ភ្នំពេញ ៖ ក្រសួងការងារ និងបណ្តុះបណ្តាលវិជ្ជាជីវៈកាលពីថ្ងៃទី២៤ ខែមេសា ឆ្នាំ២០១៩ បានប្រារព្ធពិធីអបអរសាទរខួបអនុស្សាវរីយ៍ លើកទី១៣៣ ទិវាពលកម្មអន្តរជាតិ ១ ឧសភា ឆ្នាំ២០១៩ក្រោមអធិបតីភាពលោកបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ។
លោករដ្ឋមន្ត្រីបានមានប្រសាសន៍ថា ដូចរៀងរាល់ឆ្នាំដែរ ព្រឹត្តិការណ៍ទិវាពលកម្មអន្ដរជាតិ ១ ឧសភា ត្រូវបានប្រារឰយ៉ាងអធិកអធម ហើយឆ្នាំនេះ រាជរដ្ឋាភិបាលក៏បានចេញសារាចរណែនាំ និងសារលិខិត ដើម្បីបំផុសលើកទឹកចិត្តកម្មករនិយោជិត និងជនរួមជាតិ។ ប៉ុន្មានថ្ងៃនេះ មានរោងចក្រ សហគ្រាស ជាច្រើនបានរៀបចំ កម្មវិធីសំណេះសំណាលជាមួយកម្មករនិយោជិត កម្មវិធីកម្សាន្ដសប្បាយ ពិធីជប់លៀងរាំកម្សាន្ដ រៀបចំដំណើរទេសចរណ៍ និងរៀបចំឲ្យកម្មករកម្មការិនីសម្រាកលំហែ។ល។ ដែលនាំមកនូវបរិយាកាសសាមគ្គីភាព ភាតរភាពក្នុងសង្គម។
លោករដ្ឋមន្ត្រីបានថ្លែងអំណរគុណដល់គ្រប់ភាគីពាក់ព័ន្ធ ដែលបានចូលរួមក្នុងទិវានេះប្រកបដោយស្មារតីស្ថាបនា និងសូមអរគុណដល់ក្រុមការងារដែលបានខិតខំរៀបចំអបអរសាទរខួបអនុស្សាវរីយ៍លើកទី១៣៣ នៃទិវាពលកម្ម អន្ដរជាតិ ១ ឧសភា ឆ្នាំ២០១៩ ដ៏ឱឡារិកនាពេលនេះ»។
លោករដ្ឋមន្ត្រីបានបន្ថែមថា ការប្រារព្ធមីទ្ទិញថ្នាក់ជាតិថ្ងៃទី១ ឧសភា ឆ្នាំ២០១៩ នាពេលនេះគឺស្របពេលនឹងសភាពការណ៍របស់ប្រទេសជាតិ បាននឹងកំពុងបន្តរក្សាបានសន្តិភាព ស្ថិរភាពនយោបាយ និងបន្តជំរុញកំណើនសេដ្ឋកិច្ចជាតិប្រកបដោយជោគជ័យ ហើយក៏ជាការចូលរួមចំណែកមួយដ៏សំខាន់ក្នុងការអនុវត្តគោលនយោបាយជាអាទិភាពរបស់រាជរដ្ឋាភិបាលនីតិកាលទី៦ សំដៅលើកកម្ពស់ផលិតភាព និងភាពប្រកួតប្រជែង ដើម្បីបន្តកែប្រែរចនាសម្ព័ន្ធសេដ្ឋកិច្ចជាតិ ឲ្យរក្សាបាននូវកំណើន និងការបង្កើនការងារកាន់តែល្អប្រសើរ។
