សហព័ន្ធកីឡាបាល់ទាត់ទ្វីបអាស៊ី (AFC) បានបញ្ជាក់នៅលើវិបសាយរបស់ខ្លួនថា សហព័ន្ធកីឡាបាល់ទាត់កម្ពុជា នឹងទទួលរៀបចំការប្រកួតវគ្គជម្រុះយុវជនអាស៊ីអាយុក្រោម១៩ឆ្នាំ ( 2020 AFC U-19 Championship) សម្រាប់សម្រាប់ស្វែងរកបេក្ខភាពដណ្តើមកៅអីទៅប្រកួតជុំផ្ដាច់ព្រ័ត្រនៅឆ្នាំ២០២០ នៅប្រទេសជប៉ុន។
ស្ថាប័ន AFC បានបញ្ជាក់ទៀតថា ក្រៅពីភាគីកម្ពុជា ក៏មានប្រទេស៤ក្រុមទៀតដែរទទួលបានសិទ្ធិធ្វើជាម្ចាស់ផ្ទះការប្រកួតពានយុវជនអាយុក្រោម១៩ឆ្នាំ ប្រចាំទ្វីបមួយនេះ ប្រចាំតំបន់អាស៊ីភាគខាងកើតរួមមាន កម្ពុជា, ឆាយនីតៃប៊ិ, មីយ៉ាន់ម៉ា, វៀតណាម និងមួយប្រទេសទៀតពុំទាន់បង្ហាញឲ្យដឹងនៅឡើយ ស្របពេលសមាជិកដែលមាន ២១ប្រទេសចូលរួម។
តាមគម្រោងក្រុមទាំង២១ ប្រទេសដែលចូលរួមនេះនឹងត្រូវបែងចែកចេញជា ៥ពូល ក្នុងនោះមាន៤ពូល មាន៤ក្រុម និង១ពូលទៀតមាន ៥ក្រុម យោងទៅតាមការចាប់ឆ្នោត។ ភាគខាងលិច វិញនឹងមាន២៥ប្រទេសចូលរួមប្រកួត ដោយបែងចែកចេញ ៦ពូល ក្នុងនោះមាន៥ពូល មាន៤ក្រុម និង១ពូលទៀតមាន ៥ក្រុម។ AFC មិនបញ្ជាក់ពីកាលបរិច្ឆេទនៃការប្រកួតនិងចាប់ឆ្នោតបែងចែកពូល នៅឡើយនោះទេ។ ការប្រកួតទំនងធ្វើឡើងអំឡុងខែតុលា ខាងមុខ ហើយក្រុមល្អៗនឹងដំណើរការជុំផ្ដាច់ព្រ័ត្រនៅឆ្នាំ២០២០ ដែលធ្វើឡើងនៅប្រទេសជប៉ុន។
សូមរំលឹកថា កាលពីឆ្នាំ២០១៧ កន្លងទៅកម្ពុជា ធ្លាប់ទទួលបានសិទ្ធិធ្វើជាម្ចាស់ផ្ទះក្នុងវគ្កជម្រុះនេះម្តងហើយដោយកាលនោះស្ថិតនៅពូល G ជាមួយចិន, មីយ៉ាន់ម៉ា និងហ្វីលីពីន តែកាលនោះមានតែក្រុមចិនទេ ដែលឡើងទៅជុំបន្តក្នុងនាមជាក្រុមកំពូលតារាង ខណៈកម្ពុជា ឈរលេខ២ មាន៤ពិន្ទុ លើមីយ៉ាន់ម៉ា មាន៣ពិន្ទុ និងហ្វីលីពីន នៅបាតតារាងមាន១ពិន្ទុ។ កាលនោះកម្ពុជា ចាញ់ចិន១ទល់០ តែឈ្នះ មីយ៉ាន់ម៉ា ៣ទល់២ និងរស្មី ជាមួយហ្វីលីពីន ០ទល់០៕
Source: Kampuchea Thmey Daily
0 Comments