ឧត្តរមានជ័យ ៖ កាលពីថ្ងៃទី១០ ខែមេសា ឆ្នាំ២០១៩ វេលាម៉ោង២១និង០០នាទី កម្លាំងជំនាញ បានចេញល្បាត ឃើញជនសង្ស័យកំពុងតែចែកចាយគ្រឿងញៀន នៅចំណុចខាងជើងព្រលានយន្តហោះ ស្ថិតនៅភូមិកំណប់ ពេលឃើញសមត្ថកិច្ចក៏រត់ចោលម៉ូតូ។
លុះដល់ថ្ងៃទី១៣ ខែមេសា ឆ្នាំ២០១៩ ជនសង្ស័យ ឈ្មោះ ហុង ចន្ថា ភេទប្រុស បានមកដាក់ពាក្យបណ្តឹងនៅការិយាល័យព្រហ្មទណ្ឌកម្រិតស្រាល (ថាមានគេវាយយកម៉ូតូ)។ លុះថ្ងៃទី២២ ខែមេសា ឆ្នាំ២០១៩ ការិយាល័យព្រហ្មទណ្ឌកម្រិតស្រាល បានកោះហៅដើមបណ្តឹង ឈ្មោះ ហុង ចន្ថា មកសាកសួរ ក៏ពាក់ព័ន្ធបទល្មើសគ្រឿងញៀន ទើបប្រគល់ឲ្យការិយាល័យប្រឆាំងគ្រឿងញៀន ជំនាញបានសួរនាំរឿងហេតុរួចជនសង្ស័យ ឈ្មោះ ហុង ចន្ថា ភេទប្រុស អាយុ២៩ឆ្នាំ បានសារភាពថា ខ្លួនពិតជាបានចែកចាយ និង ប្រើប្រាស់គ្រឿងញៀនពិតប្រាកដមែន ។
ថ្ងៃទី២២ ខែមេសា ឆ្នាំ២០១៩ វេលាម៉ោង០៩និង២០នាទី កម្លាំងជំនាញការិយាល័យប្រឆាំងគ្រឿងញៀន បានចុះធ្វើការឆែកឆេរ ដឹកនាំដោយលោកឧត្ដមសេនីយ៍ត្រី ផេង តារា និង មានការសម្របសម្រួលដោយ លោក កូយ កាន់យ៉ា ព្រះរាជអាជ្ញាអមសាលាដំបូងខេត្ត នៅចំណុច បន្ទប់ជួលខាងជើងផ្សារសំរោង ស្ថិតនៅភូមិសំរោង សង្កាត់សំរោង ក្រុងសំរោង ខេត្តឧត្តរមានជ័យ។
ក្នុងនោះសមត្ថកិច្ចយើង រកឃើញសម្ភារៈ វត្ថុតាងរួមមាន ថ្នាំញៀនប្រភេទមេតំហ្វេតាមីន( ice) ទឹកកក ចំនួន០៥កញ្ចប់ ស្មើនឹង២.១៥ក្រាម ម៉ូតូចំនួន០២គ្រឿង ទូរស័ព្ទដៃចំនួន០១គ្រឿង, កាបូបដាក់ប្រាក់០១ និង សម្ភារៈសម្រាប់ជក់ថ្នាំញៀនមួយចំនួនទៀត។
បច្ចុប្បន្ន សមត្ថកិច្ចជំនាញ កំពុងសាកសួរ និងកសាងសំណុំរឿងទៅតាមនីតិវិធី៕
Source: Kampuchea Thmey Daily
0 Comments