អភិបាលខេត្តព្រៃវែង ចុះពិនិត្យផ្លូវ និងប្រឡាយ នៅស្រុកព្រះស្តេច

ព្រៃវែង ៖ កាលពីថ្ងៃ៧រោច ខែចេត្រ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី២៦ ខែមេសា ឆ្នាំ២០១៩ ឯកឧត្តម ជា សុមេធី អភិបាលខេត្តព្រៃវែង អបដំណើរដោយអភិបាលរងខេត្ត ប្រធានមន្ទីរពាក់ព័ន្ធមួយចំនួន កងកម្លាំងទាំងបី លោកអភិបាលស្រុកព្រះស្តេច បានអញ្ជើញពិនិត្យមើលផ្លូវពីផ្សារកំពង់សឹង រហូតដល់ផ្សារដីក្រហម នៅឃុំរាធរ និងបានបន្តដំណើរដល់កែងវត្តអំពិលតាមទំនប់ពោធិបូរីមកកាត់ផ្លូវសាលាឃុំក្រាំងត្រយ៉ង រួចបត់មកផ្លូវទំនប់អូតាសៅ មកដល់កែង ភូមិសុរិយា ឃុំបឹងដោ។

នៅព្រឹកថ្ងៃដដែលនេះដែរ ឯកឧត្ដម និងប្រតិភូអមដំណើរ បានចុះពិនិត្យមើលស្ថានភាពប្រឡាយទឹកបូព៌ា និងបានបន្តពិនិត្យមើលស្ថានភាពផ្លូវលេខ៣១២A ឃុំសេនារាជ្យឧត្តម និង បានពិនិត្យមើលផ្លូវជាប់ច្រាំងទន្លេព្រែកក្តួច ឃុំល្វា ស្រុកព្រះស្តេច ខេត្តព្រៃវែង។

ឯកឧត្ដម ជា សុមេធី អភិបាលខេត្ត បានណែនាំមន្ទីរសាធារណការ និងដឹកជញ្ជូន មន្ទីរអភិវឌ្ឍន៍ជនបទ និងមន្ទីរធនធានទឹក កសាងផ្លូវ និងប្រព័ន្ធធារាសាស្ត្រជូនប្រជាពលរដ្ឋ ឲ្យបានឆាប់តាមតែអាចធ្វើទៅបាន ដើម្បីឲ្យបងប្អូនប្រជាពលរដ្ឋធ្វើដំណើរបានស្រួល និងបានទឹកប្រើប្រាស់ស្រោចស្រពដំណាំស្រូវឲ្យបាន៣ដងក្នុងមួយឆ្នាំ ជាពិសេសដើម្បីទប់ស្កាត់ការធ្វើចំណាកស្រុករបស់ប្រជាពលរដ្ឋ និងការកាត់បន្ថយនូវភាពក្រីក្រផង៕