កាលពីថ្ងៃព្រហស្បតិ៍កន្លងទៅ ក្រុម Real Madrid បានធ្លាក់ពិន្ទុជាលើកទី៣ អំឡុង៧ប្រកួតរបស់ពួកគេ ចាប់តាំងពីការវិលត្រឡប់មកវិញរបស់លោក Zinedine Zidane ពេលដែលពួកគេបានត្រឹមរកបានលទ្ធផលស្មើ០-០ប៉ុណ្ណោះជាមួយក្រុមម្ចាស់ផ្ទះ Getafeនៅការប្រកួត La Liga គឺជាការប្រកួតមួយធ្វើឲ្យប៉ះពាល់ដល់ក្តីសង្ឃឹមរបស់ក្រុមជិតខាងមួយនេះ ក្នុងការដណ្តើមបានតំណែងកំពូលទាំង៤ផងដែរ។
លទ្ធផលស្មើនេះ បានធ្វើឲ្យក្រុមលេខ៣ Real Madridមានរហូតដល់ទៅ១៥ពិន្ទុ តាមពីក្រោយក្រុមកំពូលតារាង Barcelona និងមាន៦ពិន្ទុតាមពីក្រោយក្រុមលេខ២ Atletico Madrid ក្រោយលេងបាន៣៤ប្រកួត។
ក្រុម Getafeដែលមិនធ្លាប់ដែលលេងនៅការប្រកួត Champions Leagueនោះ ឈរនៅលេខរៀងទី៤ មាន៥៥ពិន្ទុស្មើជាមួយក្រុម Sevillaដែលបានបំបាក់ក្រុម Rayo Vallecano៥-០កាលពីព្រឹកថ្ងៃព្រហស្បតិ៍។
ជាថ្មីម្តងទៀតហើយដែលលោក Zidane បានធ្វើការផ្លាស់ប្តូរកីឡាករលេងជាច្រើននាក់នៅក្នុងក្រុមរបស់គាត់ ខណៈពេលដែលលោកធ្វើការផ្លាស់ប្តូរទម្រង់លេងរបស់ក្រុមលោក មុនពេលចាប់ផ្តើមរដូវកាលក្រោយ ជាមួយនឹងការលេងដោយគ្មានវត្តមានរបស់កីឡាករ Marcelo, Luka Modric, Toni Kroos និងកីឡាករ Marco Asensio ។
កីឡាករវ័យក្មេង Brahim Diaz បានក្លាយជាកីឡាករលេងសកម្មជាងគេ ពេលដែលការស៊ុតបាល់របស់គាត់២លើក ត្រូវបានជួយសង្គ្រោះបានដោយអ្នកចាំទី Keylor Navas៕
Source: Kampuchea Thmey Daily
0 Comments