ភ្នំពេញ ៖ រថយន្តដឹកដី ដឹកខ្សាច់ ដឹកថ្ម ជាច្រើនគ្រឿង ត្រូវបានអាជ្ញាធរខណ្ឌដង្កោដាក់កម្លាំងឃាត់មិនឲ្យបើកបរ ដោយសារតែក្រុមរថយន្តទាំងនេះ បើកបរឆ្លងកាត់មូលដ្ឋានខណ្ឌដង្កោ ធ្វើឲ្យប៉ះពាល់បងប្អូនប្រជាពលរដ្ឋរស់នៅសង្កាត់គងនយ ខណ្ឌដង្កោ។
មន្ត្រីអាជ្ញាធរខណ្ឌដង្កោប្រាប់ឲ្យដឹងថា រថយន្តដឹកដី ដឹកខ្សាច់ ដឹកថ្ម ជាច្រើនគ្រឿង ដែលត្រូវបានអាជ្ញាធរខណ្ឌដង្កោដាក់កម្លាំងឃាត់មិនឲ្យបើកបរ ដោយសារតែក្រុមរថយន្តដឹកសារធាតុរ៉ែទាំងនេះ បើកបរឆ្លងកាត់មូលដ្ឋានខណ្ឌដង្កោ ធ្វើអោយប៉ះពាល់បងប្អូនប្រជាពលរដ្ឋរស់នៅសង្កាត់គងនយ ខណ្ឌដង្កោ ទើប លោក នុត ពុធដារ៉ា អភិបាល នៃគណៈអភិបាលខណ្ឌដង្កោ បញ្ជាមន្ត្រីជំនាញ និង កម្លាំងសណ្ដាប់ធ្នាប់សាលាខណ្ឌដង្កោ និង អាជ្ញាធរសង្កាត់គងនយ ដាក់កម្លាំងឃាត់មិនឲ្យក្រុមរថយន្តទាំងនេះ បើកបរឆ្លងកាត់មូលដ្ឋានខណ្ឌដង្កោតែម្ដង ពីព្រោះថា ក្រុមរថយន្តដឹកដី ដឹកខ្សាច់ ដឹកថ្ម ទាំងអស់នេះ បើកបរចេញពីស្រុកកណ្តាលស្ទឹង ខេត្តកណ្តាល ដោយបើកបរឆ្លងកាត់សង្កាត់គងនយ បន្តទៅចាក់បំពេញដីឡូត៍ ឬ ទីតាំងការដ្ឋានផ្សេងៗទៀត នៅក្នុងរាជធានីភ្នំពេញ ប៉ុន្តែក្រុមរថយន្តដឹកដី ដឹកខ្សាច់ ដឹកថ្ម ទាំងនេះ ធ្វើឲ្យប៉ះពាល់បរិស្ថានទៅដល់បងប្អូនប្រជាពលរដ្ឋរស់នៅសង្កាត់គងនយ ដូចជា បើកក្នុងល្បឿនលឿនៗ មិនស្រោចទឹកផ្លូវ ធ្វើឲ្យដីហុយទ្រលោម ក៏ដូចជា បណ្តាលឲ្យខូចផ្លូវជាដើម ទើប លោក នុត ពុធដារ៉ា អភិបាល នៃគណៈអភិបាលខណ្ឌដង្កោ បញ្ជាមន្ត្រីជំនាញ និង កម្លាំងសណ្ដាប់ធ្នាប់សាលាខណ្ឌដង្កោ និង អាជ្ញាធរសង្កាត់គងនយ ដាក់កម្លាំងឃាត់មិនឲ្យក្រុមរថយន្តទាំងនេះ បើកបរឆ្លងកាត់មូលដ្ឋានខណ្ឌដង្កោតែម្ដង ដើម្បីរកដោះស្រាយណាមួយ កុំប៉ះពាល់បរិស្ថានបន្តទៀត។
ប្រភពព័ត៌មានប្រាប់បន្តថា ក្រោយពីមានការបិទផ្លូវបែបនេះ តំណាងក្រុមហ៊ុន ដឹកដី ដឹកថ្ម ដឹកខ្សាច់ទាំងនេះ បានចេញមុខធ្វើការដោះស្រាយដោយសន្យាធ្វើការជួសជុលផ្លូវ ស្រោចទឹកជាប្រចាំ និង បន្ថយល្បឿនក្នុងការបើកបរ។
