ភ្នំពេញ ៖ វាពិតជាសាហាវខ្លាំងណាស់ ដែលគ្រាន់តែច្រឡំជះទឹកទៅក្បែរកន្លែងដេកសោះ ស្រាប់តែភាគីបង្ក ស្ទុះទៅទាញកាំបិតចាក់ធ្លាយពោះអ្នកជះទឹក។
ហេតុការណ៍នេះ កើតឡើងនៅវេលាម៉ោង២០និង០០នាទីយប់ថ្ងៃទី២៣ ខែមេសា នៅចំណុចផ្ទះគ្មានលេខ ភូមិតាងៅ សង្កាត់និរោធ ខណ្ឌច្បារអំពៅ រាជធានីភ្នំពេញ។
តាមប្រភពព័ត៌មានពីលោកម៉ៅ សឿត អធិការរងនគរបាលខណ្ឌច្បារអំពៅទទួលបន្ទុកព្រហ្មទណ្ឌបានឲ្យដឹងថា ជនរងគ្រោះឈ្មោះកែវ វ៉ាន់ធី ភេទប្រុស អាយុ៤១ឆ្នាំ ជាតិខ្មែរ មុខរបរជាងឈើ ស្នាក់ នៅភូមិតាងៅ សង្កាត់និរោធ ខណ្ឌច្បារអំពៅ។ -ជនសង្ស័យឈ្មោះម៉ាន់ ដារិទ្ធ ភេទ ប្រុស អាយុ២៥ឆ្នាំ ជាតិខ្មែរ មុខរបរគ្មាន ស្នាក់នៅ ភូមិតាងៅ សង្កាត់និរោធ ខណ្ឌច្បារអំពៅ។
ហេតុការណ៍ ៖ កាលពីថ្ងៃទី ២៣-០៤-២០១៩ ម៉ោង២០និង០០នាទី ជនរងគ្រោះជិះម៉ូតូឌុបមិត្តភក្តិទៅផ្ទះ ពេលមកដល់ចំណុចកើតហេតុ ក៏ឈប់ម៉ូតូសុំទឹកគេផឹក រួចជះទឹកទៅក្បែរកន្លែងជនសង្ស័យកំពុងដេកលើអង្រឹង ពេលនោះជនសង្ស័យសួរថា ម៉េចបងឯងជះទឹកដាក់កន្លែងខ្ញុំដេកអីចឹង? រួចក៏មានទំនាស់ពាក្យសម្តីគ្នា ស្រាប់តែជនសង្ស័យយកកូនកាំបិត ចុងស្រួចចាក់ទៅលើជនរងគ្រោះចំពោះរបួសធ្ងន់ រួចជនសង្ស័យរត់គេចខ្លួនយក កូនកាំបិតបោះចោលក្នុងព្រៃបាត់។ ចំណែកជនរងគ្រោះត្រូវបានក្រុមគ្រួសារនាំទៅព្យាបាលរបួសនៅមន្ទីរពេទ្យបង្អែក ច្បារអំពៅ ដេរ០៥ថ្នេរ។ រហូតដល់ម៉ោង២១និង០០នាទីថ្ងៃដដែល សមត្ថកិច្ចយើងឃាត់ខ្លួនបានជនសង្ស័យនៅភូមិ តាងៅ សង្កាត់និរោធ ខណ្ឌច្បារអំពៅ បញ្ជូនមកអធិការដ្ឋាននគរបាលខណ្ឌច្បារអំពៅ ចាត់ការតាមច្បាប់៕
Source: Kampuchea Thmey Daily
0 Comments