រាជរដ្ឋាភិបាលកម្ពុជាបានអនុវត្តគោលនយោបាយធានានូវការគោរព សិទ្ធិការងារ លក្ខខណ្ឌការងារ ស្របតាមច្បាប់ និងអនុសញ្ញាអន្តរជាតិខាងការងារដែលកម្ពុជាបានផ្តល់សច្ចាប័ន ដោយចាត់ទុកការអនុវត្តសិទ្ធិការងារ គឺជាការអនុវត្តសិទ្ធិមនុស្ស ដោយបានដាក់ចេញនូវនយោបាយផ្សារភ្ជាប់ពាណិជ្ជកម្មទៅនិងលក្ខខណ្ឌការងារ សហការជាមួយគម្រោងឃ្លាំមើលលក្ខខណ្ឌការងារនៅកម្ពុជា ដែលបច្ចុប្បន្នជា គម្រោងរោងចក្រកាន់តែប្រសើរនៅកម្ពុជា (ILO-BFC) ដែលបង្ហាញពីឆន្ទៈនិងតម្លាភាពនៃបរិយាកាស ការងារនៅកម្ពុជា។
ទន្ទឹមនឹងនេះ រាជរដ្ឋាភិបាលក៏បានបន្តយកចិត្តទុកដាក់ ក្នុងការអភិវឌ្ឍទំនាក់ទំនងវិជ្ជាជីវៈ ដោយបានបង្កើតឲ្យមានយន្តការត្រីភាគី សម្រាប់សំវាទសង្គម និងការដោះស្រាយបញ្ហាជាច្រើនទាក់ទងទៅនឹងសិទ្ធិ និងផលប្រយោជន៍របស់កម្មករនិយោជិតនិងនិយោជក ជាអាទិ៍ក្រុមប្រឹក្សាអាជ្ញាកណ្តាល ដែលជាយន្តការដោះស្រាយវិវាទការងារប្រកបដោយវិជ្ជាជីវៈ និងមានការទទួលស្គាល់ពីគ្រប់មជ្ឈដ្ឋាន។ គណៈកម្មការប្រឹក្សាការងារបាន ចរចាកំណត់បទដ្ឋានពាក់ព័ន្ធជាច្រើន និងបានបង្កើតក្រុមការងារត្រីភាគី សម្រាប់ចរចាប្រាក់ឈ្នួលអប្បបរមាបានដោះស្រាយការកំណត់ប្រាក់ឈ្នួល អប្បបរមា ប្រកបដោយសុខដុមរមនា។
ដើម្បីបន្តស្មារតីទិវាពលកម្មអន្តរជាតិ ១ ឧសភា ក្រសួងការងារ និងបណ្តុះបណ្តាលវិជ្ជាជីវៈ បាននឹងកំពុងយកចិត្តដាក់លើប្រការមួយចំនួនដូចជា១-បន្តខិតខំលើកកម្ពស់លក្ខខណ្ឌការងារឲ្យកាន់តែប្រសើរឡើង ពង្រឹងការអនុវត្តច្បាប់ស្តីពីការងារ, ច្បាប់ស្តីពីសហជីព និងលិខិតបទដ្ឋានពាក់ព័ន្ធ។ បន្តពង្រឹងយន្តការអធិការកិច្ចការងារឲ្យកាន់តែមានប្រសិទ្ធភាព និងតម្លាភាព ពង្រឹងភាពសុខដុមរមនានៃទំនាក់ទំនងវិជ្ជាជីវៈ លើកកម្ពស់ការយល់ដឹងអំពីសិទ្ធិ និងកាតព្វកិច្ចស្របច្បាប់របស់កម្មករនិយោជិត និងនិយោជក ព្រមទាំងបង្កើនការអនុវត្តប្រកបដោយ ប្រសិទ្ធភាពនូវបទបញ្ជាលេខ០២បប ចុះថ្ងៃទី០៦ ខែធ្នូ ឆ្នាំ២០១៦ ស្តីពីការអនុវត្តផែនការស្តីពីការទប់ស្កាត់ និងដោះស្រាយបញ្ហាកូដកម្ម បាតុកម្ម នៅតាមគ្រប់មុខសញ្ញា ឆ្នាំ២០១៦-២០១៩, បទបញ្ជាលេខ០៣បប ចុះថ្ងៃទី២៧ ខែមីនា ឆ្នាំ២០១៣ ស្តីពីការរក្សាការពារ សន្តិសុខ សណ្តាប់ធ្នាប់សាធារណៈ នៅតាមតំបន់រោងចក្រ សហគ្រាស និងតំបន់ឧស្សាហកម្ម វិធានការការពារទប់ស្កាត់កូដកម្ម បាតុកម្ម និងដោះស្រាយវិវាទដោយសន្តិវិធី និងស្របតាមនីតិវិធីច្បាប់ បទប្បញ្ញត្តិ និងអនុសញ្ញាអន្តរជាតិពាក់ព័ន្ធនឹងវិស័យការងារ។
