ព្រះសីហនុ ៖ ការកកស្ទះចរាចរណ៍ ត្រូវបានមើលឃើញថា កើតមានស្ទើររាល់ថ្ងៃ កត្តាទាំងអស់នេះគឺបណ្ដាល មកពីអ្នកបើកបរភាគច្រើនមិនគោរពច្បាប់រួមផ្សំ ប្រជាពលរដ្ឋមួយចំនួន ដែលរស់នៅតាមដងផ្លូវ ខ្វះការយល់ដឹងសាងសង់តូបលក់ដូរលយ លើផ្លូវសាធារណៈចតរថយន្តម៉ូតូលើចិញ្ចើមផ្លូវផងនោះ ជាហេតុធ្វើឲ្យ ការកកស្ទះចរាចរណ៍ និងគ្រោះថ្នាក់ចរាចរណ៍ កើតឡើងជាប្រចាំ។
លោក មន្ត្រីសាលា ក្រុងព្រះសីហនុ ជុំវិញបញ្ហានេះ លោកបានធ្វើការបញ្ជាក់ថា ជារៀងរាល់ថ្ងៃកម្លាំងចម្រុះ រួមនឹងកម្លាំងប្រជាការពាររបស់ក្រុង តែងនឹងសមត្ថកិច្ច ប៉ូលិស ចរាចរណ៍ តែងតែចុះធ្វើការ អប់រំជាប្រចាំដល់ប្រជាពលរដ្ឋ ដែលរស់នៅជាប់ដងផ្លូវសាធារណៈប្រកបអាជីវកម្មលក់ដូរ ក៏ដូចការចតរថយន្ត ម៉ូតូ លើចិញ្ចឹមផ្លូវសាធារណៈជាដើម ក្នុងគោលបំណង ធ្វើយ៉ាងណាកាត់បន្ថយ ការកកស្ទះចរាចរណ៍ ខណៈពេលខេត្តព្រះសីហនុបច្ចុប្បន្ន មានការកើនឡើង យានយន្តគ្រប់ប្រភេទ យ៉ាង គំហុកគួរឲ្យកត់សម្គាល់។ ជាមួយនឹងវិធានការចុះអប់រំនេះ រដ្ឋបាលក្រុងក៏បានប្រើប្រាស់ វិធានការក្តៅ ផងដែរ ចំពោះបុគ្គលណា ដែលនៅតែរឹងទទឹង យករថយន្ត ឬម៉ូតូចត់លើដងផ្លូវសាធារណៈបង្កការកកស្ទះ ចរាចរណ៍ គឺកម្លាំងចម្រុះរបស់រដ្ឋបាលក្រុង និងចាប់យកម៉ូតូ និងរថយន្ត នោះ ទៅរក្សាទុកនៅសាលាក្រុងចំនួន១០ថ្ងៃ ជាកំណត់ និងតម្រូវឲ្យម្ចាស់យានយន្តទាំងនោះ ធ្វើកិច្ចសន្យាច្បាស់លាស់ឈប់ប្រព្រឹត្តបែបនេះតទៅទៀត ទើបអនុញ្ញាត ឲ្យរថយន្ត ឬម៉ូតូត្រឡប់មកវិញ ដោយគ្មានការ ផាកពិន័យ ឬ បង់លុយ អ្វីទាំងអស់ ចំណែកបងប្អូនអាជីវករ ដែលលក់លើដីផ្លូវសាធារណៈក៏ដូចគ្នា គឺបើគាត់ មិនព្រម អនុវត្តតាម ការណែនាំរបស់មន្ត្រីសាលាក្រុង ដែលរៀបចំ សណ្ដាប់ធ្នាប់ទេនោះ រដ្ឋបាលក្រុងនឹងធ្វើការរុះរើ និងរឹបអូសសម្ភារៈ លក់ដូរ យកទៅរក្សាទុកនៅសាលក្រុង ដោយគ្មានការយោគយល់នោះឡើយ ហើយរហូត មកដល់ពេលនេះ រដ្ឋបាលក្រុងបាន ធ្វើការចាប់រថយន្ត និងម៉ូតូ ដែលចតលើចិញ្ចើមផ្លូវ បានចំនួនរាប់រយ គ្រឿងមកហើយ យកទៅរក្សាទុក និងធ្វើការណែនាំ ប៉ុន្តែតាមការកត់សម្គាល់បញ្ហានេះ នៅតែកើតមានជាហូរហែ ដូចជាមិនចេះចប់សោះ ជាពិសេស គឺរថយន្តរបស់ជនជាតិចិនតែម្ដង ដោយពួកគេបើកបរ ក៏ដូចជាការចតរថយន្ត មិនគោរពច្បាប់ចរាចរណ៍អ្វីនោះឡើយ ទង្វើនេះជាភាពស្មុគស្មាញបំផុត សម្រាប់ការអនុវត្តច្បាប់។
