មេដឹកនាំកូរ៉េខាងជើងលោកគីមជុងអ៊ុនបានឆ្លងព្រំដែនចូលក្នុងប្រទេសរុស្ស៊ីនៅថ្ងៃពុធសម្រាប់កិច្ចប្រជុំកំពូលជាលើកដំបូងជាមួយលោកវ្ល៉ាឌីមៀរពូទីនខណៈទីក្រុងព្យុងយ៉ាងកំពុងស្វែងរកទំនាក់ទំនងកាន់តែជិតស្និទ្ធជាមួយសម្ព័ន្ធមិត្តជាប្រពៃណីរបស់ខ្លួនស្របពេលមានការជាប់គាំងបញ្ហានុយក្លេអ៊ែរជាមួយសហរដ្ឋអាមេរិក។
កិច្ចប្រជុំថ្ងៃព្រហស្បតិ៍នៅទីក្រុង Vladivostok នឹងក្លាយ ជាកិច្ចពិភាក្សាទល់មុខជាលើកដំបូងរបស់លោកគីមជាមួយប្រមុខរដ្ឋផ្សេងទៀតចាប់តាំងពីកិច្ចចរចារបស់លោកជាមួយប្រធានាធិបតីអាមេរិកដូណាល់ត្រាំនៅទីក្រុងហាណូយបានដួលរលំកាលពីខែកុម្ភៈ។
មុននេះ ទីភ្នាក់ងារសារព័ត៌មាន KCNA របស់កូរ៉េខាងជើងបានរាយការណ៍ពីការចាកចេញរបស់លោកតាមរថភ្លើងជាមួយរដ្ឋមន្ត្រីក្រសួងការបរទេសរបស់លោកឈ្មោះ Ri Yong Ho ដែលបានប្រាប់អ្នកកាសែតបន្ទាប់ពីជំនួបកំពូលនៅប្រទេសវៀតណាមថា ជំហររបស់ប្រទេសនេះនឹងមិនផ្លាស់ប្តូរទេ។
ចំណែកឯប្រព័ន្ធផ្សព្វផ្សាយរបស់រុស្ស៊ីបានរាយកាណ៍ថា រថភ្លើងពាសដែកឯកជនរបស់លោកគីមបានមកដល់កាលពីថ្ងៃពុធនៅទីក្រុងព្រំដែនរុស្ស៊ី Khasan។ទង់ជាតិរុស្ស៊ីនិងកូរ៉េខាងជើងត្រូវបានដាក់រួចទៅហើយនៅតាមបង្គោលភ្លើងបំភ្លឺផ្លូវកាលពីថ្ងៃអង្គារលើកោះ Russky របស់ទីក្រុង Vladivostok ដែលជាកន្លែងកិច្ចប្រជុំកំពូលនេះត្រូវបានគេរំពឹងថានឹងប្រព្រឹត្តទៅនៅបរិវេណសកលវិទ្យាល័យមួយ។
កិច្ចពិភាក្សានេះបានធ្វើឡើងតាមការអញ្ជើញម្តងហើយម្តងទៀតពីលោកពូទីនចាប់តាំងពីលោកគីមបានចាប់ផ្តើមដំណើរការការទូតរបស់លោកកាលពីឆ្នាំមុន។ចាប់តាំងពីខែមីនាឆ្នាំ២០១៨មក មេដឹកនាំកូរ៉េខាងជើងបានរៀបចំកិច្ចប្រជុំចំនួន៤លើកជាមួយប្រធានាធិបតីចិនលោកស៊ីជីនភីង, ៣លើកជាមួយលោកមូនចេអ៊ីនរបស់កូរ៉េខាងត្បូង, ២លើកជាមួយលោកត្រាំ និងមួយលើកជាមួយប្រធានាធិបតីវៀតណាម។ ក្រុមអ្នកវិភាគបាននិយាយថា ឥឡូវនេះគាត់កំពុងស្វែងរកការគាំទ្រអន្តរជាតិដ៏ទូលំទូលាយក្នុងការប្រឈមមុខរបស់គាត់ជាមួយក្រុងវ៉ាស៊ីនតោន៕ AFP
Source: Kampuchea Thmey Daily
0 Comments