កិច្ចសន្យានេះ ត្រូវបានបញ្ចប់ទៅវិញដោយមានតំណាង លោក លី គឹមហេង ជំនួសក្រុមហ៊ុន រថយន្តដឹកដី ដឹកថ្ម ដឹកខ្សាច់ ប្រចាំស្រុកកណ្ដាលស្ទឹង ខេត្តកណ្តាល ប្រមាណ៤ក្រុមហ៊ុន ចូលខ្លួនដោះស្រាយ ទើបអាជ្ញាធរខណ្ឌដង្កោ យល់ព្រមអនុញ្ញាតឲ្យក្រុមរថយន្តដឹកសារធាតុរ៉ែទាំងនោះបើកបរជាធម្មតាវិញ។
ពាក់ព័ន្ធទៅនឹងព័ត៌មាននេះ ភ្នាក់ងារកាសែតកម្ពុជាថ្មី បានព្យាយាមទំនាក់ទំនងតាមរយៈទូរស័ព្ទទៅកាន់ លោក លី គឹមហេង ដែលមានរណ្ដៅដីនៅស្រុកកណ្តាលស្ទឹង ខេត្តកណ្តាល លោកបានឆ្លើយតបថា លោកតំណាងក្រុមហ៊ុនទាំងអស់ នឹងស្ថាបនាជាផ្លូវអ៊ុតកៅស៊ូជូនប្រជាពលរដ្ឋរស់នៅសង្កាត់គងនយ ខណ្ឌដង្កោ ក្នុងពេលឆាប់ៗខាងមុខនេះ ប្រវែងប្រហែលប្រមាណ៥០០ម៉ែត្រ ដើម្បីកុំឲ្យប៉ះពាល់បរិស្ថានបន្តទៀត។ ពីព្រោះថា បច្ចុប្បន្ននេះ មានក្រុមហ៊ុនប្រហែល១០០ ហើយក៏មានក្រុមហ៊ុនរថយន្តដឹកថ្ម បើកបរមកពីខេត្តកំពង់ស្ពឺកំពុងបើកបរឆ្លងកាត់ផ្លូវនេះផងដែរ ប៉ុន្តែនៅពេលមានបញ្ហាបែបនេះ គ្មានក្រុមហ៊ុនណាចេញមុខដោះស្រាយឡើយ គឺមានតែក្រុមហ៊ុនរបស់ លោកប៉ុណ្ណោះដែលចេញមុខដោះស្រាយជូនប្រជាពលរដ្ឋ។
សូមបញ្ជាក់ឲ្យដឹងថា នៅក្នុងស្រុកកណ្ដាលស្ទឹង ខេត្តកណ្តាល បច្ចុប្បន្នកំពុងកើតមានរណ្ដៅដី ការដ្ឋានបូមខ្សាច់ ជាច្រើនកន្លែង កំពុងបើកអាជីវកម្ម ដឹកជញ្ជូន ១ថ្ងៃៗ រាប់សិបឡាន ហើយក៏តែងតែបង្កផលប៉ះពាល់បរិស្ថានយ៉ាងខ្លាំងផងដែរ ទៅដល់មូលដ្ឋានខេត្តកណ្តាលខ្លួនឯងផ្ទាល់តែម្តង រហូតឈានមកដល់ខណ្ឌដង្កោទៀតផង។ ប៉ុន្តែទោះបីយ៉ាងណាក្តី អាជ្ញាធរខណ្ឌដង្កោ មិននៅស្ងៀមនោះទេ គឺឲ្យតែមានផលលំបាក អាជ្ញាធរខណ្ឌតែងតែជួយដោះស្រាយជានិច្ច ជាក់ស្ដែង ដូចជា បញ្ហាក្រុមរថយន្តដឹកដី ដឹកខ្សាច់ ដឹកថ្ម នេះជាដើម៕
Source: Kampuchea Thmey Daily
0 Comments