ការិយាល័យប្រឆាំងបទល្មើសសេដ្ឋកិច្ច ចាប់រថយន្តយីឌុបដឹកឈើ ប្រគល់ឲ្យជំនាញរដ្ឋបាលព្រៃឈើ

ស្ទឹងត្រែង ៖ រថយន្តយីឌុប1 គ្រឿង ដឹកឈើខុសច្បាប់ ត្រូវបាន លោកវរសេនីយ៍ឯក វ៉ា សុផាន់នាយការិយាល័យប្រឆាំងបទល្មើសដឹកនាំកម្លាំងចុះបង្ក្រាបនៅក្នុងទឹកដីរដ្ឋបាលព្រៃឈើស្រុកថាឡាបរិវ៉ាត់ ប្រគល់ឲ្យជំនាញចាត់ការបន្ត។

ប្រតិបត្តិការបង្ក្រាបទីតាំងរថយន្តដឹកឈើខាងលើនេះ ត្រូវបានកម្លាំងការិយាល័យប្រឆាំងបទល្មើសសេដ្ឋកិច្ចធ្វើការបង្ក្រាបកាលពីវេលាម៉ោង 21 និង 30 នាទីយប់ ថ្ងៃទី 9 ខែមេសា ឆ្នាំ 2019 នៅចំណុចភូមិឆ្វាំង ឃុំសំអាង ស្រុកថាឡាបរិវ៉ាត់ ខេត្តស្ទឹងត្រែង។

លោកវរសេនីយ៍ឯក វ៉ា សុផាន់ នាយការិយាល័យប្រឆាំងបទល្មើសសេដ្ឋកិច្ចបានឲ្យដឹងថា រថយន្តយីឌុបខាងលើនេះ តែងតែលបលួចធ្វើសកម្មភាពនៅក្នុងចំណុចខាងលើជាយូរណាស់មកហើយ ដោយសារតែមានការស្រាវជ្រាវនិងស៊ើបអង្កេតដោយកម្លាំងជំនាញរយៈពេលយូរ ទើបឈានដល់ការបង្ក្រាបរថយន្តដឹកឈើខាងលើនេះបាន។

តាមប្រភពព័ត៌មានបាននិយាយថា រថយន្តយីឌុបដែលសមត្ថកិច្ចបង្ក្រាបនេះ ត្រូវបានគេកែច្នៃឈើគ្រឿងផ្ទះធ្វើជាឈើចាស់ដែលគេយកទៅត្រាំទឹក ឬក៏គេវាយដែកគោល ហើយដាក់ពាក្យសុំថាជាឈើគ្រឿងផ្ទះ តែការពិតឈើនោះ សុទ្ធសឹងតែជាថ្មីតែគេកែច្នៃវ៉ៃដែកគោលលាក់បន្លែបន្លំភ្នែកសមត្ថកិច្ច តែក្រោយពីការស៊ើបអង្កេតដឹងសមត្ថកិច្ចជំនាញបានចុះទៅដល់ទីតាំង និងបានសហការជាមួយរដ្ឋបាលព្រៃឈើធ្វើការបង្ក្រាប និងរឹបអូសរថយន្តនោះមកកាន់ស្នងការដ្ឋាននគរបាលខេត្តស្ទឹងត្រែងប្រគល់ឲ្យជំនាញ។

បើតាមការឲ្យដឹងពីប្រជាពលរដ្ឋបានលើកឡើងថា រថយន្តនេះ តែងតែធ្វើសកម្មភាពដឹកជញ្ជូន និងមានសុំច្បាប់ថាជាឈឺផ្ទះចាស់ៗ តែតាមការពិតឈើទាំងនោះ សុទ្ធសឹងតែជាឈើថ្មីគេយកមកត្រាំទឹកឲ្យក្លាយជាឈើចាស់ៗដើម្បីសុំច្បាប់ដឹកជញ្ជូនយកទៅកាន់ទីផ្សារ ដើម្បីលក់ចំណេញយកប្រាក់តែប៉ុណ្ណោះ។

ប្រភពបានបន្តទៀតថា ការដឹកជញ្ជូនបាននូវឈើខុសច្បាប់នេះ វាអាស្រ័យដោយសារតែមានការត្រូវរ៉ូវពីសមត្ថកិច្ចនៅក្នុងមូលដ្ឋាន និងការត្រូវរ៉ូវជាមួយផ្នែករដ្ឋបាលព្រៃឈើស្រុកថាឡាបរិវ៉ាត់ហើយបើសិនជាគ្មានការស៊ើបអង្កេតពីជំនាញការិយាល័យប្រឆាំងបទល្មើសសេដ្ឋកិច្ចនោះទេ រថយន្តទាំងនេះ គឺមិនអាចបង្ក្រាបបានឡើយ និងធ្វើការដឹកជញ្ជូនជារៀងរហូតតែក្រោយពីការចុះបង្ក្រាបរបស់កម្លាំងការិយាល័យប្រឆាំងបទល្មើសសេដ្ឋកិច្ចរកឃើញរថយន្តដឹកឈើទើបសហការជាមួយរដ្ឋបាលព្រៃឈើចុះបង្ក្រាបតែម្ដង។

បច្ចុប្បន្ន រថយន្តដឹកឈើ ត្រូវបានប្រគល់ឲ្យជំនាញរដ្ឋបាលព្រៃឈើយកទៅរក្សាទុកនៅខណ្ឌរដ្ឋបាលព្រៃឈើខេត្ត ដើម្បីចាត់ការទៅតាមនីតិវិធី។ ចំណែកឈើដែលនៅក្នុងរថយន្តនោះ គេមិនទាន់បានធ្វើការវាស់វែងនៅឡើយទេ បើតាមការប៉ាន់ស្មានមានប្រហែលជាជាង 10ម៉ែត្រគូបឯណោះ៕