កំពង់ចាម ៖ ប្រជាពលរដ្ឋ និងសមត្ថកិច្ចជាច្រើន បានភ្ញាក់ផ្អើល ដោយការប្រទះឃើញវ៉ាលិសមួយទុកចោលនៅមុខទូដកប្រាក់អេធីអឹមក្នុងក្រុងកំពង់ចាម ដែលគេសង្ស័យថា ជាការដាក់គ្រាប់បែក ធ្វើអោយសមត្ថកិច្ចជំនាញជាច្រើនមកស្រាវជ្រាវ រកការពិត។
លោកវរសេនីយ៍ទោ អ៊ឹង ប៊ុន អធិការនគរបាល ក្រុងកំពង់ចាមបានអោយដឹងថា នៅថ្ងៃទី២៦ខែមេសា ឆ្នាំ២០១៩ វេលាម៉ោង១៥និង២០នាទី សមត្ថកិច្ចយើងបានទទួលព័ត៌មានពីបុគ្គលិកធនាគារ ស្ថាបនា ថា មានជនមិនស្គាល់អត្តសញ្ញាណ យកវ៉ាលិសពណ៌ខ្មៅចំនួន០១ បើកចំហយកផ្លុង ចោលនៅក្នុងបន្ទប់ទូ អេ ធី អឹម ស្ថាបនា ខាងលិចដើមពោធិ៍ផ្សាររាត្រី ស្ថិតក្នុងភូមិទី១៥ សង្កាត់កំពង់ចាម ក្រុងកំពង់ចាម ខេត្តកំពង់ចាម។ ក្រោយពីបានទទួលព័ត៌មានភ្លាម លោក អ៊ឹង ប៊ុន អធិការនគរបាលក្រុងកំពង់ចាម បានបញ្ជាដល់កម្លាំងជំនាញក្រុង និងកម្លាំងប៉ុស្តិ៍ សហការជាមួយកម្លាំងជំនាញខេត្តនិងជំនាញពាក់ព័ន្ធ ចុះដល់កន្លែងកើតហេតុ ដើម្បីការពារនិងស្រាវជ្រាវ ត្រួតពិនិត្យតាមលក្ខណៈបច្ចេកទេស។
ជាមួយគ្នានេះដែរលោក គួច ចំរើន អភិបាលខេត្តកំពង់ចាម និងលោកឧត្តមសេនីយ៍ទោ ឯម កុសលស្នងការនគរបាលខេត្តកំពង់ចាម ក៏មានវត្តមាននៅកន្លែងកើតហេតុដើម្បីដឹកនាំបញ្ជាជំនាញ។
លោកអធិការបន្តថា បន្ទាប់មកសមត្ថកិច្ចយើងបានធ្វើការទំនាក់ទំនងទៅអង្គភាពកំចាត់មីនកម្ពុជា ហៅកាត់CMAC ដើម្បីមកធ្វើការត្រួតពិនិត្យតាមជំនាញ។
រហូតដល់វេលាម៉ោង១៧ និង០០នាទី អង្គភាពកំចាត់មីនកម្ពុជាហៅកាត់CMAC បានមកដល់ ហើយបានធ្វើការត្រួតពិនិត្យឃើញថាក្នុងវ៉ាលិស និង បរិវេណជុំវិញទូ អេធីអឹម ទីតាំងកន្លែងដាក់វ៉ាលិសខាងលើ ពុំមានគ្រឿងបំផ្ទុះឡើយ។
អ្នកស្រី ស៊ីវ សុដាឡែន អាយុ៣៣ឆ្នាំ ជាតិខ្មែរ មានទីលំនៅភូមិទី៦ សង្កាត់វាលវង់ ក្រុងកំពង់ចាម ខេត្តកំពង់ចាម និងឈ្មោះវ៉ាន់ស្រីម៉ិច ភេទស្រី អាយុ២៨ឆ្នាំ ជាតិខ្មែរ មានទីលំនៅភូមិ បឹងកុក២ សង្កាត់បឹងកុក ក្រុងកំពង់ចាម ខេត្តកំពង់ចាម មានមុខរបរ បុគ្គលិកម៉ាតសុជាតិ មានទីតាំងជាប់នឹងទូរ អេ ធី អឹម នោះដែរ បំភ្លឺប្រហាក់ប្រហែលគ្នា អោយដឹងថា ៖ រូបភាពវីដេអូដែលសមត្ថកិច្ចយើងបង្ហាញគាត់ គឺមានភិនភាគ ពាក់អាវក្រឡាការ៉ូ ពណ៌ទឹកប៊ិចលាយស ពាក់មួកប៉េរ៉េ ពណ៌សស្លៀកខោខ្មៅជើងវែង គឺជាជនម្នាក់ដែលជាមនុស្សវិកលចរិត ហើយកន្លងមកជននោះ ជាញឹកញាប់ តែងតែយកសម្ភារៈខូចៗ ចានឆ្នាំងបាក់បែក ឌុយសាកទូរស័ព្ទខូចៗ និងសំលៀកបំពាក់ចាស់ៗ យកទៅទុកនៅក្នុងទូអេធីអឹម ហត្ថាកសិករ ដែលមានទីតាំងជាប់គ្នាជាមួយ ទូ អេ ធី អឹម ស្ថាបនា។
ក្រោយពីសមត្ថកិច្ចជំនាញពិនិត្យរួចទើបដឹងថា ជាវ៉ាលិសរហែក និងក្រដាសប្រាក់សម្រាប់សែន ឆេង ម៉េងទៅវិញ។ ចំពោះករណីខាងលើនេះសមត្ថកិច្ចកំពុងស្រាវជ្រាវបន្ត៕
Source: Kampuchea Thmey Daily
0 Comments