២-បន្តរៀបចំនូវបណ្តាលិខិតបទដ្ឋានគតិយុត្តិសម្រាប់ដាក់ឲ្យដំណើរ ការការអនុវត្តច្បាប់ស្តីពីសហជីព និងច្បាប់ស្តីពីប្រាក់ឈ្នួលអប្បបរមា។ ៣-បន្តអនុវត្តអនុសាសន៍ទាំង ១០ចំណុច របស់ សម្តេចតេជោនាយករដ្ឋមន្ត្រី ឲ្យមានប្រសិទ្ធភាពខ្ពស់។ ៤-បន្តអនុវត្តកម្មវិធីពិភាក្សាប្រាក់ឈ្នួលអប្បបរមាប្រចាំឆ្នាំតាមរូបមន្ត និងយន្តការត្រីភាគីដែលគ្រប់ភាគី ទទួលយកបានកន្លងមកក្នុងការកំណត់ការដំឡើងប្រាក់ឈ្នួលអប្បបរមា សម្រាប់កម្មករនិយោជិតផ្នែកវាយនភណ្ឌកាត់ដេរ និងផលិតស្បែកជើង។ ៥-បន្តលើកទឹកចិត្តដល់មាតាបិតា អាណាព្យាបាល កម្មករនិយោជិត និងយុវជន ដើម្បីទទួលការបណ្តុះបណ្តាលបច្ចេកទេសវិជ្ជាជីវៈ ដើម្បីលើកកម្ពស់ជំនាញ ផលិតភាពការងារ និងមានសមត្ថភាពប្រកួត ប្រជែង។ ៦-បន្តពង្រឹងការអនុវត្តអនុសញ្ញាអន្តរជាតិខាងការងារដែលបានផ្តល់សច្ចាប័ន។ បន្តសហការជាមួយគម្រោងរោងចក្រកាន់តែប្រសើរនៅកម្ពុជា (ILO-BFC), គម្រោងបទដ្ឋានសង្គម និងការងារក្នុងវិស័យវាយនភណ្ឌ និងកាត់ដេរនៅទ្វីបអាស៊ី (GIZ-SLSG) នៅប្រទេសកម្ពុជា, គម្រោងគំនិតផ្តួចផ្តើមកិច្ចព្រមព្រៀងជាសកល (Global Deal Initiative), កម្មវិធីរួមគ្នារបស់អង្គការ សហប្រជាជាតិ “រួមគ្នាដើម្បីមុខរបរ និងការងារ របស់យុវជននៅកម្ពុជា”, កម្មវិធីការងារសមរម្យប្រចាំប្រទេសកម្ពុជាឆ្នាំ២០១៩-២០២៣ និងគម្រោងសហការជាមួយដៃគូអភិវឌ្ឍផ្សេងទៀត ដើម្បីរួមគ្នាសម្រេចគោលដៅអភិវឌ្ឍប្រកបដោយចីរភាពរបស់អង្គការសហប្រជាជាតិ និងដើម្បីសម្រេចមហិច្ឆតាប្រែក្លាយកម្ពុជាទៅជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងទៅជាប្រទេសមានចំណូលខ្ពស់នៅឆ្នាំ២០៥០៕
Source: Kampuchea Thmey Daily
0 Comments