ភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានប្រកាសថ្កោលទោសយ៉ាង ដាច់អហង្ការចំពោះការវាយប្រហារដោយបំផ្ទុះគ្រាប់បែកនៅប្រទេសស្រីលង្កានាពេលថ្មីៗនេះ។ ជាមួយនេះប្រមុខរដ្ឋាភិបាលកម្ពុជាក៏បានដាស់តឿនកងកម្លាំង ប្រដាប់អាវុធកម្ពុជាឲ្យយកបញ្ហានៅស្រីសង្កាធ្វើជាមេរៀនហើយត្រូវប្រុងប្រយ័ត្នឲ្យកាន់តែខ្ពស់ចំពោះសន្តិសុខជាតិ ។
សម្តេចតេជោនាយករដ្ឋមន្ត្រីបានធ្វើការថ្កោលទោសនេះនៅក្នុងពិធីចែកសញ្ញាបត្រដល់និស្សិតនៃសាកលវិទ្យាល័យជាតិគ្រប់គ្រង (NUM)ជាង ២២០០នាក់នាព្រឹកថ្ងៃទី២៣ខែមេសា ឆ្នាំ២០១៩ នៅកោះពេជ្រ។ សម្ដេចមានប្រសាសន៍ថា៖ «ខ្ញុំក៏សុំយកឱកាសនេះថ្កោលទោសអំពើភេរវកម្មដែលបានកើតឡើង នៅប្រទេសស្រីលង្កា ប៉ុន្តែរឿងនេះយើងកំពុងតែពិនិត្យថាតើមានទំនាក់ទំនងអ្វីជាមួយនឹងភេរវកម្មនៅញូវហ្សេឡែនឬអត់ ? ព្រោះកាលពីប៉ុន្មានខែមុននៅញូវហ្សេឡែន ក៏មានការវាយប្រហារស្លាប់មនុស្សយ៉ាងច្រើនហើយពេលនោះវាយចំព្រះវិហារសាសនាឥស្លាម រីឯការវាយនៅស្រីលង្កាវាយទៅលើព្រះវិហារសាសនាគ្រឹស្ត ទាំងអស់។ អញ្ចឹងតើមានទំនាក់ទំនងអ្វីទេ? យើងមិនទាន់ហ៊ានសន្និដ្ឋានដោយសារមិនទាន់ក្រុមណាមួយចេញមុខមកទទួលខុសត្រូវក្នុង ការវាយប្រហារគ្រាន់តែឧបករណ៍បញ្ជាឱ្យផ្ទុះរកឃើញជាង៨០គ្រឿងឯណោះជាចំនួនមួយមិនតូចទេដែលពួកភេរវកម្មធ្វើសកម្មភាពវាយប្រហារ»។
សម្តេចតេជោនាយករដ្ឋមន្ត្រីបានបន្តថា៖បទពិសោធន៍នៅស្រីលង្កា និងនៅញូវហ្សេឡែនក៏បានផ្តល់មេរៀនកាន់តែច្រើនសម្រាប់កម្ពុជាយើងថាត្រូវបន្តគ្រប់គ្រងឱ្យបានហ្មត់ចត់ ទៅលើការប្រើប្រាស់អាវុធជាតិផ្ទុះ សេរីភាពហួសហេតុទៅលើការប្រើអាវុធ ប្រើជាតិផ្ទុះ គឺមិនមែនជាសេរីភាពសម្រាប់ ក្តីសុខរបស់ប្រជាពលរដ្ឋទេ។ ប្រទេសខ្លះបាញ់គ្នាស្ទើររាល់ឆ្នាំ បាញ់កូនសិស្ស បាញ់អ្វីៗដោយសារតែរឿងអាវុធហ្នឹង ប៉ុន្តែកម្ពុជាសុំតឹងតែងបន្តិច ហើយ។ តឹងតែងប៉ុណ្ណឹងហើយគង់នៅមានបញ្ហាអ្នកខ្លះដកអាវុធភ្ជង់គេ គំរាមគេទៀត។ ដូចនេះកម្លាំងសមត្ថកិច្ចទាំងអស់ត្រូវតែពង្រឹងការងារ សន្តិសុខសុវត្ថិភាពសង្គមជូនប្រជាពលរដ្ឋឲ្យបាន ដោយសម្តេចលើកឡើងថាត្រូវចាំពាក្យចាស់ដែលបានពោលថា៖ «ឃើញទឹកស្ងប់ កុំគិតថាក្នុងទឹកគ្មានត្រី ឬគ្មានសត្វអសិរពិសឲ្យសោះ»។
កាលពីថ្ងៃទី២១ ខែមេសាក្រសួងការបរទេសកម្ពុជាក៏បានចេញសេចក្តីថ្លែងការណ៍ថ្កោលទោសអំពើភេរវកម្មនេះផងដែរ ដោយបានចាត់ ទុកទង្វើនេះជាការបង្កឱ្យមានការភ័យខ្លាចនិងជ្រុលនិយមដ៏គួរឱ្យស្អប់ខ្ពើមនេះនឹងមិនត្រូវអត់ឱនឱ្យជាដាច់ខាត។ នៅក្នុងសេចក្តីថ្លែងការណ៍នេះ សម្តេចតេជោ ហ៊ុន សែន បានសម្តែងនូវសមានទុក្ខដ៏ក្រៀមក្រំចំពោះរដ្ឋាភិបាលនិងប្រជាជនស្រីលង្កា ជាពិសេសគ្រួសារនៃជនរងគ្រោះដែលបាន បាត់បង់ជីវិត នៅក្នុងការវាយប្រហារដោយគ្រាប់បែកដ៏គួរឱ្យស្អប់ខ្ពើមមួយនេះ។
