ភ្នំពេញ ៖ ក្រសួងការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា បានប្រកាសថ្កោលទោសយ៉ាងខ្លាំងក្លា ចំពោះអំពើហិង្សាដ៏សាហាវឃោរឃៅ ទៅលើព្រះវិហារគ្រិស្តសាសនា និងសណ្ឋាគារ នៅប្រទេសស្រីលង្កា កាលពីថ្ងៃទី២១ ខែមេសា ឆ្នាំ២០១៩ ដែលបានផ្តាច់ជីវិតមនុស្ស២៩០នាក់ និងជាង៥០០នាក់ទៀតរងរបួស នេះបើតាមសេចក្ដីថ្លែងការណ៍ ដែលទើបទទួលបាន។
សេចក្ដីថ្លែងការណ៍របស់ក្រសួងការបរទេស ចុះថ្ងៃអាទិត្យ ទី២១ ខែមេសា ឆ្នាំ២០១៩ បានលើកឡើងយ៉ាងនេះថា “រាជរដ្ឋាភិបាលកម្ពុជា សូមសម្ដែងនូវសមានទុក្ខដ៏ក្រៀមក្រំចំពោះរដ្ឋាភិបាល និងប្រជាជនស្រីលង្កា ជាពិសេសគ្រួសារ នៃជនរងគ្រោះ ដែលបានបាត់បង់ជីវិតនៅក្នុងការវាយប្រហារដោយគ្រាប់បែកដ៏គួរឲ្យស្អប់ខ្ពើម នៅប្រទេស ស្រីលង្កា កាលពីថ្ងៃទី២១ ខែមេសា ឆ្នាំ២០១៩។
រាជរដ្ឋាភិបាលកម្ពុជា ថ្កោលទោសយ៉ាងខ្លាំងក្លាចំពោះអំពើហិង្សាដ៏សាហាវឃោរឃៅនេះ ហើយទង្វើបង្កឲ្យមានការភ័យខ្លាច និងជ្រុលនិយមដ៏គួរឲ្យស្អប់ខ្ពើមនេះ នឹងមិនត្រូវអត់អោនឲ្យជាដាច់ខាត។ ព្រះរាជាណាចក្រកម្ពុជា ប្ដេជ្ញាចិត្តក្នុងការប្រយុទ្ធប្រឆាំងនឹងអំពើភេរវកម្ម និងជ្រុលនិយមតាមគ្រប់ទម្រង់ និងរូបភាព”។
ក្រសួងការបរទេសបញ្ជាក់ថា “រាជរដ្ឋាភិបាល និងប្រជាជនកម្ពុជា មានជំហរសាមគ្គីភាពជាមួយរដ្ឋាភិបាល និងប្រជាជនស្រីលង្កា នៅក្នុងគ្រាដ៏លំបាកនេះ និងសូមបួងសួងឲ្យអ្នករងរបួសទាំងអស់ បានជាសះស្បើយឆាប់រហ័សឡើងវិញ”។
គួររំលឹកថា កាលពីថ្ងៃទី២១ ខែមេសា ឆ្នាំ២០១៩ មានករណីបំផ្ទុះគ្រាប់បែកដ៏សាហាវឃោរឃៅមួយបានកើតឡើងទៅលើព្រះវិហារគ្រិស្តសាសនា និងសណ្ឋាគារ នៅប្រទេសស្រីលង្កា ដែលហេតុការណ៍នោះ បានបណ្ដាលឲ្យមនុស្សយ៉ាងតិច២៩០នាក់ បានស្លាប់នៅក្នុងការបំផ្ទុះគ្រាប់បែកជាបន្តបន្ទាប់នោះ ហើយករណីនេះ ត្រូវបានរដ្ឋាភិបាលស្រីលង្កាចាត់ទុកថា ជាអំពើហិង្សាអាក្រក់បំផុត ក្រោយពីសង្គ្រាមស៊ីវិលដ៏សាហាវរបស់ខ្លួនបានបញ្ចប់ កាលពីមួយទសវត្សរ៍មុន។
តាមសមត្ថកិច្ចស្រីលង្កាបានឲ្យដឹងថា ការផ្ទុះគ្រាប់បែបនេះ ត្រូវបានរៀបចំបណ្ដាក់គ្នាចំនួនប្រាំបីគោលដៅ លើអ្នកគោរពបូជានៅក្នុងពិធីបុណ្យ Easter និងសណ្ឋាគារ ដែលមានប្រជាប្រិយភាព និងសំបូរដោយភ្ញៀវទេសចរអន្តរជាតិ។ ចំនួនអ្នកស្លាប់ចុងក្រោយ ដែលត្រូវបានផ្តល់ដោយអ្នកនាំពាក្យប៉ូលិស កាលពីព្រឹកថ្ងៃច័ន្ទ ទី២២មេសា បានឲ្យដឹងថា មានមនុស្ស៥០០នាក់បានរងរបួស និង២៩០នាក់បានស្លាប់។
ក្រោយកើតហេតុ នាយករដ្ឋមន្ត្រី នៃប្រទេសស្រីលង្កា លោក Ranil Wicramesighe បានសម្ដែងនូវការចូលរួមរំលែកទុកដល់ក្រុមគ្រួសាររបស់ជនរងគ្រោះ ហើយបានប្រាប់អ្នកយកព័ត៌មានថា “ខ្ញុំមើលឃើញការផ្ទុះនេះថា ជាវិបត្តិដ៏ធំមួយ ដែលនឹងនាំប្រទេស និងសេដ្ឋកិច្ចរបស់ប្រទេសនេះឆ្ពោះទៅកាន់អស្ថិរភាព។ ខ្ញុំថ្កោលទោសយ៉ាងខ្លាំងដល់ការវាយប្រហារទាំងនេះ ដែលដៅលើទីកន្លែងសាសនា និងសណ្ឋាគារប្រណិត។ យើងទាំងអស់គ្នា ត្រូវតែលើកស្ទួយច្បាប់របស់ប្រទេស”។
ទីភ្នាក់ងារព័ត៌មាន Associated Press បានដកស្រង់សម្តីមន្ត្រីសន្តិសុខម្នាក់មកចុះផ្សាយថា ការផ្ទុះ២ អាច ត្រូវបានធ្វើឡើងដោយពួកអ្នកដាក់គ្រាប់បែកអត្តឃាត។ ចំណែកអាជ្ញាធរ និយាយថា វិហារគ្រិស្តសាសនាមួយ ឈ្មោះ Saint Anthony's និងសណ្ឋាគារទាំងអស់ ដែលរងការវាយប្រហារដោយការផ្ទុះលើកទី១ ស្ថិតនៅក្នុងរដ្ឋធានី Colombo៕
Source: Kampuchea Thmey Daily
0 Comments