ប្រដាល់ ៖ អ្នកប្រដាល់កម្ពុជាឡៅ ចិត្រា ក្លិបកងពលតូចទ័ពឆ័ត្រយោង៩១១ ត្រូវគេផ្គូឲ្យជួបប្រកួតជាមួយអ្នកប្រដាល់ថៃ ឆៃ យ៉ូ (Chhai Yo)ហើយលាភ រដ្ឋា អ្នកប្រដាល់ក្លិបដីឡូត៍មានរិទ្ធខេត្តបន្ទាយមានជ័យ ជួបប្រកួតជាមួយអ្នកប្រដាល់ថៃ យ៉ត សាណាន(Yorth Sanan) នារសៀលថ្ងៃអាទិត្យ ទី២៨ខែមេសា ឆ្នាំ២០១៩នេះ នៅលើសង្វៀនWurkz របស់SEATV។
អ្នកប្រដាល់ជើងខ្លាំងវ័យក្មេង ឡៅ ចិត្រា ដែលជាប្អូនរបស់ ឡៅ ចន្ទ្រា និង ឆៃ យ៉ូ នេះ ជួបគ្នាក្នុងទម្ងន់៦០គីឡូក្រាម។ អ្នកប្រដាល់ថៃរូបនេះ គេធ្លាប់មកប្រកួតនៅស្រុកខ្មែរប្រមាណម្តងពីរដងហើយ ។
ឡៅ ចិត្រា ជាអ្នកប្រដាល់វ័យក្មេង ដែលខ្លាំងជាងគេក្នុងចំណោមអ្នកប្រដាល់កម្ពុជាដែលមានវ័យក្មេង និងទម្ងន់ដូចគ្នានោះ ហើយចិត្រា គេក៏ជាអ្នកប្រដាល់ជើងខ្លាំងម្នាក់ដែរ សម្រាប់ពេលបច្ចុប្បន្ននេះ។ ចិត្រា ធ្លាប់ប្រកួតជាមួយអ្នកប្រដាល់ថៃច្រើននាក់មកហើយនាពេលកន្លងមក ដែលភាគច្រើនឈ្នះសឹងតែទាំងអស់រាល់ពេលជួបជាមួយថៃនោះ។
និយាយជារួម ចិត្រាទាំងបទពិសោធន៍ ទាំងស្នៀតប្រដាល់ ល្បិចកលនិងកាយសម្បទា សុទ្ធតែល្អនិងខ្លាំង ដែលអាចទុកចិត្តបានថា អាចយកឈ្នះលើអ្នកប្រដាល់ថៃ ឆៃ យ៉ូ បានមិនខាន។
អ្នកប្រដាល់ថៃ ឆៃ យ៉ូ នេះ ជាជើងខ្លាំងម្នាក់នៅស្រុកថៃ ដែលមានស្នៀតប្រដាល់ល្អនិងខ្លាំង ហើយបទពិសោធន៍លើរេញរបស់គេគួរសមដែរ ព្រោះគេមានប្រវត្តិប្រកួតចំនួន៧៨លើក ឈ្នះ៦០លើក និង ចាញ់១៨លើក មិនដែលស្មើ។ បើធៀបជាមួយឡៅ ចិត្រា គឺប្រហាក់ប្រហែលគ្នា ដោយចិត្រា គេមានកំណត់ត្រាប្រកួតចំនួន៨០លើក ក្នុងនោះឈ្នះ៧៣លើក ចាញ់០៥លើក និង ស្មើ០២លើក។
បើតាមពិនិត្យកម្រិតសមត្ថភាពបច្ចេកទេសនិងកាយសម្បទារបស់ពួកគេទាំងពីរនេះ គេមិនរំពឹងថា ឡៅ ចិត្រា ចាញ់ ឆៃ យ៉ូ នោះទេ ដោយសារចិត្រា គេមានផ្លែល្អជាង។ យ៉ាងណា ឡៅ ចិត្រា មិនអាចមើលស្រាល ឆៃ យ៉ូ នោះឡើយ ព្រោះថាអ្នកប្រដាល់ថៃរូបនេះ ក៏ធ្លាប់យកឈ្នះអ្នកប្រដាល់ខ្មែរផងដែរកន្លងមក។ ចាំមើល ឡៅ ចិត្រា គេអាចផ្តួលអ្នកប្រដាល់ថៃជើងចាស់ឆៃ យ៉ូ បានឬអត់នោះ? ។
