ប៉ោយប៉ែត ៖ សមត្ថកិច្ចថៃ បានប្រកាសជូនដំណឹងដល់ពលករខ្មែរ ដែលត្រឡប់ទៅប្រទេសថៃវិញហាមមិនឲ្យយកគ្រឿងបរិភោគ ដែលផលិតចេញពីសាច់ជ្រូកចូលទៅក្នុងប្រទេសរបស់គេឡើយ បើជនណាមួយមិនស្ដាប់ក្នុងការណែនាំរបស់មន្ត្រីថៃខាងលើទេ គឺគេនឹងចាប់យកទៅដាក់គុកដែលមានរយៈពេល២ឆ្នាំ ហើយផាកពិន័យជាទឹកប្រាក់ចំនួនចាប់ពីសែនបាត ទៅប្រាំសែនបាតឯណោះ។
សូមបញ្ជាក់ដែរថា ក្រោយពេលចូលឆ្នាំខ្មែររួច គេបានសម្គាល់ឃើញពលករខ្មែរប្រុស/ស្រីក្មេងចាស់ បាននាំគ្នាវិលត្រឡប់ទៅបំពេញការងាររបស់ខ្លួនក្នុងប្រទេសថៃវិញ ទន្ទឹមនឹងនោះ គេក៏បានសម្គាល់ឃើញមានការហាមប្រាមពីអាជ្ញាធរថៃនៅឯច្រកទ្វារខ្លងលឹក ដែលប្រឈមនឹងច្រកទ្វារអន្តរជាតិប៉ោយប៉ែតខាងកម្ពុជា។ ក្នុងការហាមប្រាមនោះ ត្រូវបានថៃផ្សព្វផ្សាយជាសាធារណៈនៅឯច្រកទ្វារខ្លងលឹក ថា ចំពោះបងប្អូនខ្មែរទាំងអស់ដែលចូលមកក្នុងដីថៃ មិនត្រូវយកមកជាមួយនូវគ្រឿងបរិភោគដូចជា ផ្អកផលិតចេញពីសាច់ជ្រូក សាច់ក្រកដែលផលិតចេញពីសាច់ជ្រូក ប្រហិតដែលផលិតចេញពីសាច់ជ្រូក យកចូលក្នុងដីថៃឡើយ។
តាមការលើកឡើងរបស់ពលករខ្មែរច្រើនដែលមកដល់ស្រុកកំណើតក្នុងរដូវចូលឆ្នាំ ហើយក៏ត្រូវត្រឡប់ទៅបំពេញការងារនៅប្រទេសថៃនោះវិញ បានលើកឡើងថា ពួកគាត់មួយចំនួនបានទិញសាច់ជ្រូកទិញសាច់ក្រក ទិញប្រហិត និងគ្រឿងបរិភោគមួយចំនួនទៀតដូចជា ប្រហុក ត្រីងៀត និងអាហារផ្សេងទៀត ដើម្បីយកទៅផ្គត់ផ្គង់សម្រាប់ហូបចុកក្នុងពេលដែលខ្លួនបំពេញការងារនៅក្នុងរោងចក្រ និងនៅតាមកន្លែងផ្សេងៗក្នុងដីថៃ។ ពួកគាត់ក៏បានលើកឡើងដែរថា បើសិនជាអាជ្ញាធរថៃមានការហាមប្រាមមិនឲ្យយកគ្រឿងបរិភោគដូចបានជូនដំណឹងខាងលើនោះ ចូលទៅក្នុងប្រទេសរបស់គេ នោះវាដូចជាជ្រុលពេកហើយ ព្រោះអីកន្លងទៅ ខាងថៃ ក៏ធ្លាប់យកគ្រឿងបរិភោគដែលខូចគុណភាពនាំចូលមកប្រទេសកម្ពុជារាប់សិបតោន ហើយយកមកលក់តាមទីផ្សារតូចធំនៅទូទាំងប្រទេសរួចមកហើយកន្លងទៅ មកដល់ពេលនេះ តែពុំឃើញមានមន្ត្រីណាមួយធ្វើការទប់ស្កាត់ឡើយ ចំពោះពួកគាត់ដែលទិញគ្រឿងបរិភោគចូលទៅដើម្បីក្រពះរបស់ខ្លួននោះ បែរជាគេហាមប្រាមមិនឲ្យយកចូលទៅវិញ។ ពលករដែលនោះក៏បានលើកឡើងទៀតថា ថៃ បានអាងថា ជ្រូកនៅកម្ពុជា គឺមានជំងឺមេរោគច្រើន ទើបគេមានវិធានការទប់ស្កាត់បែបនេះបើទោះជាបងប្អូនខ្មែរដែលជាពលករទាំងនោះប្រើវិធីវេចខ្ចប់គ្រឿងបរិភោគដែលផលិតចេញពីសាច់ជ្រូកដាក់ក្នុងការុង ឬក្នុងបាឡូរបស់ខ្លួនយ៉ាងណាក៏ដោយ ក៏គេនៅតែរកឃើញដែរ។
ចំពោះខាងសមត្ថកិច្ចថៃ ដែលនៅឯច្រកទ្វារខ្លងលឹក នោះ បានប្រកាសជាភាសាខ្មែរតាមមេក្រូនៅមាត់ច្រកទ្វារខ្លងលឹកថា បើសិនជាបងប្អូនខ្មែរណាមានវត្ថុគ្រឿងបរិភោគដូចតាមការប្រកាសរបស់អាជ្ញាធរថៃខាងលើនោះ គឺយកមកប្រគល់ត្រង់មកឲ្យអាជ្ញាធរដើម្បីមានវិធានការទប់ស្កាត់ជៀសវាង ការឆែកឆេរឃើញនៅក្នុងការុងអង្ករ ឬនៅក្នុងវាឡូត៍របស់ខ្លួន គឺត្រូវតែមានទោសដោយខានមិនបានឡើយ៕
Source: Kampuchea Thmey Daily
0 Comments