កុមារា Kasidef Vasunan ដែលមានឪពុកជាជនជាតិថៃ និងម្តាយជាជនជាតិខ្មែរ និងជាសមាជិករបស់យុវជនថ្នាលក្លិបបឹងកេតអែហ្វស៊ី ក្នុងលីគកំពូលកម្ពុជា ពោលគឺកូនប្រុសបង្កើតរបស់លោកស្រី ពុធ ធីតា ប្រធានក្លិបបាល់ទាត់បឹងកេត ត្រូវធ្វើដំណើរទៅទឹកដីCamp Nou របស់ក្លិបយក្ស FC Barcelona ក្នុងប្រទេសអេស្ប៉ាញ ម្តងទៀតក្រោយជាប់ឈ្មោះក្នុងវគ្គធ្វើតេស្តសមត្ថភាពវគ្គជម្រុះបឋម។
យោងតាមការឲ្យដឹងពីប្រភពមកពីក្លិបបឹងកេត បានបញ្ជាក់ថា «អបអរសាទរ ដល់យុវជនថ្នាលក្លិបបឹងកេត Dome Kasidej ដែលជាកូនប្រុស របស់អ្នកស្រីប្រធានក្លិប ពុធ ធីតា ជាប់ការធ្វើតេស្តវគ្គទីមួយ នៅយុវជនថ្នាលក្លិប FC Barcelona ប្រទេសអេស្ប៉ាញ។ Dome នឹងត្រូវចូលរួមវគ្គទីពីរ នៅថ្ងៃទី ៥ ខែ ឧសភា សាជាថ្មី តាមការកោះហៅរបស់ សាលាបាល់ទាត់ក្លិប Barcelona (FCBESCOLA)។សូមជូនពរដល់ DOME ទទួលបាននូវបទពិសោធន៍ និងបច្ចេកទេសបាល់ទាត់ដ៏ល្អពីសាលាបាល់ទាត់ BARCELONA»។
Dome បានចេញដំណើរទៅកាន់ប្រទេសអេស្ប៉ាញ តាមការកោះហៅរបស់សាលាបាល់ទាត់ក្លិប Barcelona ( FCBESCOLA ) កាលពីថ្ងៃអាទិត្យ ទី៧ ខែមេសាខាង ថ្មីដើម្បីធ្វើតេស្តចូលរួមក្នុង FC Barcelona ខណៈរូបគេធ្លាប់បានទៅហ្វឹកហាត់កន្លងមកនៅទីនោះ និងទទួលបានការចាប់អារម្មណ៍ពីក្រុមគ្រូបង្ហាត់ផងដែរ។ នេះគឺជាលើកទី៤ របស់កុមារា DOME ដែលធ្វើដំណើរទៅកាន់ប្រទេសអេស្ប៉ាញ បន្ទាប់ពីការទៅចូលរួមហ្វឹកហាត់២លើកកន្លងមក កាលពីឆ្នាំ ២០១៨ ជាមួយនឹងកុមារជាច្រើននាក់មកពីជុំវិញពិភពលោក។
លោក បែ មករា អ្នកចាត់ការបឹងកេត ធ្លាប់បានឲ្យដឹងថា Kasidef Vasunan ជាយុវជនរបស់បឹងកេត(Academy) ដែលហ្វឹកហាត់រាល់ថ្ងៃ តាំងពីការបើកបង្ហាត់យុវជន៣ឆ្នាំមកហើយ ប៉ុន្តែរូបគេធ្លាប់បានទៅហ្វឹកហាត់រយៈពេលប្រហែល១សប្ដាហ៍ នៅសាលាបាល់ទាត់ Barcelona ប្រចាំនៅប្រទេសសិង្ហបុរី (បើករយៈពេលខ្លី) កាលពីឆ្នាំ២០១៧ថ្មីៗ។ ទេពកោសល្យ និង ការលេងបាល់របស់កុមារាវ័យ១០ឆ្នាំរូបនេះ បានទាក់ចំណាប់គ្រូយុវជនថ្នាលរបស់ក្លិប Barce ដែលទៅបង្វឹកនៅប្រទេសសិង្ហបុរី ហើយក៏ទទួលបានការអញ្ជើញទៅហ្វឹកហាត់នៅទីលាន Camp Nou ម្តងទៀតនៅដើមឆ្នាំ២០១៨៕
Source: Kampuchea Thmey Daily
0 Comments