លាភ រដ្ឋា អ្នកប្រដាល់ក្លិបដីឡូតិ៍មានរិទ្ធ ខេត្តបន្ទាយមានជ័យ ត្រូវគេផ្តល់ឱកាសឲ្យជួបប្រកួតជាមួយអ្នកប្រដាល់ថៃឈ្មោះយ៉ត សាណាន(Yorth Sanan) ដោយជួបគ្នាក្នុងប្រភេទទម្ងន់៥៧គីឡូក្រាម ។
យ៉ត សាណាន នេះ មានកម្ពស់ប្រហាក់ប្រហែលលាភ រដ្ឋា ដែរ ដោយអ្នកប្រដាល់ថៃមានកម្ពស់១,៦៦ម៉ែត្រ ឯ លាភ រដ្ឋា ១,៦៤ម៉ែត្រ។ យ៉ត សាណាន មានប្រវត្តិប្រកួតចំនួន៥៨លើក ឈ្នះ៥២លើកនិង ចាញ់០៦លើក មិនដែលស្មើ។ គេជាអ្នកប្រដាល់ជើងខ្លាំងមួយរូប តែមិនធ្លាប់មកប្រកួតនៅស្រុកខ្មែរទេកន្លងមក។ សម្រាប់ លាភ រដ្ឋា អ្នកប្រដាល់កម្ពុជាវិញ គេធ្លាប់បានជួបប្រកួតជាមួយថៃ ៩លើកទាំងលើកនេះ។ លាភ រដ្ឋា ក៏ជាអ្នកប្រដាល់ជើងខ្លាំងមួយរូបដែរនៅស្រុកខ្មែរ ហើយគេទើបឈ្នះពានរង្វាន់ជើងឯក TV5 Knock Out Series ទម្ងន់៦០គីឡូក្រាម និងជាជើងឯករងខ្សែក្រវាត់ខារ៉ាបាវទម្ងន់៥៧គីឡូក្រាម។ គេមានប្រវត្តិប្រកួតចំនួន៥៨លើក ឈ្នះ៤៣លើក ចាញ់១៣លើក និងស្មើ០២លើក។
ជាអ្នកប្រដាល់ដែលមានកណ្ដាប់ដៃខ្លាំង លឿន រហ័ស នោះ លាភ រដ្ឋា វាយមិនញញើតអ្នកប្រដាល់នោះឡើយ។ ចាំមើល តើលាភ រដ្ឋា អាចយកឈ្នះ យ៉ត សាណាន បានឬអត់ ? សម្រាប់ការជួបគ្នាលើកដំបូងនេះ។
ចំពោះការប្រកួតរវាងខ្មែរ និងខ្មែរវិញ សៀវ ង៉ុយ អ្នកប្រដាល់ក្លិបកងពលធំអន្តរាគមន៍លេខ២ នឹងត្រូវជួបប្រកួតជាមួយ បឺត សង្ឃឹម អ្នកប្រដាល់ក្លិបរ៉ាហាប់ស្វាយប៉ាក ក្នុងទម្ងន់៥៧គីឡូក្រាម ហើយអ្នកប្រដាល់ទម្ងន់ធ្ងន់ លួន សុខខេង អ្នកប្រដាល់ក្លិបពុទ្ធសេរីវង្សកីឡា ត្រូវជួបប្រកួតជាមួយ ទេស សំខាន់ អ្នកប្រដាល់ក្លិបកងពលតូចលេខ៧០ ក្នុងប្រភេទទម្ងន់៧១គីឡូក្រាម៕
Source: Kampuchea Thmey Daily
0 Comments