិបបាល់ទាត់ចំនួន៥សមាជិកក្នុងពានរង្វាន់លីគកំពូលកម្ពុជា (Metfone Cambodian League) បានចូលរួមប្រកួតបាល់ទាត់មហាជនពានរង្វាន់ KMH Cup U18 រដូវកាល២០១៩ ដែលរៀបចំឡើងដោយទីលានបាល់ទាត់ឯកជនមួយក្នុងរាជធានីភ្នំពេញ ស្របពេលដែលការប្រកួតដល់វគ្គជម្រុះដណ្តើមជើងឯកហើយ។
ពានរង្វាន់ KMH Cup U18 នេះមានក្រុមចូលរួមចំនួន៧ក្រុម ដោយក្នុងនោះមានក្រុមយុវជនព្រះខ័នរាជស្វាយរៀង ដែលជាក្រុមការពារតំណែងជើងឯក KMH Cup U18 2018, ក្រុមយុវជនភ្នំពេញក្រោន, ក្រុមយុវជនក្លិបវិសាខា,ក្រុមយុវជនក្លិបបឹងកេត និងក្រុមយុវជណក្លិបអគ្គិសនីកម្ពុជា ពីលើក្រុមពាក់កណ្ដាលអាជីព Football Coffee និង KMH Academy U18។
ចំណែកលោក វី លីកា គ្រូបង្គោលក្រុមយុវជនអាយុក្រោម ១៧ឆ្នាំរបស់ក្រុមវិសាខា បានលើកឡើងថា «ការទទួលបានចំណាត់ថ្នាក់លេខ២ ក្នុងការប្រកួតសន្សំពិន្ទុ គឺជាលទ្ធផលល្អមួយ ដែលយើងអាចទទួលយកបាន។ តែអ្វីដែលខ្ញុំរំពឹង ខ្ញុំចង់ឃើញកីឡាករម្នាក់ៗបង្ហាញសមត្ថភាពលើទីលាន ១០០% ដូច ៩ប្រកួតដំបូង ខ្ញុំអត់ចង់បានដូចលេងប៉ះ U-17 ភ្នំពេញក្រោន ឬប៉ះ U-18 KMH Academy ទេ ដែលយើងមានការធ្វេសប្រហែសច្រើន ធ្វើឲ្យរបូតឱកាសឈរលេខ១»។
គ្រូបង្វឹកកំពុងកាន់អាជ្ញាប័ណ្ណ B-License បានបន្តថា «ការឈរលេខ២ យើងសល់ពេលច្រើន សម្រាប់ត្រៀមជួបក្រុមទទួលបានជ័យជម្នះ រវាងក្រុមលេខ៣(U-17 ភ្នំពេញក្រោន) និងក្រុមលេខ៤(U-18 ព្រះខ័នរាជស្វាយរៀង) ដែរ ។ ចឹងបើយើងត្រៀមបានល្អ យើងនឹងមានឱកាសបានឡើងទៅវគ្គផ្ដាច់ព្រ័ត្រ។ ប៉ុន្ដែពេលនេះ ខ្ញុំមិនទាន់ផ្ដោតលើវគ្គផ្ដាច់ព្រ័ត្រ ឬជើងឯកនោះទេ សំខាន់យើងត្រៀមប្រកួតវគ្គពាក់កណ្ដាលផ្ដាច់ព្រ័ត្រសិន គឺយើងត្រូវរៀបចំតាមដំណាក់កាលឲ្យបានល្អ»។
សូមរំលឹកថា ក្រុមបាល់ទាត់យុវជនបឹងកេត ទទួលបានកៅអីលំដាប់ទី១ ក្រោយបញ្ចប់វគ្គវិលជុំសន្សំពិន្ទុ ពានរង្វាន់ KMH Cup U18 រដូវកាល២០១៩ ចំណែកវិសាខា U17 បានឈរនៅលំដាប់ទី២។
ដូច្នេះក្រុមយុវជនភ្នំពេញក្រោន ត្រូវប៉ះក្រុមការពារជើងឯកព្រះខ័នរាជស្វាយរៀង នៅវគ្គខ្វែងក្នុងនាមជាក្រុមលេខ៣ប៉ះក្រុមលេខ៤ ដើម្បីយកកៅអីពាក់កណ្ដាលផ្ដាច់ព្រ័ត្រប៉ះវិសាខា ដែលឈរលេខ២។ ក្រុមឈ្នះវគ្គពាក់កណ្ដាលផ្ដាច់ព្រ័ត្រ ត្រូវជួបជាមួយបឹងកេតនៅវគ្គផ្ដាច់ព្រ័ត្រ។ ចំពោះប្រកួតរវាងក្រុមលេខ៣ ភ្នំពេញក្រោន និងក្រុមលេខ៤ ព្រះខ័នរាជស្វាយរៀង នឹងធ្វើឡើងនៅថ្ងៃទី០៤ និងថ្ងៃទី១១ ខែឧសភា៕
Source: Kampuchea Thmey Daily
0 Comments