ប៉ូលិសស្រីលង្កាបានរកឃើញឧបករណ៍ចុចបញ្ជាឲ្យគ្រាប់បែកផ្ទុះជាង ៨០គ្រឿងនៅឯចំណតរថយន្ដក្រុងដ៏សំខាន់មួយក្នុងទីក្រុង កូឡុំបូ (Colombo) ដែលជាទីក្រុងធំបំផុតរបស់ស្រីលង្កា។ ការរកឃើញឧបករណ៍ចុចបញ្ជាបំផ្ទុះគ្រាប់បែកខាងលើកើតមានឡើងបន្ទាប់ពីការមានការវាយប្រហារដោយបំផ្ទុះគ្រាប់បែកសម្លាប់ជីវិតមនុស្ស៣១០នាក់និងរបួសជាង៥០០នាក់។លើសពីនេះទៅទៀតអាជ្ញាធរស្រីលង្កាក៏បានដាក់នូវបម្រាមគោចរជាលើកទី២សម្រាប់ប្រជាជននៅក្នុងទីក្រុង Colombo ផងដែរស្របពេលប្រធានាធិបតីលោកម៉ៃស្រ៊ីផាឡា ស៊ីរីសេណា (MaithripalaSirisena) នឹងប្រកាសដាក់ប្រទេសក្នុងភាពអាសន្នថ្នាក់ជាតិ។
សូមរំលឹកជូនថាកាលពីវេលាម៉ោង០៨និង៤៥នាទីព្រឹកថ្ងៃអាទិត្យចំថ្ងៃបុណ្យគ្រឹស្តសាសនាEaster Sunday មានហេតុការណ៍ផ្ទុះគ្រាប់បែកបានកើតមានឡើងនៅវិហារ Anthony's Shrine ព្រមទាំង សណ្ឋាគារចំនួនបីរួមមាន ស៉ីនណាម៉ុនហ្គ្រេនដ៍ (Cinnamon Grand), សាំងគ្រីឡា (Shangri-La Hotel), និងឃីងប៊ឺរី (The Kingsbury) នៅរដ្ឋធានីកូឡុំបូ (Colombo)។ ទន្ទឹមគ្នានេះគ្រាប់បែកក៏បានផ្ទុះនៅវិហារសេបាស្ទាន (St. Sebastian's Church) ក្នុងក្រុងណេហ្គមបូ (Negombo) ដែលមានចម្ងាយ ៣៥គីឡូម៉ែត្រ ភាគខាងជើងពីរដ្ឋធានី Colombo និងនៅវិហារហ្ស៉ីយ៉ូន (Zion Church) ក្នុងក្រុងបាត់ធីខាឡាវ (Batticaloa) ស្ថិតនៅចម្ងាយជាង ៣០០គីឡូម៉ែត្រពី Colombo នៅឯឆ្នេរភាគខាងកើតប្រទេស ស្រីលង្កាផងដែរ។
ក្រៅពីករណីផ្ទុះទាំង៦លើកនេះការផ្ទុះគ្រាប់បែក ចំណែក២លើកទៀត ក៏បានកើតមានឡើងថែមទៀត នៅអំឡុងរសៀលថ្ងៃដដែល ដោយក្នុងនោះគឺនៅសណ្ឋាគារមួយកន្លែងទៀត ក្នុងទីក្រុង ឌេហុីវ៉ាឡាឡាវីនផ (Dehiwala-Mount Lavinia) ភាគខាងត្បូងទីក្រុង Colombo ព្រមទាំងនៅលំនៅឋានឯកជនមួយកន្លែងក្នុងតំបន់ ដាម៉ាតាហ្គោដា (Damatagoda) នៃរដ្ឋធានី Colombo ចំពេលប៉ូលិសបើកប្រតិបត្តិការចុះឆែកឆេរទាក់ទងនឹងការផ្ទុះដែលជាលទ្ធផលបានបណ្តាលឱ្យមន្ត្រីប៉ូលិស ៣នាក់បាត់បង់ជីវិត។
មកទល់នឹងពេលនេះមិនទាន់មានក្រុមណាមួយចេញមុខទទួលខុសត្រូវលើការវាយប្រហារនេះនៅឡើយទេខណៈជនសង្ស័យ ២៤នាក់ត្រូវបានចាប់ខ្លួន ហើយអាជ្ញាធរស្រីលង្កាផ្ទាល់សន្និដ្ឋានថា គម្រោងវាយប្រហារអាចមានពាក់ព័ន្ធនឹងបណ្ដាញភេរវករនៅបរទេស៕
Source: Kampuchea Thmey Daily
0 Comments