អង្គការ World Jewish Congress (WJC) បានថ្កោលទោសទីប្រជុំជនប៉ូឡូញមួយក្រោយពីមានសេចក្ដីរាយការណ៍ថា ប្រជាពលរដ្ឋបានព្យួរនិងដុតរូបទីងមោងមួយដែលធ្វើមកមើលទៅដូចជនជាតិជ្វីហ្វម្នាក់តាមប្រពៃណីពិធីបុណ្យ Easter សម័យបុរាណ។យោងតាមសេចក្តីថ្លែងការណ៍មួយបានឲ្យដឹងថា នាយកប្រតិបត្តិអង្គការ WJC លោក Robert Singer បានបង្ហាញពីការស្អប់ខ្ពើមនិងការខឹងសម្បាយ៉ាងខ្លាំងចំពោះការបង្ហាញបែបនេះ។
លោកបានបន្ថែមថា “ជនជាតិជ្វីហ្វត្រូវបានរំខានយ៉ាងខ្លាំងដោយពិធីបែបនេះដែលនាំឲ្យមានអំពើហិង្សានិងការឈឺចាប់ដែលមិនអាចនឹកស្មានដល់”។របាយការណ៍ប្រព័ន្ធផ្សព្វផ្សាយប៉ូឡូញបានបង្ហាញរូបថតនិងវីដេអូនៃអ្នកស្រុកដែលរួមទាំងកុមារផងដែរនៅភាគអាគ្នេយ៍ទីប្រជុំជន Pruchnik ដែលបានប្រើដំបងដើម្បីវាយរូប Judas on Good Friday។យោងតាមរបាយការណ៍បានឲ្យដឹងថា រូបនេះដែលមានច្រមុះធំគឺត្រូវបានគេកាត់ក្បាលហើយត្រូវបានដុតនិងបោះចូលទៅក្នុងទន្លេមួយ។
ពិធីសាសនានៃបុណ្យ Easter ដែលគេស្គាល់ថាជា “Judgment over Judas” គឺមានចាប់តាំងពីសតវត្សទី១៨មកម្ល៉េះហើយបានបន្តអនុវត្តជាទៀងទាត់រហូតដល់សង្គ្រាមលោកលើកទីពីរ។ទោះបីជាយ៉ាងណាក៏ដោយ ប្រពៃណីនេះត្រូវបានគេបោះបង់ចោលភាគច្រើនដោយនៅសល់តែភូមិពីរបីប៉ុណ្ណោះដែលបន្តអនុវត្តវា។
ការព្រួយបារម្ភអំពីការរើសអើងទាក់ទងនឹងប្រទេសប៉ូឡូញបានលេចឡើងជាថ្មីនា ពេលថ្មីៗនេះ។ កាលពីឆ្នាំមុនរដ្ឋាភិបាលក្រុង Warsaw បានអនុម័តច្បាប់មួយដែលចាត់ទុកថាជា ការខុសច្បាប់ចំពោះការចោទប្រកាន់ប្រទេសប៉ូឡូញឬរដ្ឋនានាអំពីការផ្សំគំនិតក្នុងឧក្រិដ្ឋកម្មសង្គ្រាមណាហ្ស៊ីអាល្លឺម៉ង់។
ទង្វើនេះបានបង្កឲ្យមានការថ្កោលទោសពីអ៊ីស្រាអែលដែលមើលឃើញថា វាជាការប៉ុនប៉ងមួយដើម្បីហាមឃាត់សក្ខីកម្មលើឧក្រិដ្ឋកម្មប៉ូឡូញប្រឆាំងនឹងជនជាតិជ្វីហ្វ។ ជាការឆ្លើយតបរដ្ឋាភិបាលក្រុង Warsaw បានធ្វើវិសោធនកម្មច្បាប់ដើម្បីលុបចោលលទ្ធភាពនៃការផាកពិន័យឬការកាត់ទោសជាប់ពន្ធនាគារ៕ AFP
Source: Kampuchea Thmey Daily
0 Comments