អ្នកប្រដាល់ថៃឈ្មោះ Oup Sai គេនឹងត្រូវឡើងមកជួបប្រកួតជម្រះបញ្ជីជាមួយ យុគ យក្សផ្លែ អ្នកប្រដាល់ក្លិបបូរីរាជសីហ៍មានរិទ្ធ។ ពីរនាក់នេះ ប្រកួតគ្នាក្នុងប្រភេទទម្ងន់ ៥៧ គីឡូក្រាម ។
Oup Sai ធ្លាប់មកប្រកួតនៅកម្ពុជា៣លើកហើយ។ ការមកជួបគ្នាលើកទី១ (០៦តុលា២០១៨)យក្សផ្លែ វាយចាញ់Oup Sai ដោយពិន្ទុ។មកលើកទី២ កាលពីថ្ងៃទី១០វិច្ឆិកា២០១៨ Oup Sai បានវាយចាញ់យុគ យក្សផ្លែ ក្នុងទឹកទី៣។ហេតុនេះហើយ ទើបគេបានសុំមកជម្រះបញ្ជីយក្សផ្លែវិញនោះ។
អ្នកប្រដាល់ថៃ ដែលយុគ យក្សផ្លែ ត្រូវជួបជម្រះបញ្ជីនេះ ជាជើងខ្លាំងស្រករក្រោយមួយរូបនៅស្រុកថៃ ។ Oup Sai គេមានជំនាញប៉ិនប្រសប់ក្នុងការប្រកណ្តាប់ដៃ ។ គេមានប្រវត្តិប្រកួត៦១លើក ដោយវាយឈ្នះ៥២លើក ចាញ់០៩លើក មិនដែលស្មើ ខណះដែលយុគ យក្សផ្លែ គេមានប្រវត្តិប្រកួតចំនួន១៦៣លើក ឈ្នះ១៣៣លើក ចាញ់២៦លើក និងស្មើ០៤លើក ។
Oup Sai ដែលធ្លាប់ជួបយុគ យក្សផ្លែពីរដងហើយនោះ សម្រាប់ការជួបលើកនេះ គេមិនមានការព្រួយបារម្ភទេ ព្រោះគេស្គាល់ពីថ្វីដៃរបស់យក្សផ្លែហើយនោះ ។
យុគ យក្សផ្លែ ការប្រកួតចុងក្រោយរបស់គេ គឺវាយឈ្នះអ្នកប្រដាល់ថៃYutta Chhai ក្នុងទឹកទី៣ កាលពីថ្ងៃទី២០មេសាកន្លងទៅនេះ ។
ទោះជាយ៉ាងណា ការឈ្នះចាញ់រវាងយុគ យក្សផ្លែ និង Oup Sai នេះ ពុំមាននរណាហ៊ានទាយមុនថាអ្នកណាឈ្នះនោះទេ សម្រាប់ការជួបគ្នាលើកទី៣នេះ ? ។
បើតាមលោក ថៃ អ៊ូ អ្នកដឹកនាំកីឡាករថៃមកប្រកួតនោះ បានអះអាងថា Oup Sai ដែលមកជួបយក្សផ្លែនេះ ជាអ្នកប្រដាល់ជើងខ្លាំងមួយរូបនៅស្រុកថៃ ដែលយុគ យក្សផ្លែ មិនអាចមើលស្រាលគេបានឡើយ បើទោះជាគេ(Oup Sai)ធ្លាប់ចាញ់ម្តងហើយក៏ដោយ ។
ទោះជាយ៉ាងនេះក្តី ក្រុមអ្នកវិភាគប្រដាល់ ពួកគេនៅតែមានជំនឿទុកចិត្តថា យុគ យក្សផ្លែ ឈ្នះលើ Oup Sai នោះដដែល ព្រោះថាយុគ យក្សផ្លែ នេះ គេជាជើងខ្លាំង ។ មួយទៀត យកសផ្លែ គេមានបទពិសោធន៍ច្រើន និងល្បិចកលខ្ពស់ក្នុងការផ្តួលគូប្រកួត ។
ចំពោះការប្រកួតប្រដាល់ដណ្តើមពានរង្វាន់ជើងឯកTV5 Knock Out Series by K.cement ទម្ងន់៥៤ គីឡូក្រាម លើសង្វៀនTV5 ព្រែកកំពឹស នៅយប់ថ្ងៃទី២០មេសានេះដែរ ជាការប្រកួតលើកចុងក្រោយ ក្នុងជម្រុះជុំទី១ ដែលមានអ្នកប្រដាល់ ៤ រូប ដើម្បីប្រជែងយកកៅអីសម្រាប់ជុំទី២បន្តទៀតនោះ ។
