រតនគិរី ៖ ឈើសុក្រំប្រភេទសន្លឹក មួយមួយរថយន្តសាំយ៉ុង ឈ្មួញយកមកលាក់ទុកក្នុងព្រៃ ត្រូវបានរដ្ឋបាលព្រៃឈើផ្នែកវើនសៃ រឹបអូសយកមករក្សាទុក នៅខណ្ឌរដ្ឋបាលព្រៃឈើ។
ការចុះរឹបអូសរថយន្តសាំយ៉ុងខាងលើនេះ ធ្វើឡើងនៅវេលាម៉ោង១០និង០៥នាទី ថ្ងៃទី២៦ ខែមេសា ឆ្នាំ២០១៩ កន្លងទៅ ដោយសមត្ថកិច្ចរដ្ឋបាលឈើផ្នែកវើនសៃ ក្រោមការសម្របសម្រួលពីលោក រ៉ា បូរ៉ាន់ឌី ព្រះរាជអាជ្ញារង អមសាលាដំបូងខេត្ត បានចុះរឹបអូសរថយន្តសាំយុង០១គ្រឿង ពណ៌ស ពាក់ស្លាកលេខ ភ្នំពេញ 2A.5978 ដឹកឈើពេញរថយន្ត យកមកលាក់ទុកនៅក្នុងចម្ការស្វាយចន្ទី ក្រោយវត្ត ស្ថិតក្នុងភូមិថារងជង ឃុំអូរជុំ ស្រុកអូរជុំ ខេត្តរតនគិរី។
លោក ឡេង យុគ នាយផ្នែករដ្ឋបាលព្រៃឈើវើនសៃ បានឲ្យដឹងថា បន្ទាប់ពីទទួលបានសេចក្ដីរាយការណ៍ពីប្រជាពលរដ្ឋ មានរថយន្តសាំយ៉ុងដឹកឈើ០១គ្រឿង យកទៅលាក់ទុកនៅចំណុចខាងលើ លោកក៏បាន រាយការណ៍ទៅលោកព្រះរាជអាជ្ញារង ដើម្បីសម្រួលក្នុងការរឹបអូសវត្ថុតាង យកមករក្សាទុកបន្តនីតិវិធី។
លោកនាយផ្នែកបានបន្តទៀតថា ឈើនេះ ជាប្រភេទឈើសុក្រំ អារជាសន្លឹក ដែលមានមុខកាត់ ៣៥សង់ទីម៉ែត្រ គុណ ១០សង់ទីម៉ែត្រ ប្រវែង ១.២ម៉ែត្រ និង២.២ម៉ែត្រ សរុបចំនួន៣៦សន្លឹក ហើយលោកមិនទាន់បានធ្វើការវាស់វែងនៅឡើយទេ។
បច្ចុប្បន្ន រថយន្ត និងឈើ ត្រូវបានយកមករក្សាទុកនៅខណ្ឌរដ្ឋបាលព្រៃឈើខេត្ត ដើម្បីស្រាវជ្រាវបន្តរកម្ចាស់ឈើមកចាត់វិធានការតាមច្បាប់ព្រៃឈើ៕
Source: Kampuchea Thmey Daily
0 Comments