បន្ទាយមានជ័យ ៖ ល្ងាច ថ្ងៃទី២៦ ខែមេសា ឆ្នាំ២០១៩ នៅចំណុចផ្លូវជាតិលេខ៥៨ ស្ថិតក្នុងភូមិទួលពង្រ សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ កម្លាំងជំនាញការិយាល័យប្រឆាំងបទល្មើសគ្រឿងញៀន សហការជាមួយកម្លាំងមូលដ្ឋានកងរាជអាវុធហត្ថក្រុងប៉ោយប៉ែត ដឹកនាំដោយលោកវរសេនីយ៍ឯក ស ប៊ុនសឿង មេបញ្ជាការរងកងរាជអាវុធហត្ថខេត្ត ទទួលបទល្មើសគ្រឿងញៀន បានចុះប្រតិបត្តិការបង្ក្រាបករណីជួញដូរសារធាតុញៀនដោយខុសច្បាប់ និងឃាត់ខ្លួនជនសង្ស័យបានចំនួន២នាក់ ហើយបានបញ្ជូនមកទីបញ្ជាការកងរាជអាវុធហត្ថខេត្ត។
ដោយទទួលបានការណែនាំពីលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្ត ការិយាល័យជំនាញប្រឆាំងបទល្មើសគ្រឿងញៀនបានរៀបចំសន្និសីទសារព័ត៌មាន ដោយមានការអញ្ជើញចូលរួមពីសំណាក់លោក មាស ច័ន្ទពិសិដ្ឋ ព្រះរាជអាជ្ញាអមសាលាដំបូងខេត្ត។
លោកឧត្តមសេនីយ៍ត្រី បោន ប៊ិន បានឲ្យដឹងថា ក្រោយពីទទួលបានព័ត៌មានស្តីពីករណីជួញដូរសារធាតុញៀនដោយខុសច្បាប់ នៅចំណុចនៅចំណុចផ្លូវជាតិលេខ៥៨ ស្ថិតក្នុងភូមិទួលពង្រ សង្កាត់ផ្សារកណ្តាល ក្រុងប៉ោយប៉ែត ដោយមានការសម្របសម្រួលពីលោកមាស ច័ន្ទពិសិដ្ឋ ព្រះរាជអាជ្ញាអមសាលាដំបូងខេត្ត លោកបានចាត់តាំងលោកវរសេនីយ៍ឯក ស ប៊ុនសឿង ឲ្យដឹកនាំកម្លាំងចុះប្រតិបត្តិការបង្ក្រាប ដែលអនុវត្តន៍ទៅតាមនីតិវិធីនិងជំនាញច្បាស់លាស់ រហូតឃាត់ខ្លួនជនសង្ស័យបានចំនួន២នាក់ ១មានឈ្មោះ ភុងចាន់ សេកសាន់ ភេទប្រុស អាយុ៣២ឆ្នាំ ជនជាតិថៃ មុខរបរបុគ្គលិកកាស៊ីណូ រស់នៅភូមិខ្វាងណាំយេន ខេត្តស្រះកែវ ប្រទេសថៃ ២មានឈ្មោះ អាត់ សំរេច ភេទប្រុស អាយុ៣៧ឆ្នាំ ជនជាតិខ្មែរ មុខរបររត់ម៉ូតូឌុប ស្នាក់នៅភូមិក្បាលស្ពាន សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
លោកឧត្តមសេនីយ៍មេបញ្ជាការបានបញ្ជាក់ទៀតថា ការធ្វើប្រតិបត្តិការបង្ក្រាបករណីជួញដូរសារធាតុញៀនខាងលើនេះ យើងដកហូតបានវត្ថុតាងរួមមានគ្រឿងញៀនមេតំហ្វេតាមីន ទឹកកក ចំនួន ៥ថង់ ស្មើ ១.៩៩២ក្រាម គ្រឿងញៀនមេតំហ្វេតាមីនគ្រាប់ ចំនួន ៨ថង់ ស្មើ ៥១.១២២គ្រាប់ស្មើនឹង ៥.២៤០,៥ក្រាម ម៉ូតូ ចំនួន ១គ្រឿង ទូរស័ព្ទដៃ ចំនួន ៤គ្រឿង លិខិតឆ្លងដែន ជនជាតិថៃចំនួន ១ កាបូបលុយពណ៌ខ្មៅ ចំនួន ១។ បន្ទាប់ពីធ្វើការសាកសួរ និងធ្វើតេស្តទៅលើសារធាតុញៀន រួចមក កម្លាំងជំនាញបានកសាងសំណុំរឿងបញ្ជូនជនសង្ស័យទាំងពីរនាក់ និងវត្ថុតាងទៅតុលាការ ដើម្បីចាត់ការទៅតាមច្បាប់។
លោកមាស ច័ន្ទពិសិដ្ឋ បានប្រាប់អ្នកយកព័ត៌មានឲ្យដឹងថា អ្នកលួចជួញដូរគ្រឿងញៀនទាំងអស់មិនអាចរស់នៅក្រៅសំណាញ់ច្បាប់បានឡើយអ្នកជួញដូរគ្រឿនទាំងអស់មិនយូរទេថ្ងៃណាមួយនិងត្រូវសមត្ថកិច្ចបង្ក្រាបបានជាមិនខានឡើយ ជាក់ស្តែងដូចបុរស២នាក់នេះ ស្រាប់តែថ្លើមធំហ៊ានលួចជួញដូរគ្រឿងញៀនចំនួន ៥ថង់ ស្មើ ១.៩៩២ក្រាម គ្រឿងញៀនមេតំហ្វេតាមីនគ្រាប់ ចំនួន ៨ថង់ ស្មើ ៥១.១២២គ្រាប់ស្មើនឹង ៥.២៤០,៥ក្រាម បុរសទាំង២នាក់ ត្រូវជាប់គុកអស់មួយជីវិត៕
Source: Kampuchea Thmey Daily
0 Comments