សម្រាប់ការប្រកួតជម្រុះលើកចុងក្រោយនេះ ញឹម សារិទ្ធ អ្នកប្រដាល់ក្លិបអារុណរះកីឡា នឹងជួបប្រកួតជាមួយ គិន ខ្លឹម អ្នកប្រដាល់ក្លិបកងពលតូចទ័ពឆ័ត្រយោង៩១១ ។ ការជួបគ្នារវាង ញឹម សារិទ្ធ និង គិន ខ្លឹម នេះ មិនដឹងថាតើ អ្នកណាជាអ្នកឈ្នះនោះឡើយ ព្រោះថាពួកគេទាំងពីរនាក់សុទ្ធតែជាជើងថ្មីដូចគ្នា ។
ចំពោះការប្រកួតមួយគូទៀតនោះ ជាការជួបគ្នារវាង ម៉ាក់ សាមុត អ្នកប្រដាល់ជើងថ្មី នៃក្លិបតាឡីដំរីមានរិទ្ធ និង លីន វណ្ណះ អ្នកប្រដាល់ក្លិបបូរីរាជសីហ៍មានរិទ្ធ។ ពីរនាក់នេះ មិនធ្លាប់ប៉ះគ្នាទេកន្លងមក ដោយសារពួកគេទាំងពីរ ជាអ្នកប្រដាល់ថ្មីស្រករក្រោយដូចគ្នា ។ យ៉ាងណា ការប្រកួតរវាងអ្នកប្រដាល់ទាំងពីរ ពុំដឹងថានរណាជាអ្នកមានសំណាងបានឡើងទៅប្រកួតបន្តទៀតនោះទេ ?។
សូមបញ្ជាក់ថា ការប្រកួតក្នុងជុំទី១នេះ គឺប្រកួតតែបីទឹកទេ ដោយក្នុងមួយទឹកមាន៣នាទី សម្រាក២នាទី ហើយអ្នកដែលឈ្នះបានឡើង និងអ្នកដែលចាញ់ត្រូវជ្រុះធ្លាក់ត្រឹមនេះ ។
ព្រឹត្តិការណ៍ប្រកួតប្រដាល់ដណ្តើមពានរង្វាន់ជើងឯកTV5 Knock Out Series by K.cementទម្ងន់៥៤គីឡូក្រាម មានអ្នកប្រដាល់ចំនួន ៣២ នាក់ចូលរួម ហើយចែកចេញជា ៤ ជុំ និងមានរូបមន្តប្រកួត គឺជុំទី១ជាការប្រកួតជម្រុះក្នុងចំណោម៣២នាក់ ទុកតែ១៦នាក់ ។
មកដល់ពេលនេះ គឺមានអ្នកប្រដាល់ចំនួន១៤រូបហើយ ដែលបានកក់កៅអីសម្រាប់ជុំទី២ គឺម៉ន ភារម្យ ក្លិបការិយាល័យទី៥កងទ័ពជើងគោក ,ចាន់ សាន់ ក្លិបតាព្រហ្មមានជ័យ , ឡុង ណងសៅ ក្លិបសាលវ័ន្តកីឡា, គួន សុវណ្ណ ក្លិបយុវវាលស្បូវកីឡា , អេ ហនុមាន ក្លិបអេភូថងកីឡា , ផាន់ សុផាត ក្លិបពុទ្ធសេរីវង្សកីឡា,គឿម សុវណ្ណឌឿត ក្លិបមោងឫស្សីមរតកគុនខ្មែរ, ខេម ចាន់ ក្លិបកងពលតូចទ័ពឆ័ត្រយោង៩១១ , ឫទ្ធិ សាស្ត្រាវុធ ក្លិបអាណាចក្រគុនខ្មែរ ,សូត្រ វាសនា ក្លិបបក្សីស្លាបដែក ,អេអាំម៉ារីន ភូថង ក្លិបអេភូថងកីឡា , ជី ឆៃលី ក្លិបកងពលធំអន្តរាគមន៍លេខ២ ,សេក សារ៉ាន់ ក្លិបអង្គរមានជ័យខេត្តសៀមរាប និង លី តក់ ក្លិបប្រយុទ្ធគុនខ្មែរ៕
Source: Kampuchea Thmey Daily
0 Comments