ព្រះសីហនុ ៖ នៅរសៀលថ្ងៃទី២៣ ខែមេសា ឆ្នាំ២០១៩ នៅសាលាខេត្តព្រះសីហនុ បានបើកកិច្ចប្រជុំស្តីពីការគ្រប់គ្រងប្រព័ន្ធលូ អូរ ប្រឡាយក្នុងក្រុងព្រះសីហនុ។
ពិធីនេះ បានធ្វើឡើងក្រោមការដឹកនាំដោយលោក ជាវ វិជ្ជាក់ អភិបាលរងខេត្តព្រះសីហនុ និងជាប្រធានក្រុមការងារលូ អូរ ប្រឡាយ ដោយមានការ ចូលរួមពីអាជ្ញាធរភូមិ សង្កាត់ ក្រុង និងមន្ត្រីជំនាញពាក់ព័ន្ធ។ លោក ហេង ប៉េងហាក់ ប្រធានសាខាក្រុមហ៊ុនប្រមូលសំរាម KSWM បានលើកឡើងពី បញ្ហាងាយស្រួល និងប្រឈមមួយចំនួន នាពេលបច្ចុប្បន្ន។ ក្នុងនោះបញ្ហាប្រឈម មានដូចជា ទី១- ខ្វះកម្លាំងពលកម្ម ២- ទីលានចាក់សំរាមនៅឆ្ងាយ ៣-ការស្ទះចរាចរណ៍ ៤- ហេដ្ឋារចនាសម្ព័ន្ធមិនអាចចូលទៅប្រមូលសំរាមបាន។ ដែលបច្ចុប្បន្ននេះ ក្រុមហ៊ុនបានប្រមូលសំរាមចម្រុះ ដោយវេចខ្ចប់មិនបានញែកចេញ ដូចជាសំបកកេស និងកំប៉ុង ម្យ៉ាងទៀតសំរាមបានកើនឡើងជាបន្តបន្ទាប់ ហើយការបង់ថ្លៃសេវាប្រមូលសំរាមមិនបានទៀងទាត់ ។ លោកក៏បានសំណូមពរប្រជាពលរដ្ឋចូលរួមសហការ វេចខ្ចប់សំរាមឱ្យបានត្រឹមត្រូវ ទើបទីក្រុងរបស់យើងមានសោភ័ណភាព។ ជាមួយគ្នានេះផងដែរ អាជ្ញាធរភូមិ និងសង្កាត់ទាំង៤ ក៏បានលើកឡើងពីបញ្ហាប្រឈម នាពេលបច្ចុប្បន្នក្នុងក្រុងព្រះសីហនុ ដោយបានលើកឡើងថា ក្រុមហ៊ុនប្រមូលសំរាម KSWM មិនបានមកប្រមូលសំរាមបានទាន់ពេលវេលា និងមិនបានភ្ជាប់សេវាប្រមូលសំរាមជាមួយប្រជាពលរដ្ឋនៅមូលដ្ឋាន ហើយអាជ្ញាធរភូមិ សង្កាត់នៅរង់ចាំសហការជាមួយក្រុមហ៊ុនប្រមូលសំរាម ដើម្បីភ្ជាប់សេវាសំរាម និងប្រមូលសំរាមចេញពីក្រុងព្រះសីហនុ ក្នុងគោលបំណងលើកស្ទួយ សោភណភាព បរិស្ថានល្អ ជាក្រុងទេសចរណ៍ឱ្យមានភាពទាក់ទាញ និងបៃតង ។
មានប្រសាសន៍ឆ្លើយតបនឹងការលើកឡើងនេះដែរ លោក ជាវ វិជ្ជាក់ អភិបាលរងខេត្តព្រះសីហនុ និងជាប្រធានក្រុមការងារលូ អូរ ប្រឡាយ បានធ្វើការពិភាក្សា ពិគ្រោះយោបល់ និងបានវាយតម្លៃ ព្រមទាំងបានជំរុញឱ្យអាជ្ញាធរភូមិ សង្កាត់ ចូលរួម ជាមួយក្រុមហ៊ុនប្រមូលសំរាម គឺទី១ រកទីតាំងដាក់ធុងសំរាម និងសហការជាមួយក្រុមហ៊ុន KSWM ប្រមូលសំរាមក្នុងការផ្ទេរដឹកសំរាមចេញបានទាន់ ពេលវេលា។ ចុះផ្សព្វផ្សាយដល់ប្រជាពលរដ្ឋ ឱ្យបានយល់ដឹងក្នុងការទុកដាក់ វេចខ្ចប់សំរាម និងបែងចែកពេលវេលាក្នុងការបញ្ចេញសំរាមនៅតាមទីតាំងដែលបានកំណត់។ ទី២ ចំពោះសំរាមដែលបោះចោលក្នុងអូរ ប្រឡាយ ត្រូវរួម គ្នាដោះស្រាយ ចុះស្តារឡើងវិញ និងរកមធ្យោបាយកែលម្អអនាម័យ បរិស្ថាននៅតាមភូមិ សង្កាត់ ឱ្យមានសោភ័ណភាព ជាទីក្រុងទេសចរណ៍ នាទិសនិរតី ពិសេសដោយសារតែនៅខែខាងមុខរដូវ ភ្លៀងនឹងចូលមកដល់ ដើម្បីបញ្ចៀសការកកស្ទះសំរាមក្នុងអូរ ប្រឡាយ នាំឱ្យបង្កជាជំនន់ទឹកភ្លៀងជន់លេចផ្ទះប្រជាពល រដ្ឋក្នុងក្រុងព្រះសីហនុ៕
Source: Kampuchea Thmey Daily
0 Comments