លោកឧត្ដមសេនីយ៍ត្រី អ៊ីសុខា ស្នងការរង ទទួលបន្ទុក ផែនសណ្ដាប់ធ្នាប់ បានមានប្រសាសន៍ឲ្យដឹងថា កត្តាកកស្ទះ ចរាចរណ៍ជារៀងរាល់ថ្ងៃ គឺបណ្ដាលមកពី កត្តាផ្លូវ កត្តាយានយន្តមានការកើនឡើងច្រើន និងកត្តា មនុស្សមិនគោរពយកយល់និងអធ្យាស្រ័យឱ្យគ្នាទៅវិញទៅមក គួបផ្សំនឹងការចតរថយន្ត និងម៉ូតូក៏ដូចជាការលក់ដូរ លើចិញ្ចើម ផ្លូវ ផងនោះ ជាហេតុធ្វើឲ្យមានការកកស្ទះជារៀងរាល់ថ្ងៃ។ លោកបានបន្ថែមទៀតថា កត្តាផ្លូវ កត្តាយានយន្តមានការកើនឡើងគឺដោយសារតែ ខេត្តព្រះសីហនុ កំពុងមានការអភិវឌ្ឍ រីកចម្រើន លើគ្រប់វិស័យ ដូចនេះលោកសំណូមពរ ទៅដល់បងប្អូន ប្រជាពលរដ្ឋ ដែលបានធ្វើដំណើរ ដោយមធ្យោបាយយានយន្តគ្រប់ប្រភេទ មេត្តាគោរពច្បាប់ចរាចរណ៍ទាំងអស់គ្នា និងកុំនាគ្នា ចតរថយន្តឬម៉ូតូ លើចិញ្ចើមផ្លូវ ទើបកាត់បន្ថយ នៅករណីគ្រោះថ្នាក់ចរាចរណ៍ និងការកកស្ទះចរាចរណ៍បាន។
លោកយន្តមីន អភិបាលនៃគណៈអភិបាល ខេត្តព្រះសីហនុ បានមានប្រសាសន៍លើកឡើងឲ្យដឹងនា ពេលកន្លងមកផងដែរថា បច្ចុប្បន្នរដ្ឋបាលខេត្ត បាននិងកំពុង យកចិត្តទុកដាក់ ក្នុងការកសាង ហេដ្ឋារចនាសម្ព័ន្ធ ជាច្រើន ដើម្បីធ្វើយ៉ាងណា កាត់បន្ថយករណីគ្រោះថ្នាក់ចរាចរណ៍ និង កាត់បន្ថយការកកស្ទះបណ្ដាល មកពីកត្តា។
លោកអភិបាល ក៏បានបញ្ជាក់បន្ថែមថា ខេត្តព្រះសីហនុនាពេលបច្ចុប្បន្ន កំណើនយានយន្ត មានការ កើនឡើងច្រើន ការកសាងអភិវឌ្ឍ ក៏កំពុងមានការរីកចម្រើនខ្លាំង គឺដោយសារតែប្រទេសជាតិមាន សុខសន្តិភាព មានស្ថិរភាពនយោបាយពេញលេញ ក្រោមការដឹកនាំរបស់រាជរដ្ឋាភិបាលកម្ពុជា ដែលមានសម្ដេចតេជោ ហ៊ុន សែន ជាប្រមុខដឹកនាំ។ រដ្ឋបាលខេត្ត បាននិងកំពុង កសាងជួសជុលពង្រីកបន្ថែមផ្លូវជាច្រើនខ្សែ ដើម្បីតម្រូវការនៃការអភិវឌ្ឍរបស់ខេត្តនាពេលបច្ចុប្បន្ន នឹងដើម្បីកាត់បន្ថយការកកស្ទះចរាចរណ៍ផងដែរ៕
Source: Kampuchea Thmey Daily
0 Comments