អ្នកប្រដាល់ជើងខ្លាំង៤រូប នឹងត្រូវជួបគ្នាប្រជែងដណ្តើមពានអនុស្សាវរីយ៍បាយ័នសម្រាប់ប្រភេទទម្ងន់៥៧គីឡូក្រាម ឆ្នាំ២០១៩។ អ្នកប្រដាល់ទាំង៤រូបនោះ រួមមាន កំពែង ខ្មៅ មកពីក្លិបសមាគមកីឡាប្រដាល់ក្រសួងកសិកម្ម , ហេង សុភ័ក្រ ក្លិបព្រៃទទឹងខេត្តបាត់ដំបង , ធន អៀងឡៃ សមាគមកីឡាប្រដាល់ក្រសួងការពារជាតិ និង ឯម សុធី ក្លិបថ្មគោលពោធិសែនជ័យ។
ពួកគេទាំង៤នាក់នេះ នឹងជួបប្រកួតគ្នានៅល្ងាចថ្ងៃសៅរ៍ទី២៧មេសា២០១៩នេះ នៅលើសង្វៀនបាយ័នស្ទឹងមានជ័យ។ អ្នកប្រដាល់ទាំង៤រូបនេះ ក្នុងការប្រកួតជម្រុះលើកដំបូងនោះ គឺកំពែង ខ្មៅ នឹងត្រូវជួបជាមួយហេង សុភ័ក្រ ហើយ ធន អៀងឡៃអ៊ូច ភារិទ្ធ ជួបជាមួយ ឯម សុធី ។
រវាងអ្នកប្រដាល់ កំពែង ខ្មៅ និង ហេង សុភ័ក្រ ពួកគេមិនធ្លាប់ប៉ះគ្នាទេកន្លងមក។ ពីរនាក់នេះ ពិបាកទស្សន៍ទាយណាស់ថា អ្នកណាឈ្នះ អ្នកណាចាញ់នោះ សម្រាប់ការជួបគ្នាលើកនេះ ព្រោះថាហេង សុភ័ក្រ ថ្វីត្បិតតែគេមានស៊ុហ្វខ្លាំង ប៉ុន្តែមិនប្រាកដថាគេអាចយកឈ្នះកំពែង ខ្មៅ នោះទេ ព្រោះកំពែង ខ្មៅ គេជាជើងខ្លាំងនិងមានទិចនិចប្រកួតល្អជាង ហើយមួយទៀត កំពែង ខ្មៅជាអ្នកប្រដាល់ដែលមានចិត្តប្រដាល់ធំ ស៊ូចំពោះការប្រកួត ។ និយាយរួម ហេង សុភ័ក្រ ពិបាកទប់ទល់ជាមួយកំពែង ខ្មៅ ហើយ ។
ចំពោះធនអៀងឡៃ និង ឯមសុធី វិញ ពួកគេទាំងពីរនេះ ក៏មិនធ្លាប់ជួបគ្នាដែរកន្លងមក។ រវាងពួកគេពីរនាក់នេះ ឯមសុធី ទំនងជាមិនអាចឈ្នះធនអៀងឡៃ ក្នុងការប្រកួតជម្រុះលើកដំបូងនោះ។
ទោះជាយ៉ាងណា ក្នុងចំណោមពួកគេ៤នាក់នេះ គេបានកត់សម្គាល់ឃើញថា កំពែង ខ្មៅ និង ធន អៀងឡៃ គេមានថ្វីដៃល្អដូចគ្នា ទាំងបទពិសោធន៍ ទាំងក្បាច់គុន ទាំងកម្លាំងស៊ុហ្វ ដែលអាចឆ្លងផុតវគ្គជម្រុះ ឈានដល់វគ្គផ្តាច់ព្រ័ត្របាន។ តែយ៉ាងណាក៏ដោយ គេមិនអាចទាយមុនបានថា ការប្រកួតដណ្តើមពានបាយ័នទម្ងន់៥៧គីឡូក្រាមឆ្នាំ២០១៩នេះ មិនដឹងថាធ្លាក់ទៅលើនរណានោះទេ។
គួរបញ្ជាក់អោយដឹងថា ការប្រកួតនេះប្រព្រឹត្តទៅតាមរូបមន្តជាMarathon គឺចាញ់ជ្រុះហាលអាវ ឈ្នះត្រូវបន្តការប្រកួតទៀត ទាល់តែរកឃើញជើងខ្លាំងម្ចាស់ពានក្នុងពេលតែមួយ។
ការប្រកួតចែកចេញជាពីរដំណាក់កាល ដែលដំណាក់កាលទី១ប្រកួតជម្រុះ ដើម្បីជម្រុះចោលពីរនាក់ដែលចាញ់ ហើយពីរនាក់ដែលឈ្នះនោះ ត្រូវឡើងទៅជួបគ្នាក្នុងដំណាក់កាលទី២ ដែលជាការប្រកួតផ្តាច់ព្រ័ត្រដណ្តើមពានអនុស្សាវរីយ៍របស់ស្ថានីយទូរទស្សន៍បាយ័ន ។ការប្រកួតក្នុងដំណាក់កាលទី១ គឺប្រកួតតែ៣ទឹកប៉ុណ្ណោះ ដោយក្នុងមួយទឹកមាន៣នាទី និងការប្រកួតក្នុងដំណាក់កាលផ្តាច់ព្រ័ត្រ គឺវាយ៥ទឹកតែមួយទឹកវាយតែ២នាទីទេ ។
ចំពោះការប្រកួតគូឯកវិញនោះ អេលីត កែវ ឡុង អ្នកប្រដាល់ក្លិបឆ្មាសសែនសុខគុនខ្មែរ ត្រូវគេផ្តល់ឪកាសមួយលើកទៀត អោយជួបសងសឹកជាមួយមាឃ វណ្ណារ៉ា អ្នកប្រដាល់ក្លិបរាជសីហ៍ខេត្តរតនគិរី ដោយប្រកួតគ្នាក្នុងទម្ងន់៦០គីឡូក្រាម ។
អេលីត កែវ ឡុង ធ្លាប់វាយចាញ់មាឃ វណ្ណារ៉ា ២លើកមកហើយ ដោយលើកទី១ វាយចាញ់ត្រឹមពិន្ទុ ដល់លើកទី២គេចាញ់សន្លប់ក្នុងទឹកទី២។ ប៉ុន្តែយ៉ាងណា រវាងពួកគេទាំងពីរនាក់នេះ មាឃ វណ្ណារ៉ា គេល្អនិងខ្លាំងជាងអេលីតកែវឡុង តែមិនច្បាស់ថាវណ្ណារ៉ាឈ្នះកែវឡុងទៀតនោះទេ។ដូច្នេះ ចាំមើល ការប្រកួតលើកនេះតើអេលីត កែវឡុង មានសំណាងឈ្នះមាឃ វណ្ណារ៉ា ឬអត់?៕
Source: Kampuchea Thmey Daily
0 Comments