ប្រដាល់ ៖ ចាន់ ប៊ុនហឿន អ្នកប្រដាល់ក្លិបនិរោធមានជ័យ និង រិទ្ធ ភូលូ អ្នកប្រដាល់ក្លិបអាណាចក្រគុនខ្មែរ ពួកគេទាំងពីរនាក់នេះ បានប្រកួតចាញ់ថៃដូចគ្នា នៅក្នុងការជួបប្រកួតគ្នាលើសង្វៀនបាយ័នស្ទឹងមានជ័យ កាលពីយប់ថ្ងៃទី២៦ ខែមេសា ឆ្នាំ២០១៩។
ចាន់ ប៊ុនហឿន អ្នកប្រដាល់ជើងខ្លាំងស្រករក្រោយរបស់កម្ពុជា ត្រូវអ្នកប្រដាល់ជើងខ្លាំងមកពីប្រទេសថៃឈ្មោះហ្វានិមិត្ត វីរីយ៉ាកហ្វាម (Fanimit Viriyakfarm) ផ្តួលឲ្យបោះបង់ការប្រកួតក្នុងទឹកទី៤។ ពួកគេទាំងពីរ ជួបប្រកួតគ្នាក្នុងទម្ងន់៦៣,៥០០គីឡូក្រាម។
នៅក្នុងការប្រកួតទឹកទី៤ ចាន់ ប៊ុនហឿន ត្រូវហ្វានិមិត្ត វាយកែងត្រូវមួយកែងចំថ្គាម និងទាត់ត្រូវមួយជើងចំដើមទ្រូង បណ្តាលឲ្យ ប៊ុនហឿន ដួលអុកគូទលើរេញ ត្រូវអាជ្ញាកណ្ដាលរាប់ដល់១០ តែប៊ុនហឿន មិនអាចក្រោកបន្តការប្រកួតទៀតបានឡើយ។
សូមបញ្ជាក់ថា កាលពីជួបគ្នាលើកមុន អ្នកប្រដាល់ថៃ ហ្វានិមិត្ត វីរីយ៉ាកហ្វាម នេះ បានវាយចាញ់ចាន់ ប៊ុនហឿន ក្នុងទឹកទី៤ដែរ តែពេលនេះហ្វានីមិត្ត គេសងសឹកប៊ុនហឿន បានសម្រេចវិញហើយ តាមរយៈផ្ដួល ប៊ុនហឿន ឲ្យបោះបង់ការប្រកួតក្នុងទឹកទី៤វិញ។
ចំពោះ អ្នកប្រដាល់ជើងខ្លាំងស្រករក្រោយកម្ពុជា រិទ្ធ ភូលូ ក្លិបអាណាចក្រគុនខ្មែរ ក៏វាយចាញ់អ្នកប្រដាល់ថៃជើងខ្លាំងប្រាកាយផេត និតអ៊ីសាមួយ (Prakaypetch Nithisamuy) ដោយពិន្ទុ បន្ទាប់ពីប្រកួតគ្នា៥ទឹកពេញនោះ។ ពួកគេទាំងពីរ ក៏ប្រកួតគ្នាក្នុងទម្ងន់៦៣,៥០០គីឡូក្រាមដែរ។
ជាលើកទី១៨ សម្រាប់រិទ្ធ ភូលូ ហើយ ដែលបានជួបប្រកួតជាមួយអ្នកប្រដាល់ថៃនេះ។ ក្នុង១៦លើកកន្លងមក ភូលូ វាយឈ្នះថៃ១៤លើក និងចាញ់៣លើក។ ការជួបថៃលើកចុងក្រោយនេះ (៣១មីនា២០១៩) ភូលូ វាយចាញ់ថៃ Rithiara ដោយពិន្ទុ។
ប្រាកាយផេត ដែលជាអ្នកប្រដាល់ថៃជើងខ្លាំង និងជាអតីតម្ចាស់ខ្សែក្រវាត់ប្រចាំទូរទស្សន៍ប៉ុស្តិ៍លេខ៧ថៃផងនោះ បានវាយរិទ្ធ ភូលូ ឲ្យអាជ្ញាកណ្ដាលរាប់៨ ដល់ទៅ២លើកក្នុងទឹកទី៣។ រិទ្ធ ភូលូ ត្រូវប្រាកាយផេត ទាត់ត្រូវដៃខាងស្តាំជាច្រើនជើង បណ្តាលឲ្យ ភូលូ មានបញ្ហាដៃ(ធ្លាក់ដៃ) ប៉ុន្តែក្រោយពីអាជ្ញាកណ្ដាលរាប់នោះ រិទ្ធ ភូលូ អាចបន្តការប្រកួតទៀតបាន និងតស៊ូជាមួយប្រាកាយផេត រហូតដល់ចប់ទឹក៥ និងចាញ់ត្រឹមពិន្ទុប៉ុណ្ណោះ។
ដោយឡែក អ្នកប្រដាល់រឿន សុខលី ក្លិបការិយាល័យទី៥ កងទ័ពជើងគោក បានប្រកួតចាញ់ យ៉ន ពិសី អ្នកប្រដាល់ក្លិបសាលវ័ន្តកីឡាដោយពិន្ទុ ក្រោយពីវាយគ្នា៥ទឹកពេញនោះ។ ពីរនាក់នេះ ប្រកួតគ្នាក្នុងទម្ងន់៥៤គីឡូក្រាម។ ចំណែកម៉ិល សារុន អ្នកប្រដាល់ក្លិបអាណាចក្រគុនខ្មែរ បានផ្តួលឡុង សំណាង អ្នកប្រដាល់ក្លិបពន្លឺវិបុលមានរិទ្ធ ឲ្យបោះបង់ការប្រកួតមុនទឹកទី៥ ក្នុងការជួបប្រកួតគ្នាទម្ងន់៦០គីឡូក្រាម៕
Source: Kampuchea Thmey Daily
0 Comments