កំពង់ឆ្នាំង ៖ លោក ប្រាក់ សោភ័ណ្ឌ នាយកប្រតិបត្តិសាខាកាកបាទក្រហមកម្ពុជាខេត្តកំពង់ឆ្នាំង រួមដំណើរដោយក្រុមការងារខេត្ត ស្រុក ឃុំ នៅព្រឹកថ្ងៃទី២៦ ខែមេសា ឆ្នាំ២០១៩ បាននាំយកអំណោយមនុស្សធម៌ របស់សាខាកាកបាទក្រហមកម្ពុជាខេត្តកំពង់ឆ្នាំង ជូនគ្រួសារក្រីក្រ មានជំងឺ ចំនួន០២គ្រួសារ នៅក្នុងស្រុកកំពង់ត្រឡាច។
លោកប្រាក់ សោភ័ណ ក្នុងពេលសួរសុខទុក្ខក្រុមគ្រួសារទាំង២ លោកក៏បានជម្រាបជូនដល់ក្រុមគ្រួសារទាំង២ នូវការផ្ដាំផ្ញើរសាកសួរសុខទុក្ខ ពីសំណាក់ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលជានិច្ចកាល សម្ដេច តែងតែគិតគូរអំពីសុខទុក្ខ និងការលំបាករបស់បងប្អូនប្រជាពលរដ្ឋនៅគ្រប់ទីកន្លែង ដោយមិនមានការប្រកាន់ ពូជសាសន៍ ឬនិន្នាការនយោបាយ អ្វីឡើយ។
ដោយឡែក គ្រួសារក្រីក្រខាងលើ មាន១.ឈ្មោះ សា ឈឿន ភេទប្រុស អាយុ៥៥ឆ្នាំ រស់នៅភូមិត្រពាំងក្តារ ឃុំថ្មឥដ្ឋ ស្រុកកំពង់ត្រឡាច មានជំងឺពិការស្លាប់មួយចំហៀងខ្លួន រស់នៅជាមួយម្តាយចាស់ជរា អាយុ៧៨ឆ្នាំ ក្នុងខ្ទមតូចមួយ ទទួលបានអំណោយ ៖ អង្ករ៦០គីឡូ មី១កេស ត្រីខ១យួរ ឃីត១កញ្ចប់ និង ថវិកា៥ម៉ឺនរៀល និងថវិកាសប្បុរសធម៌របស់ស្រុក ឃុំ ចំនួន២០០.០០០រៀល។
២.ឈ្មោះ វង សុំ ភេទ ប្រុស អាយុ៦៩ឆ្នាំ ប្រពន្ធ ឈ្មោះ ម៉ុម ម៉ៅ អាយុ៧០ឆ្នាំ រស់នៅភូមិត្រពាំងក្តារ ឃុំថ្មឥដ្ឋ ស្រុកកំពង់ត្រឡាច ខេត្តកំពង់ឆ្នាំង ដែលមានជីវភាពខ្វះខាត។ អំណោយដែលទទួលបានរួមមាន ៖ អង្ករ៦០គីឡូ មី១កេស ត្រីខ១យួរ ឃីត១កញ្ចប់ និង ថវិកា៥ម៉ឺនរៀល។
ក្នុងឱកាសនោះដែរ លោក ប្រាក់ សោភ័ណ ក៏បានសំណូមពរឲ្យអ្នកជំងឺនៅក្នុងក្រុមគ្រួសារទាំង២ សូមថែទាំសុខភាពឲ្យបានល្អ ដោយត្រូវលេបថ្នាំតាមវេជ្ជបញ្ជារបស់គ្រូពេទ្យឲ្យបានត្រឹមត្រូវ និងបើជំងឺមានសភាពមិនស្រួល សូមរូតរះទៅព្យាបាលនៅក្នុងមន្ទីរពេទ្យ ដែលនៅជិត ហើយត្រូវរាយការណ៍មកអាជ្ញាធរមូលដ្ឋាន និងសាខាកាកបាទក្រហមស្រុក និងខេត្តជាបន្ទាប់ ដើម្បីសាខាកាកបាទក្រហមជួយដោះស្រាយរាល់ការខ្វះខាតជាបន្តទៀត៕
Source: Kampuchea Thmey Daily
0 Comments