ក្រុមប្រឹក្សារាជធានីភ្នំពេញ បើកកិច្ចប្រជុំសាមញ្ញលើកទី៥៩ សម្រាប់អាណត្តិទី២

ភ្នំពេញ ៖ ក្រុមប្រឹក្សារាជធានីភ្នំពេញ នៅព្រឹកថ្ងៃទី១០មេសានេះ បានបើកកិច្ចប្រជុំសាមញ្ញលើកទី៥៩ សម្រាប់អាណត្តិទី២ ដើម្បីពិភាក្សា និងអនុម័តសេចក្ដីព្រាងកំណត់ហេតុ នៃកិច្ចប្រជុំសាមញ្ញលើកទី៥៨ របស់ក្រុមប្រឹក្សារាជធានី កាលពីថ្ងៃទី១៤មិនាកន្លងមកនេះ។

កិច្ចប្រជុំធ្វើឡើងដោយមានការចូលរួមពី លោក ម៉ប់ សារិន ប្រធានក្រុមប្រឹក្សារាជធានីភ្នំពេញ,លោក កើត ឆែ អភិបាលរងរាជធានីភ្នំពេញតំណាង លោក ឃួង ស្រេង អភិបាលរាជធានីភ្នំពេញ។

ក្រុមប្រឹក្សារាជធានីភ្នំពេញបានពិភាក្សា និងអនុម័តសេចក្ដីព្រាងកំណត់ ហេតុនៃកិច្ចប្រជុំសាមញ្ញលើកទី៥៨ របស់ក្រុមប្រឹក្សាអាណត្តិទី២ កាលពីថ្ងៃទី១៤មិនា សេចក្ដីព្រាងរបាយការណ៍ប្រចាំត្រីមាសទី១ឆ្នាំ២០១៩ ស្ដីពីការអនុវត្តការងាររបស់រដ្ឋបាលរាជធានីភ្នំពេញ។ សេចក្ដីព្រាងរបាយការណ៍ស្ដីពីវេទិកាផ្សព្វផ្សាយ និងពិគ្រោះយោបល់នៅខណ្ឌទាំង១២ឆ្នាំ២០១៩។

សេចក្ដីព្រាងផែនការ សកម្មភាព និងផែនការថវិកាប្រចាំឆ្នាំ២០១៩បន្ថែម ដែលគាំទ្រថវិកាដោយអង្គការUNICEFរបស់គណៈកម្មាធិការពិគ្រោះយោបល់កិច្ចការស្ត្រី និងកុមាររបស់ក្រុមប្រឹក្សារាជធានីភ្នំពេញ និងបញ្ហាផ្សេងៗមួយចំនួនទៀត។

លោក ម៉ប់ សារិន បានលើកឡើងពីចំណុចគួរឲ្យចាប់អារម្មណ៍ដូចជា បញ្ហាគ្រោះថ្នាក់ចរាចរណ៍ដែលយើងបានដឹង បានឃើញទាំងអស់គ្នា កំពុងកើតមានសព្វថ្ងៃនៅរាជធានីភ្នំពេញ តើដោយសារអ្វី? ហើយយើងត្រូវមានវិធានការទប់ស្កាត់ និងកាត់បន្ថយបែបណា។

ជាមួយគ្នានេះ គ្រោះអគ្គិភ័យ ក៏បានកើតឡើងញឹកញាប់គួរឲ្យបារម្ភដែរ ដែលទាមទារឲ្យមានការចូលរួមទប់ស្កាត់ទាំងអស់គ្នា។

លោក ក៏បានស្នើឲ្យមានវគ្គ បណ្ដុះបណ្ដាលដល់មន្ត្រីជំនាញក្រោមឱវាទរាជធានីភ្នំពេញ ដើម្បីឲ្យពួកគាត់កាន់តែមានសមត្ថភាពក្នុងការបំពេញការងារផងដែរ៕